സബ് റജിസ്ട്രാർ ഓഫിസിലേക്കുള്ള വഴി അടച്ചു: ജനം വലയുന്നു

മാനന്തവാടി ∙ സബ് റജിസ്ട്രാർ ഓഫിസിലേക്കുള്ള വഴിയടച്ചതോടെ ഇടപാടുകാർ വലയുന്നു.  പുതിയ കെട്ടിട നിർമാണത്തിന്റെ പേരിലാണ് നിലവിൽ ഉപയോഗിച്ചിരുന്ന വഴി അടച്ചത്.  എന്നാൽ കോണിപ്പടിയുടെ ബലക്ഷയം കാരണമാണ് വഴി അടച്ചതെന്ന്  അധികൃതർ പറയുന്നു.  ഓഫിസിലേക്ക് കയറാൻ താൽക്കാലികമായി നിർമിച്ച കോണിപ്പടികൾക്ക് മുൻപിൽ ചുടുകട്ടകൾ അടുക്കി വച്ചാണ് വഴി അടച്ചത്.

സബ്  റജിസ്ട്രാർ ഓഫിസിലെത്തുന്ന ജനങ്ങളും  ആധാരമെഴുത്തുകാരും ചുറ്റി വളഞ്ഞ് മെഡിക്കൽ കോളജ് ആശുപത്രി റോഡ് വഴിയാണ് ഇപ്പോൾ സഞ്ചരിക്കുന്നത്. ഇവിടെ മെഡിക്കൽ കോളജിന്റെ പുതിയ ബഹുനിലക്കെട്ടിടം പണി നടക്കുന്നതിനാൽ പലപ്പോഴും ഗതാഗത തടസ്സവും പതിവാണ്. ഒരു വർഷത്തോളം ഓഫിസിലേക്ക് പ്രവേശിക്കുവാൻ ഉപയോഗിച്ച കോണി ബലപ്പെടുത്തുന്നതിന്  പകരം വഴി അടച്ചതിൽ പ്രതിഷേധവും ഉയരുന്നുണ്ട്.