പേ പിടിച്ച തെരുവുനായ വളർത്തുനായ്ക്കളെ കടിച്ചു; നാട്ടുകാർ ആശങ്കയിൽ

കരിങ്കുറ്റി ∙ പേ പിടിച്ച തെരുവുനായ ഒട്ടേറെ വളർത്തുനായ്ക്കളെ കടിച്ചത് നാട്ടുകാരെ ആശങ്കയിലാക്കി. കോട്ടത്തറ പഞ്ചായത്തിലെ മലന്തോട്ടം, നാടുകാണിക്കുന്ന് പ്രദേശത്ത് വ്യാഴാഴ്ച വൈകിട്ട് എത്തിയ നായ പല വീടുകളിലുമെത്തി കെട്ടിയിട്ട വളർത്തുനായ്ക്കളെ വരെ കടിച്ചു. നാട്ടുകാരിൽ പലരെയും ആക്രമിക്കാൻ ശ്രമിച്ചു. നാട്ടുകാർ പിടികൂടിയ നായയെ പരിശോധനയ്ക്കായി പൂക്കോട് വെറ്ററിനറി ആശുപത്രിയിൽ എത്തിച്ചു. പരിശോധനയിൽ പേവിഷബാധ സ്ഥിരീകരിച്ചു. കഴിഞ്ഞ ദിവസം കൽപറ്റ നഗരസഭാ പരിധിയിൽ 31 പേരെ കടിച്ച നായയ്ക്ക് പേവിഷബാധ സ്ഥിരീകരിച്ചിരുന്നു.