ആറാം മൈൽ–മേൽമുറി റോഡ് നന്നാക്കാൻ നടപടിയില്ല

പൊഴുതന∙ ആറാം മൈൽ–മേൽമുറി റോഡ് തകർന്നു വർഷങ്ങളായിട്ടും നന്നാക്കാൻ നടപടിയില്ല. മിക്കയിടങ്ങളിലും വൻതോതിൽ കല്ലുകൾ ഇളകി. കുത്തനെ കയറ്റമുള്ള ഭാഗത്തേക്കുള്ള റോഡായതിനാൽ അപായസാധ്യതയേറി. ചിലയിടങ്ങളിൽ റോഡ് താഴ്ന്നു പോയിട്ടുമുണ്ട്. ഇതുവഴിയുള്ള യാത്ര കാരണം വാഹനങ്ങൾക്കു സാരമായ കേടുപാടുകളും പതിവാണെന്ന് ഈ റൂട്ടിൽ സർവീസ് നടത്തുന്ന വാഹനങ്ങളിലെ ഡ്രൈവർമാരും പറഞ്ഞു.

ഒട്ടേറെ കുടുംബങ്ങൾ ആശ്രയിക്കുന്ന ഈ റോഡ് നന്നാക്കണമെന്ന് പലതവണ ആവശ്യപ്പെട്ടിരുന്നെങ്കിലും അധികൃതർ നടപടിയെടുത്തില്ലെന്നു നാട്ടുകാർ പരാതിപ്പെട്ടു. എന്നാൽ, റോഡരികിൽ ഓവുചാൽ നിർമിക്കുന്നതിന് ജില്ലാ പഞ്ചായത്ത് 13.5 ലക്ഷം രൂപ വകയിരുത്തിയതായി അധികൃതർ പറഞ്ഞു. കുഴിയടയ്ക്കാൻ 15 ലക്ഷം രൂപ വകയിരുത്തിയിട്ടുണ്ടെന്ന് പഞ്ചായത്ത് അധികൃതരും അറിയിച്ചു.