അമ്പലവയൽ∙ സിപിഐ ഭരിക്കുന്ന വകുപ്പിന്റെ കീഴിലുള്ള  സ്ഥാപനത്തിനെതിരെ സിപിഐയുടെ നേതൃത്വത്തിൽ സമരം. അമ്പലവയൽ പ്രാദേശിക കാർഷിക ഗവേഷണ കേന്ദ്രത്തിനെതിരെയാണു സിപിഐ കഴിഞ്ഞ ദിവസം അനിശ്ചിതകാല സമരം ആരംഭിച്ചത്. കാർഷിക ഗവേഷണ കേന്ദ്രത്തിലെ അഴിമതി അന്വേഷിക്കുക, കേന്ദ്രം മേധാവി രാജിവയ്ക്കുക തുടങ്ങിയ ആവശ്യങ്ങളുന്നയിച്ചാണു സമരം.കാർഷിക മേഖലയിലെ ഗവേഷണങ്ങളിലൂടെ കർഷകർക്ക് സഹായകരമാകേണ്ട സ്ഥാപനത്തിൽ കാലങ്ങളായി ഗവേഷണം മാത്രം നടക്കുന്നില്ലെന്നും,  മറ്റു പ്രവർത്തനങ്ങളിലെല്ലാം വ്യാപക അഴിമതിയുണ്ടെന്നുമാണു സമരക്കാരുടെ ആക്ഷേപം. തെ‍ാഴിലാളി നിയമനം സംബന്ധിച്ചു ആരോപണങ്ങളുണ്ട്.  കാർഷിക കോളജിലെ താൽക്കാലിക നിയമനങ്ങളിലും സിപിഐ അഴിമതി ആരോപിക്കുന്നു.

അനിശ്ചിതകാല സമരം തുടരുന്നു

അമ്പലവയൽ ∙  തൊഴിൽ നിഷേധത്തിനെതിരെയും, ഫാമിലെ അഴിമതിയിൽ വിജിലൻസ് അന്വേഷണം ആവശ്യപ്പെട്ടും പ്രാദേശിക കാർഷിക ഗവേഷണ കേന്ദ്രത്തിന്റെ മുൻപിൽ ജനകീയ സമരസമിതിയുടെ നേതൃത്വത്തിൽ അനിശ്ചിതകാല സമരം തുടരുന്നു. എം.സി സുമേഷ്, വിൻസെന്റ് പുത്തട്ട്, അമൽ തുടങ്ങിയവർ നേതൃത്വം നൽകി. 

എഐവൈഎഫ് ധർണ നടത്തി

അമ്പലവയൽ ∙ പ്രാദേശിക കാർഷിക ഗവേഷണ കേന്ദ്രത്തിൽ ഉദ്യോഗാർഥികളെ അറിയിക്കാതെ രഹസ്യ ഇന്റർവ്യൂ നടത്തിയെന്ന് ആരോപിച്ച് എഐവൈഎഫ്  പ്രതിഷേധ ധർണ നടത്തി. കാർഷിക ഗവേഷണ കോളജിലെ 17 ഒഴിവുകളിലേക്കുള്ള ഇന്റർവ്യൂ ഉദ്യോഗാർഥികളെ അറിയിക്കാതെ ഉദ്യോഗസ്ഥർ രഹസ്യമായി നടത്തിയെന്നാണ് ആരോപണം. സിപിഐ ജില്ലാ എക്സിക്യൂട്ടീവ് അംഗം സി.എം സുധീഷ് ഉദ്ഘാടനം ചെയ്തു. അമൽ ശശി,  ഷിന്റോ താമരച്ചാലിൽ,  മുഹമ്മദ് മൊട്ടത്ത്, ഷൈജോ,  സതീഷ് കരടിപ്പാറ എന്നിവർ  പ്രസംഗിച്ചു.