മേപ്പാടി ∙ ചന്ദനമരങ്ങൾ മുറിച്ചു കടത്താൻ ശ്രമിച്ച കേസിൽ 3 പേർ കൂടി വനംവകുപ്പിന്റെ പിടിയിലായി. പുതുശ്ശേരിക്കടവ്‌ വെങ്ങണിക്കണ്ടി അഷ്റഫ്‌ (49), കാരയ്ക്കാമല വളപ്പിൽ സലാം (56), കാപ്പംകൊല്ലി കുടുമ്മാൻപറമ്പിൽ മുഹമ്മദ്‌കുട്ടി (59) എന്നിവരാണു പിടിയിലായത്‌. ഇതോടെ ഇതുവരെ കേസിൽ അറസ്‌റ്റിലായവരുടെ എണ്ണം ആറായി. അഷറഫ്‌ സ്ഥിരം ചന്ദനമോഷണക്കേസിലെ പ്രതിയാണെന്നു അധികൃതർ പറഞ്ഞു. കലക്ടറേറ്റ്‌, കേണിച്ചിറ പൊലീസ്‌ സ്‌റ്റേഷൻ പരിസരം എന്നിവിടങ്ങളിൽ നിന്നു ചന്ദനമരങ്ങൾ മുറിച്ചുകടത്തിയ കേസിലെ പ്രതിയാണ്‌. മാസങ്ങൾക്കു മുൻപു മേപ്പാടി ഫോറസ്റ്റ് റേഞ്ച്‌ പരിധിയിൽ നിന്ന് 5 ചന്ദനമരം മുറിച്ചുകടത്തിയതും അഷ്റഫിന്റെ നേതൃത്വത്തിലാണെന്ന്‌ അധികൃതർ പറഞ്ഞു. മുഹമ്മദ്‌കുട്ടി, സലാം എന്നിവർ ഇടനിലക്കാരാണ്‌. ഇവർ മുഖേനയാണ്‌ മുഖ്യവിൽപനക്കാരനായ അഷ്റഫുമായി ചന്ദനമോഷണസംഘം ബന്ധം സ്ഥാപിച്ചത്. ഇയാളിൽ നിന്നു വാൾ അടക്കമുള്ള ആയുധങ്ങളും ചന്ദനം കടത്താൻ ഉപയോഗിച്ച വാഹനവും കസ്‌റ്റഡിയിലെടുത്തു.