വരൂ.. പാറന്നൂർ ചിറയിൽ ഉല്ലസിക്കാം; പാറന്നൂർ ചിറ ടൂറിസം വില്ലേജിൽ വിനോദസഞ്ചാരികളുടെ തിരക്കേറി

കേച്ചേരി∙ മഴ ശക്തമായതോടെ ചൂണ്ടൽ പഞ്ചായത്തിലെ പാറന്നൂർ ചിറ ടൂറിസം വില്ലേജിൽ വിനോദസഞ്ചാരികളുടെ തിരക്കേറി. പുഴയിൽ വെള്ളം കുത്തിയൊലിച്ചൊഴുകുന്ന മനോഹര കാഴ്ച കാണാനും പുഴയിൽ നീരാടാനും സഞ്ചാരികൾക്കു കൗതുകം. പ്രഭാത, സായാഹ്ന സവാരിക്കായി എത്തുന്നവർ ഓപ്പൺ ജിമ്മിൽ വ്യായാമത്തിനും സമയം കണ്ടെത്തുന്നു. ഇതിൽ ആൺ പെൺ ഭേദമില്ല. ഉദയാസ്തമയക്കാഴ്ചയിലെ മനോഹാരിത ചിറയെ വ്യത്യസ്തമാക്കുന്നു. വാഴാനി ഡാമിൽനിന്ന് പുഴയിലൂടെ ഒഴുകിയെത്തുന്ന വെള്ളം കൈവഴികളിലൂടെ പാറന്നൂർ ചിറയിൽനിന്ന് ഒഴുകുന്ന കാഴ്ചയാണ് സഞ്ചാരികളെ എറെ ആകർഷിക്കുന്നത്. പച്ചപ്പുതപ്പണിഞ്ഞ പാടത്ത് വിരുന്നെത്തുന്ന ദേശാടനപ്പക്ഷികളും മറ്റൊരാകർഷണം.