തെരുവിൽ കഴിഞ്ഞയാളുടെ ഭാണ്ഡത്തിൽ ഐ ഫോൺ; ഫോണിൽ ഉടമയുടേതെന്ന് കരുതുന്ന ചിത്രം തെളിഞ്ഞു

ഗുരുവായൂർ ∙ തെരുവിൽ കഴിയുന്ന മാനസിക വെല്ലുവിളി നേരിടുന്നയാളുടെ ഭാണ്ഡത്തിൽ ഐ ഫോൺ. ചാർജ് ചെയ്ത ഫോണിൽ ഉടമകളെന്നു തോന്നിക്കുന്ന നവദമ്പതികളുടെ ചിത്രം തെളി‍ഞ്ഞു. എന്നാൽ ഫോൺ എയ്റോപ്ലെയിൻ മോഡിൽ ആയതിനാൽ ഓപ്പൺ ചെയ്യാനോ കോൾ വിളിക്കാനോ കഴിയുന്നില്ല.

 അലഞ്ഞുതിരിയുന്നവരെ കണ്ടെത്തി കുളിപ്പിച്ച് ഭക്ഷണവും പുതുവസ്ത്രവും നൽകുന്ന തെരുവോരം മുരുകൻ എന്ന സാമൂഹിക പ്രവർത്തകനാണ് ഐ ഫോൺ ലഭിച്ചത്. ഇന്നലെ വൈകിട്ട് 4 ന് 40 വയസ്സോളം പ്രായമുള്ള കുംഭകോണം സ്വദേശിയെന്നു പറഞ്ഞ തമിഴ് സംസാരിക്കുന്ന വ്യക്തിയെ കുളിപ്പിച്ച് ഭാണ്ഡം പരിശോധിച്ചപ്പോഴാണ് ഫോൺ കണ്ടത്.  ഉപയോഗശൂന്യമായ ഫോൺ എന്നാണ് കരുതിയത്. വിലാസം ലഭിക്കുമോ എന്നറിയാൻ മുറിയിലെത്തി ചാർജ് ചെയ്തപ്പോഴാണ് ചിത്രം തെളിഞ്ഞത്.