ചൊവ്വല്ലൂർപടിയിൽ മരം വീണു; ഒടിഞ്ഞത് 19 വൈദ്യുത പോസ്റ്റുകൾ
Mail This Article
ഗുരുവായൂർ ∙ ചൊവ്വല്ലൂർപടി കെബിഎം റോഡിൽ സെന്റ് ജോൺസ് സ്കൂളിനു മുന്നിൽ മരം വീണ് 19 വൈദ്യുതി പോസ്റ്റുകൾ ഒടിഞ്ഞു വീണു. വൈദ്യുതി കമ്പികൾക്ക് അടിയിൽപ്പെട്ട ഓട്ടോറിക്ഷയിൽ നിന്ന് ഡ്രൈവർ ചൊവ്വല്ലൂർ സ്വദേശി രാമനാത്ത് ഷാഹു ഓടി രക്ഷപ്പെട്ടു. ഓട്ടോയുടെ മുൻവശം തകർന്നു.
മനയിൽ കൃഷ്ണാനന്ദന്റെ വീട്ടുവളപ്പിലെ മാവിന്റെ ഒരു കൊമ്പ് ഉച്ചയ്ക്ക് 12.15 ന് ഒടിഞ്ഞു വീണു. സെന്റ് ജോൺസ് സ്കൂളിൽ വാർഷികമായതിനാൽ നടക്കുന്നതിനാൽ സ്കൂൾ അധികൃതർ അറിയിച്ചതിനെ തുടർന്ന് കെഎസ്ഇബി ജീവനക്കാർ സ്ഥലത്തെത്തി. വൈദ്യുതി ബന്ധം വിഛേദിച്ചു മരം മുറിക്കുന്നതിനിടെ 12.30യോടെ മാവിന്റെ വലിയൊരു കൊമ്പു കൂടി നിലം പതിച്ചു. ലൈൻമാൻ കലേഷ് ഓടി മാറിയതിനാൽ പരുക്കേറ്റില്ല. ഒരു കിലോമീറ്റർ ദൂരത്തിൽ 19 വൈദ്യുതി പോസ്റ്റുകൾ മുറിഞ്ഞു വീണു.
തൊഴിലുറപ്പ് ജീവനക്കാർ ഓടി മാറി രക്ഷപ്പെട്ടു.മരത്തിന്റെ ഉടമ കൃഷ്ണാനന്ദന്റെ ഓടിട്ട വീടിനും മതിലിനും കേടു പറ്റി.ഗുരുവായൂർ പൊലീസും അഗ്നിരക്ഷാസേനയും നാട്ടുകാരുടെ സഹായത്തോടെ റോഡിൽ നിന്നു മരക്കൊമ്പ് മുറിച്ചു മാറ്റി. ഈ റോഡിൽ ഗതാഗതം നിരോധിച്ചു. കഴുമപ്പാടം, തൈക്കാട് സൗത്ത് ട്രാൻസ്ഫോമറുകൾക്ക് കീഴിൽ നാളെ രാത്രി വരെ വൈദ്യുതി വിതരണം തടസ്സപ്പെടുമെന്ന് കെഎസ്ഇബി അറിയിച്ചു.