ഗോത്ര യുവതയെ പരീക്ഷയ്ക്ക് തയാറാക്കാൻ വനംവകുപ്പ്
Mail This Article
പുൽപള്ളി ∙ വനത്തിനുള്ളിലും വനത്തിനു സമീപത്തും കഴിയുന്ന ഗോത്ര ഉദ്യോഗാര്‍ഥികളെ മത്സര പരീക്ഷകളിൽ പ്രാപ്തരാക്കാൻ വനംവകുപ്പ് പ്രത്യേക പഠനക്ലാസുകൾ ആരംഭിച്ചു. ചെതലയം റേഞ്ച് പരിധിയിലെ ചേകാടിയിലും ചീയമ്പത്തുമാണു പഠന ക്ലാസുകൾ. ഗോത്രവിഭാഗക്കാര്‍ക്കായുള്ള പ്രത്യേക നിയമന പരീക്ഷകളിൽ നേട്ടമുണ്ടാക്കാനും അവർക്ക് ജോലി ഉറപ്പാക്കാനുമാണ് ഈ ശ്രമം. ഞായറാഴ്ചയാണ് പൊതു ക്ലാസ്. മറ്റുദിവസങ്ങളില്‍ ഓണ്‍ലൈന്‍ ക്ലാസുമുണ്ട്. വിവിധ വിഷയങ്ങളില്‍ വിദഗ്ദര്‍ ക്ലാസ് നയിക്കുന്നു.
പൊലീസ്, വനം, എക്സൈസ് വകുപ്പുകളില്‍ ഗോത്രവിഭാഗക്കാരായ യുവതീയുവാക്കള്‍ക്ക് നിയമനമുണ്ട്. ജില്ലയിലെ നൂറുകണക്കിനുപേര്‍ സേനകളില്‍ അംഗങ്ങളായി. വിവിധ കാരണങ്ങളാല്‍ പഠനം ഉപേക്ഷിച്ചവര്‍ക്കു പൊതുവി‍ജ്ഞാനത്തില്‍ കൂടുതല്‍ അറിവ് നേടാന്‍ ഈ ക്ലാസ് സഹായിക്കുന്നു. വിവിധ കോളനികളിലെ 50ല്‍ പരം ഉദ്യോഗാര്‍ഥികള്‍ ക്ലാസുകളില്‍ പങ്കെടുക്കുന്നു.
ചെതലയം റേഞ്ച് ഓഫിസര്‍ കെ.പി.അബ്ദുല്‍സമദ്, ഡപ്യൂട്ടി റേഞ്ച് ഓഫിസര്‍മാരായ കെ.ഐ.എം.ഇക്ബാല്‍, കെ.വി. ആനന്ദ്, ഫോറസ്റ്റര്‍ കെ.യു.മണികണ്ഠന്‍ എന്നിവരുടെ നേതൃത്വത്തിലാണു പഠനക്ലാസുകള്‍.
