ഇരിങ്ങാലക്കുട∙ മുരിയാട് കോന്തിപുലം കോൾ പാടശേഖരങ്ങളിലെ മോട്ടർ ഷെഡുകളിൽ വ്യാപക മോഷണം. വിവിധ കർഷക സംഘങ്ങളുടെ  വൈദ്യുതി കണക്‌ഷൻ കേബിളുകളാണ് കൊണ്ടുപോയത്.  മുരിയാട് ഗ്രാമശ്രീ, കൂവപ്പുഴ പാടശേഖരം,  പൊതുമ്പുച്ചിറ പാടശേഖരം, കരിംപാടം എന്നിവിടങ്ങളിലാണ് മോഷണം നടന്നത്.  പുഞ്ചക്കൃഷി ആരംഭിക്കുന്ന  സമയമായതിനാൽ  പാട ശേഖരത്തിൽ നിന്നു കനാലിലേക്ക് വെള്ളം പമ്പ് ചെയ്യാൻ കഴിയാത്ത  അവസ്ഥയിലാണ് കർഷകർ. കഴിഞ്ഞ വർഷവും സമാനമായ രീതിയിൽ മോഷണം നടന്നതായി  കർഷകർ പറഞ്ഞു. മോട്ടർ ഷെഡിൽ ഇട്ടിരുന്ന 300 കിലോയോളം തൂക്കം വരുന്ന  ഇരുമ്പ് ഷീറ്റുകളും നേരത്തെ മോഷണം പോയതായും കർഷകർ പറഞ്ഞു. വിഷയത്തിൽ അടിയന്തിര നടപടി വേണമെന്ന് ആവശ്യപ്പെട്ട് പാടശേഖര സമിതികൾ പുതുക്കാട്, ആളൂർ, കൊടകര പൊലീസ് സ്റ്റേഷനുകളിൽ പരാതി നൽകി.