ADVERTISEMENT

കേരളത്തിലെ സംരംഭകർ അഭിമുഖീകരിക്കുന്ന പ്രധാന പ്രശ്നങ്ങളിൽ മുഖ്യ സ്ഥാനത്തു നിൽക്കുന്നത് വിപണി (Market) കണ്ടെത്തലാണ്. വിപണി മികച്ചതല്ലെങ്കിൽ വിജയം അനിശ്ചിതത്വത്തിലാകും. ഈ സാഹചര്യത്തിലാണ്, കേരളത്തിലെ സംരംഭകരുടെ ഉൽപന്നങ്ങൾ വിറ്റഴിക്കാൻ സൗജന്യ സംവിധാനം സർക്കാർ ഒരുക്കിയത്. കേരള എസ്എംഇ പോർട്ടൽ വഴി കേരളത്തിലെ സംരംഭകരുടെ ഉൽപന്നങ്ങൾ ദേശീയ, രാജ്യാന്തര തലങ്ങളിലേക്കെത്തിക്കാനുള്ള സൗകര്യങ്ങളാണ് ഒരുക്കിയിരിക്കുന്നത്.

പോർട്ടലിന്റെ സവിശേഷതകൾ

∙കേരളത്തിലെ സൂക്ഷ്മ, ചെറുകിട, ഇടത്തരം സംരംഭങ്ങൾക്ക് ഓൺലൈൻ സംവിധാനം വഴി ‘B 2 B’ മാതൃകയിൽ വിനിമയം സാധ്യമാക്കാൻ സഹായിക്കുന്നു.

∙ദേശീയ, രാജ്യാന്തര രംഗങ്ങളിലെ ഉപയോക്താക്കൾക്കു േകരളത്തിൽ റജിസ്റ്റർ ചെയ്യപ്പെട്ട സംരംഭങ്ങളുമായി ബന്ധപ്പെടാൻ സഹായം. 

∙ഉൽപന്നങ്ങളുടെ വിവരങ്ങൾ, പ്രൊഫൈലുകൾ, കമ്പനി വിവരങ്ങൾ എന്നിവ പോർട്ടലിൽ ഉൾക്കൊള്ളിക്കാൻ കഴിയുന്നു.

∙റജിസ്റ്റർ ചെയ്യപ്പെട്ട സ്ഥാപനങ്ങൾക്കു പ്രത്യേക യൂസർ ഐഡിയും പാസ്‌വേഡും നൽകുന്നു.

∙സംരംഭങ്ങളുടെ മേഖല (Sector) ഉൽപന്നങ്ങൾ (Products) എന്നിവ ഇനം തിരിച്ചു ഡയറക്ടറി രൂപത്തിൽ ആക്കുന്നു.

∙തങ്ങളുടെ ഉൽപന്നങ്ങളുടെ അന്വേഷണം സംബന്ധിച്ച വിവരങ്ങൾ അപ്പപ്പോൾത്തന്നെ അറിയാൻ സംവിധാനം.

∙ഉൽപന്നങ്ങളുടെ ദേശീയ, രാജ്യാന്തര സ്ഥിതിയും വിൽപനയും സംബന്ധിച്ച ഡേറ്റ ലഭ്യമാക്കുന്നു.

∙വിപണി സാധ്യതകൾ തുറന്നു നൽകുന്ന ദേശീയ, രാജ്യാന്തര പ്രദർശനങ്ങൾ, മേളകൾ, ബിസിനസ് ടു ബിസിനസ് പരിപാടികൾ, മറ്റ് ഇവന്റുകൾ എന്നിവയുടെ വിശദ വിവരങ്ങൾ അതതു സമയത്തു ലഭ്യമാക്കുന്നു.

∙വ്യവസായ ഉപയോക്താക്കൾക്കു ബിസിനസ് സംബന്ധിച്ച വിവരങ്ങൾ നേരിട്ടു ലഭ്യമാക്കുന്നു.

ആർക്കാണ് അർഹത? 

∙കേരളത്തിൽ റജിസ്റ്റർ ചെയ്തു പ്രവർത്തിക്കുന്ന ഏതു സൂക്ഷ്മ, ചെറുകിട, ഇടത്തരം സംരംഭങ്ങൾക്കും പോർട്ടലിന്റെ സേവനത്തിന് അർഹതയുണ്ട്. അവർ ഉദ്യോഗ് ആധാർ മെമ്മോറാണ്ടം (UAM) എടുത്തിരിക്കേണ്ടതാണ്.

∙ഉൽപന്നത്തിന്റെ പേമെന്റ് നടത്താൻ പോർട്ടലിൽ സൗകര്യം ഉണ്ടാവില്ല. സംരംഭകർ സ്വന്തം ബാങ്ക് അക്കൗണ്ടുമായി ബന്ധപ്പെടുത്തി നേരിട്ടു നടത്തേണ്ടതായി വരും.

സംരംഭകർ ചെയ്യേണ്ടത്

∙www.keralasme.com/user/register എന്ന സൈറ്റിൽ നൽകിയിരിക്കുന്ന ഫോം പൂരിപ്പിച്ച് റജിസ്റ്റർ ചെയ്യാം. 

∙കമ്പനി വിവരങ്ങൾ, സർട്ടിഫിക്കേഷനുകൾ, അവാർഡുകൾ, ഉൽപന്നങ്ങളുടെ വിശദാംശങ്ങൾ, പേര്, വില, ഗുണനിലവാരം, സ്റ്റോക്ക്, യുണീക് പ്രോഡക്ട് നമ്പർ, ഉൽപന്നങ്ങളുടെ വിവരണം, നിറം, തൂക്കം, കാറ്റഗറി, ഫീച്ചേഡ് ഇമേജ്, പ്രോഡക്ട് ഇമേജ് എന്നിവ ആവശ്യാനുസരണം ഉൾപ്പെടുത്താം.

∙ഉൽപന്നം ആവശ്യപ്പെടുന്ന ഉപയോക്താവിന്റെ എല്ലാ വിവരങ്ങളും പോർട്ടലിൽ ലഭ്യമാകും. കസ്റ്റമറുടെ പേരുവിവരങ്ങൾ, കമ്പനി പ്രൊഫൈൽ, ഫോൺ നമ്പർ, മെയിൽ ഐഡി, തുടർ ബിസിനസ് സാധ്യതകൾ, ഓർഡർ സ്റ്റാറ്റസ് എന്നിവ എല്ലാ ലഭിക്കും.

∙കൂടുതൽ വിവരങ്ങൾക്ക് വ്യവസായ–വാണിജ്യ ഡയറക്ടറേറ്റ്, ജില്ലാ വ്യവസായ കേന്ദ്രങ്ങൾ, താലൂക്ക് വ്യവസായ ഓഫിസുകൾ, ബ്ലോക്ക് പഞ്ചായത്ത്/മുനിസിപ്പാലിറ്റി/കോർപറേഷൻ എന്നിവിടങ്ങളിലെ വ്യവസായ വികസന ഓഫിസർമാർ തുടങ്ങിയവരെ സമീപിക്കാം. 

(സംസ്ഥാന വ്യവസായ– വാണിജ്യ വകുപ്പ് ഡപ്യൂട്ടി ഡയറക്ടറാണു ടി. എസ്. ചന്ദ്രൻ)

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com