മാനന്തവാടി ബസ് സ്റ്റാൻഡ് പരിസരത്ത് ഗതാഗതക്കുരുക്ക് രൂക്ഷമാകുന്നു

മാനന്തവാടി ∙ നഗരത്തിൽ ബസ് സ്റ്റാൻഡ് പരിസരത്ത് ഗതാഗതക്കുരുക്ക് രൂക്ഷമാകുന്നു. ബസ്‌ സ്റ്റാൻഡ് പരിസരം മുതൽ പൊലീസ് സ്റ്റേഷൻ വരെയുള്ള ഭാഗത്ത് ദിവസവും രാവിലെയും വൈകിട്ടും ട്രാഫിക് ബ്ലോക്ക് പതിവായി. ബസ് സ്റ്റാൻഡിലേക്ക് ബസുകൾ കയറുകയും ഇറങ്ങുകയും ചെയ്യുന്നത് കാരണം ഇവിടെ റോഡ് ബ്ലോക്ക് പതിവാണ്. 

ഇതിന് പുറമേ ഒരു നിയന്ത്രണവും ഇല്ലാതെ ഓട്ടോറിക്ഷകളും ടൂറിസ്റ്റ് ടാക്സികളും റോഡിന് ഇരു ഭാഗത്തും പാർക്ക് ചെയ്യുന്നുമുണ്ട്. കോടതി സമുച്ചയം, മിനി സിവിൽ സ്റ്റേഷൻ, താലൂക്ക് ഓഫിസ്, പൊലീസ് സ്റ്റേഷൻ, സബ് ട്രഷറി, ട്രൈബൽ ഓഫിസ്, വിമൻസ് ഹോസ്റ്റൽ തുടങ്ങിയ സർക്കാർ ഓഫിസുകൾ പ്രവർത്തിക്കുന്ന ഭാഗത്ത് നിരന്തരം ഉണ്ടാകുന്ന ഗതാഗതക്കുരുക്ക് ജനങ്ങളെ കുറച്ചൊന്നുമല്ല വലയ്ക്കുന്നത്.