കോഴിത്തോട്ടിൽ മലിനജലം, പരിസരവാസികൾക്ക് ദുരിതം

പാവറട്ടി ∙ കോഴിത്തോട്ടിൽ മലിനജലം കെട്ടി കിടന്ന് പരിസരവാസികൾക്ക് ദുരിതം. കഴിഞ്ഞ ദിവസങ്ങളിൽ പെയ്ത വേനൽ മഴയിലെ വെള്ളമാണ് ഒഴുക്കില്ലാതെ കെട്ടികിടക്കുന്നത്. മാലിന്യങ്ങൾ അഴുകിയും പുല്ല് ചീഞ്ഞും അസഹ്യമായ ദുർഗന്ധമാണ് പരിസരത്ത്. കൊതുക് ശല്യവും വർധിച്ചു. പാലം നിർമാണത്തിന്റെ ഭാഗമായി പുളിഞ്ചേരിപ്പടിയിൽ ഇട ബണ്ട് കെട്ടിയതു മൂലമാണ് തോട്ടിലെ ഒഴുക്ക് നിലച്ചത്. വിളക്കാട്ടുപാടം മുതൽ പുളിഞ്ചേരിപ്പടിവരെയാണ് വെള്ളം കെട്ടി കിടക്കുന്നത്. ഇടബണ്ട് കെട്ടുമ്പോൾ അടിയിൽ പൈപ്പുകൾ സ്ഥാപിക്കണമെന്ന് നാട്ടുകാർ ആവശ്യപ്പെട്ടിരുന്നെങ്കിലും ചെയ്യാതിരുന്നതിനാലാണ് ഒഴുക്ക് തടസപ്പെട്ടത്.