വേനൽ കനത്ത് വെള്ളം വറ്റി; മീൻപിടിത്തം തകൃതി

പനമരം∙ കാലവർഷത്തിൽ പുഴകൾ കരകവിഞ്ഞു വെള്ളം കയറി മൂടിയ കുളങ്ങളിലും തോടുകളിലും വേനൽ കനത്ത് വെള്ളം വറ്റി തുടങ്ങിയതോടെ മീൻപിടിത്തം തകൃതിയായി. വർഷങ്ങൾക്ക് മുൻപ് പ്രകൃതിയൊരുക്കിയ കുളങ്ങളിലും ഇഷ്ടിക നിർമാണത്തിന് മണ്ണെടുത്ത കുഴികളിലും ഇതിനോടു ചേർന്നുള്ള ചെറുതോടുകളിലുമാണ് മീൻപിടിത്തം തകൃതിയായി നടക്കുന്നത്. വെള്ളം കുറഞ്ഞു തുടങ്ങിയ കുളങ്ങളിലെ ബാക്കിയുള്ള വെള്ളം തേകിയും വലവീശിയും ചൂണ്ടയിട്ടും കുളം ഇളക്കിയുമാണ് മീൻപിടിക്കുന്നത്. ഒരു ടീം മീൻപിടിത്തം കുളത്തിൽ അവശേഷിക്കുന്ന മീനുകളെ എല്ലാം തന്നെ പിടിച്ചു പോയാലും ഇതറിയാതെ അടുത്ത ടീമും തുണിവലയും മറ്റുമായി കുളത്തിലിറങ്ങും.

മീൻപിടിക്കാൻ എത്തുന്നതിൽ ഏറെയും വിവിധ ഊരു നിവാസികളാണ്. പണിക്ക് പോകാത്ത സമയത്തെ ഒഴിവ് സമയങ്ങളിലാണ് കുടുംബത്തിലുള്ള കൊച്ചു കുട്ടികൾ അടക്കമാണ് മീൻപിടിത്തത്തിനായി ഇറങ്ങുന്നത്. ഇതിനോടകം മാത്തൂർ വയലിനും ചെറിയ പുഴയ്ക്കും ഇടയിലുള്ള ഇഷ്ടിക കളത്തിലെ വെള്ളക്കെട്ടിൽ പല തവണയായി ഒട്ടേറെ പേരാണ് മീൻ പിടിക്കാൻ എത്തിയത്.