കൈപ്പറമ്പ്-തലക്കോട്ടുകര റോഡ് തകർന്ന് സഞ്ചാരയോഗ്യമല്ലാതായി

കേച്ചേരി∙ കൈപ്പറമ്പ്-തലക്കോട്ടുകര റോഡ് തകർന്നിട്ട് നാളുകൾ ഏറെയായി. പലയിടങ്ങളിലും വലിയ കുഴികളാണ്. കാനകൾ അടഞ്ഞ് മഴവെള്ളം റോഡിൽ കെട്ടിക്കിടന്നാണു റോഡ് തകർന്നത്. പല ഭാഗത്തും സ്വകാര്യ വ്യക്തികൾ കാന മണ്ണിട്ടു നികത്തിയിരിക്കുകയാണ്. വിദ്യ എൻജിനീയറിങ് കോളജ്, കുറുമാൽ ഗാഗുൽത്താ ധ്യാനകേന്ദ്രം, കിഡ്നി ഫെഡറേഷൻ ഓഫ് ഇന്ത്യയുടെ ഡയാലിസിസ് സെന്റർ തുടങ്ങിയ സ്ഥാപനങ്ങളും ആരാധനാലയങ്ങളും സ്ഥിതി ചെയ്യുന്ന 3 കിലോമീറ്റർ ദൂരമുള്ള റോഡ് 3 പഞ്ചായത്തുകളുടെ സംഗമകേന്ദ്രമായതിനാൽ ജനപ്രതിനിധികളാരും ശ്രദ്ധിക്കുന്നില്ലെന്നു നാട്ടുകാർ പരാതിപ്പെട്ടു.