മുന്നാക്ക സംവരണം: അറിയണം ഈ കാര്യങ്ങൾ

സംസ്ഥാനത്ത് മുന്നാക്ക വിഭാഗങ്ങളിലെ പിന്നാക്കക്കാർക്ക് 10% സംവരണം നടപ്പാക്കുന്നതു സംബന്ധിച്ച മാനദണ്ഡങ്ങളും വ്യവസ്ഥകളും സർക്കാർ പ്രസിദ്ധീകരിച്ചു. 

12–02–2020നു പ്രസിദ്ധീകരിച്ച (സ.ഉ (എം.എസ്)നമ്പർ. 2/2020/ഉ.ഭ.പ.വ) ഉത്തരവിലാണ് ഇതു സംബന്ധിച്ച വിശദാശംങ്ങൾ ഉൾപ്പെടുത്തിയിരിക്കുന്നത്. 

മാനദണ്ഡങ്ങൾ ചുവടെ. 

1. അപേക്ഷകൻ പട്ടികജാതി, പട്ടികവർഗം, മറ്റു പിന്നാക്ക വിഭാഗങ്ങൾ എന്നീ സംവരണ വിഭാഗത്തിൽപെടാത്തവരായിരിക്കണം. 

2. അപേക്ഷകൻ/അപേക്ഷക, മാതാപിതാക്കൾ, 18 വയസ്സിൽ താഴെ പ്രായമുള്ള സഹോദരൻ/സഹോദരി, അപേക്ഷകൻ/അപേക്ഷകയുടെ പങ്കാളി, 18 വയസ്സിൽ താഴെയുള്ള കുട്ടികൾ, കുടുംബത്തെ ആശ്രയിച്ചു കഴിയുന്ന 18 വയസ്സിനു മുകളിലുള്ളവർ എന്നിവർ സാമ്പത്തിക സംവരണത്തിന് അർഹരായ ‘കുടുബം’ എന്ന നിർവചനത്തിൽപ്പെടുന്നു. കുട്ടികൾ എന്നതിൽ ദത്തെടുത്ത കുട്ടികളും ഉൾപ്പെടും.

3. അപേക്ഷകന്റെ കുടുംബ വാർഷിക വരുമാനം നാലു ലക്ഷം രൂപയോ അതിൽ താഴെയോ ആയിരിക്കണം. കുടുംബ വാർഷിക വരുമാനം കണക്കാക്കുമ്പോൾ ചുവടെ ചേർത്തിരിക്കുന്നവ ഒഴികെയുള്ള മറ്റെല്ലാ വരുമാനവും പരിഗണിക്കും.

∙മുനിസിപ്പാലിറ്റി/മുനിസിപ്പൽ കോർപറേഷൻ പ്രദേശങ്ങളിലെ പരിധി നിർണയിക്കപ്പെട്ടിട്ടുള്ള ഹൗസ് പ്ലോട്ടുകളിൽ നിന്നുള്ള കാർഷിക വരുമാനം ∙സാമൂഹിക സുരക്ഷാ പെൻഷനുകൾ 

∙കുടുംബ പെൻഷൻ 

∙തൊഴിലില്ലായ്മ വേതനം 

∙ഉത്സവബത്ത 

∙വിരമിക്കൽ ആനുകൂല്യങ്ങൾ 

∙യാത്രാബത്ത.

4. അപേക്ഷകന്റെ കുടുംബ ഭൂസ്വത്ത് ഗ്രാമപഞ്ചായത്ത് പ്രദേശങ്ങളിൽ 2.5 ഏക്കറിലും മുനിസിപ്പൽ പ്രദേശങ്ങളിൽ 75 സെന്റിലും മുനിസിപ്പൽ കോർപറേഷൻ പ്രദേശങ്ങളിൽ 50 സെന്റിലും അധികമാകാൻ പാടില്ല. 

