ചാലക്കുടിയിൽ 3 കോടിയുടെ നിരോധിത പുകയില ഉൽപന്നങ്ങൾ പിടികൂടി

ചാലക്കുടി ∙ ദേശീയപാതയിൽ പോട്ടയ്ക്കും പേരാമ്പ്രയ്ക്കും ഇടയിൽ  ഏകദേശം 3 കോടിയോളം വിലവരുന്ന പുകയില ഉൽപന്നങ്ങൾ പിടികൂടി. ഒരു ലോറി നിറയെ വിവിധയിനം നിരോധിത പുകയില ഉൽപന്നങ്ങളാണ് പൊലീസ് പിടികൂടിയത്. മഞ്ചേരി തറമണ്ണിൽ അബ്ദുൽ മനാഫിനെ (41) ഡിവൈഎസ്പി ബിജുകുമാർ, ഇൻസ്പെക്ടർ എം.കെ.സജീവ് എന്നിവരുടെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തു. ചുറ്റും ബിസ്കറ്റ് പെട്ടികൾ അടുക്കി അതിനകത്താണു ചാക്കുകളിലാക്കി പുകയില ഉൽപന്നങ്ങൾ ലോറിയിൽ നിറച്ചിരുന്നത്.

മംഗളൂരുവിൽ നിന്നു പെരുമ്പാവൂരിലേക്കു കൊണ്ടു പോവുകയായിരുന്നു ഇവയെന്നാണു പൊലീസ് നൽകുന്ന സൂചന. ഒരു ചാക്കിൽ 1500 പാക്കറ്റ് നിരോധിത പുകയില ഉൽപന്നങ്ങളാണ് ഉണ്ടായിരുന്നത്. ഇതര സംസ്ഥാന തൊഴിലാളികളെ കേന്ദ്രീകരിച്ചുള്ള വിൽപനയ്ക്കാണ് ഇവ കൊണ്ടുവന്നതെനാണ് സൂചന. ഒട്ടേറെ കേസുകളിലെ പ്രതിയാണു ഡ്രൈവർ മനാഫെന്ന് പൊലീസ് അറിയിച്ചു.