ചാലക്കുടി ∙ തൃശൂർ സെഷൻസ്, ഇരിങ്ങാലക്കുട അഡീഷനൽ സെഷൻസ് എന്നീ കോടതികളിൽ കെട്ടിക്കിടക്കുന്ന ഒട്ടേറെ സ്ത്രീ പീഡന കേസുകൾ ചാലക്കുടി പോക്സോ കോടതിയിലേയ്ക്കു കൈമാറി. ഇത്തരം കേസുകളിൽ അതിവേഗം തീർപ്പു കൽപിക്കാൻ ഇതു വഴി സാധിക്കുന്നുവെന്നതാണു പ്രയോജനം. ഇതിന്റെ നടപടികള്‍ ആ കോടതികളില്‍ പൂര്‍ത്തിയാക്കാന്‍ ഇനിയും വര്‍ഷങ്ങള്‍ കാത്തിരിക്കേണ്ട സ്ഥിതിയാണ്.

ഈ കാലതാമസം ഒഴിവാക്കാനാണു താരതമ്യേന കേസുകൾ കുറവുള്ള അതിവേഗ പ്രത്യേക പോക്സോ കോടതിയിലേയ്ക്കു കൈമാറുന്നത്. സ്ത്രീകൾക്കും കുട്ടികൾക്കും നേരെയുള്ള അതിക്രമങ്ങളുമായി ബന്ധപ്പെട്ട മറ്റു കേസുകളിലും  സെക്‌ഷൻ കോടതികളിൽ നിന്നു പോക്സോ കോടതിയിലേയ്ക്കു കൈമാറുന്നുണ്ട്. ഇവിടെയെത്തുന്ന പോക്സോ കേസുകളിലും അതിവേഗം വിധി പ്രഖ്യാപിക്കുന്നുണ്ട്.