5. ഗ്രാമപഞ്ചായത്ത് പ്രദേശങ്ങളിലും മുനിസിപ്പൽ അല്ലെങ്കിൽ മുനിസിപ്പൽ കോർപറേഷൻ പ്രദേശങ്ങളിലുമായി അപേക്ഷകന്റെ കുടുംബത്തിന് ഭൂസ്വത്ത് ഉണ്ടെങ്കിൽ അതിന്റെ ആകെ വിസ്തൃതി 2.5 ഏക്കറിൽ അധികമാകാൻ പാടില്ല. 

6. മുനിസിപ്പൽ പ്രദേശങ്ങളിലും മുനിസിപ്പൽ കോർപറേഷൻ പ്രദേശങ്ങളിലുമായി അപേക്ഷകന്റെ കുടുംബത്തിന് ഭൂസ്വത്ത് ഉണ്ടെങ്കിൽ അതിന്റെ ആകെ വിസ്തൃതി 75 സെന്റിൽ അധികമാകാൻ പാടില്ല. 

7. ഭൂവിസ്തൃതി കണക്കാക്കുന്നതിന് സംസ്ഥാനത്തിനകത്തും പുറത്തുമുള്ള ഭൂമി കണക്കിലെടുക്കുന്നതാണ്.

8. ഭൂമി (Land) എന്നതിൽ എല്ലാത്തരം ഭൂമിയും ഉൾപ്പെടും. 

9. കുടുംബത്തിന്റെ ഉടമസ്ഥതയിലുള്ള ആകെ ഹൗസ് പ്ലോട്ടിന്റെ വിസ്തൃതി മുനിസിപ്പൽ പ്രദേശങ്ങളിൽ 20 സെന്റിലും മുനിസിപ്പൽ കോർപറേഷൻ പ്രദേശങ്ങളിൽ 15 സെന്റിലും അധികരിക്കാൻ പാടില്ല.

∙കുടുംബത്തിന് ഒന്നിലധികം ഹൗസ് പ്ലോട്ട് കൈവശമുണ്ടെങ്കിൽ അവയെല്ലാം കൂട്ടിച്ചേർത്തായിരിക്കും പ്ലോട്ടിന്റെ വിസ്തൃതി കണക്കാക്കുക. 

∙കുടുംബത്തിന് മുനിസിപ്പൽ പ്രദേശങ്ങളിലും മുനിസിപ്പൽ കോർപറേഷൻ പ്രദേശങ്ങളിലും ഹൗസ് പ്ലോട്ട് ഉണ്ടെങ്കിൽ അവ കൂട്ടിച്ചേർത്ത് കണക്കാക്കിയാൽ വിസ്തൃതി 20 സെന്റിൽ അധികമാകാൻ പാടില്ല. 

∙ഹൗസ് പ്ലോട്ട് എന്നാൽ വീട് നിൽക്കുന്നതോ വിടു നിർമിക്കുവാൻ കഴിയുന്നതോ ആയ ഭൂമി എന്നാണ് അർഥമാക്കുന്നത്. 

10. Anthyodaya Annayajana (AAY)/Priority House Holds (PHH) വിഭാഗങ്ങളിൽ പെടുന്ന റേഷൻ കാർഡിൽ പേര് ഉൾപ്പെട്ടിട്ടുള്ളവർ മറ്റു മാനദണ്ഡങ്ങൾ പരിഗണിക്കാതെ തന്നെ സാമ്പത്തികമായി പിന്നാക്കം നിൽക്കുന്നവർക്കുള്ള സംവരണാനുകൂല്യത്തിന് അർഹരാണ്. ഈ വിഭാഗത്തിലുള്ള അപേക്ഷകർ ഇവർക്കായി നൽകിയിട്ടുള്ള റേഷൻ കാർഡിൽ ഉൾപ്പെട്ടിട്ടുണ്ട് എന്ന് നിശ്ചിത മാതൃകയിൽ വില്ലേജ് ഓഫിസർ നൽകുന്ന സർട്ടിഫിക്കറ്റ് ഹാജരാക്കണം. 

