കരിക്കാട് മോഷണം: ഡോഗ് സ്ക്വാഡ് പരിശോധന നടത്തി

പെരുമ്പിലാവ് ∙ കരിക്കാട് കൊങ്ങണൂർ റോഡിൽ മോഷണം നടന്ന മേനോത്ത് സഫിയയുടെ വീട്ടിൽ വിരലടയാള വിദഗ്ധരും ഡോഗ് സ്ക്വാഡും പരിശോധന നടത്തി. ബുധൻ രാത്രിയാണ് കള്ളൻ കയറിയത്. പൂട്ടിക്കിടന്ന വീടിന്റെ മുൻവാതിൽ കുത്തിത്തുറന്ന് അകത്തു കയറിയ മോഷ്ടാവ് അലമാരയിൽ സൂക്ഷിച്ചിരുന്ന പതിനായിരത്തോളം രൂപ കവർന്നു.

അഞ്ചോളം അലമാരകൾ പൊളിക്കുകയും സാധനങ്ങൾ വലിച്ചുവാരിയിടുകയും ചെയ്തിരുന്നു. വീട്ടിലും പരിസരത്തും പരിശോധന നടത്തിയ സംഘം ഇരുപതോളം വിരലടയാളങ്ങൾ ശേഖരിച്ചു. കുന്നംകുളം പൊലീസ് അന്വേഷണം തുടങ്ങി. ഒറ്റയ്ക്കു താമസിക്കുന്ന സഫിയ രാത്രി ഉറങ്ങാൻ തൊട്ടടുത്തുള്ള സഹോദരന്റെ വീട്ടിൽ പോയിരുന്നു. രാവിലെ വീട്ടിൽ തിരിച്ചെത്തിയപ്പോഴാണു മുൻവാതിൽ പൊളിച്ചനിലയിൽ കണ്ടത്.