11. Income & Assets Certificate നൽകുന്നതിന് അപേക്ഷ സമർപ്പിക്കുന്ന വർഷത്തിന് തൊട്ടു മുൻപുള്ള സാമ്പത്തിക വർഷത്തെ വരുമാനമാണ് അടിസ്ഥാനമാക്കുന്നത്. 

12. കുടുംബത്തിന്റെ ഉടമസ്ഥതയിലുള്ള വസ്തുവകകളുടെ വിശദാംശങ്ങൾ നിശ്ചിത അപേക്ഷാ ഫോറത്തിൽ സത്യവാങ്മൂലമായി അപേക്ഷകർ സമർപ്പിക്കണം.

13. ‘സാമ്പത്തികമായി പിന്നാക്കം നിൽക്കുന്നവർ’ എന്ന അവകാശവാദം പരിശോധനയിൽ തെറ്റാണെന്നോ/വ്യാജമാണെന്നോ കണ്ടെത്തിയാൽ അപേക്ഷകൻ/അപേക്ഷകയുടെ നിയമനം/വിദ്യാഭ്യാസ സ്ഥാപനങ്ങളിലെ പ്രവേശനം എന്നിവ മറ്റു കാരണങ്ങൾ വ്യക്തമാക്കാതെ ഉടൻ പ്രബല്യത്തിൽ റദ്ദാക്കുന്നതും സർക്കാരിന് ഉചിതമെന്നു തോന്നുന്ന പ്രകാരമുള്ള തുടർനടപടിക്കു വിധേയമായിരിക്കുന്നതുമാണ്. 

14. സാമ്പത്തികമായി പിന്നാക്കം നിൽക്കുന്ന വിഭാഗങ്ങൾക്കുള്ള നിയമന ഉത്തരവിൽ നിയമനാധികാരികൾ ചുവടെ ചേർക്കുന്ന വ്യവസ്ഥകൂടി ഉൾപ്പെടുത്തണം. 

∙ഇപ്രകാരമുള്ള നിയമനം താൽക്കാലികം (Provisional) ആയിരിക്കുന്നതും വരുമാനവും ആസ്തിയും തെളിയിക്കുന്ന സാക്ഷ്യപത്രത്തിന്റെ ഉചിതമാർഗേണയുള്ള പരിശോധനയ്ക്കു വിധേയമായിരിക്കുന്നതുമാണ്. ‘സാമ്പത്തികമായി പിന്നാക്കം നിൽക്കുന്നവർ’ എന്ന അവകാശവാദം പരിശോധനയിൽ തെറ്റാണെന്നോ/വ്യാജമാണെന്നോ കണ്ടെത്തുന്ന പക്ഷം അപേക്ഷകൻ/അപേക്ഷകയുടെ നിയമനം മറ്റു കാരണങ്ങൾ വ്യക്തമാക്കാതെ ഉടൻ പ്രാബല്യത്തിൽ റദ്ദാക്കുന്നതും വ്യാജ സാക്ഷ്യപത്രം ഹാജരാക്കിയതിന് ഇന്ത്യൻ ശിക്ഷാനിയമപ്രകാരമുള്ള നടപടികൾ കൈക്കൊള്ളുന്നതുമാണ്. 

15. അപേക്ഷയുടെ അടിസ്ഥാനത്തിൽ നിശ്ചിത മാതൃകയിൽ Income & Assets Certificate നൽകേണ്ടത് അതത് വില്ലേജ് ഓഫിസർമാരാണ്.

16. സർട്ടിഫിക്കറ്റ് അനുവദിച്ചതിൽ ആക്ഷേപമുണ്ടെങ്കിൽ ബന്ധപ്പെട്ട തഹസിൽദാർക്ക് അപ്പീൽ നൽകാം.

17. പുനഃപരിശോധന ആവശ്യമായി വന്നാൽ ബന്ധപ്പെട്ട റവന്യൂ ഡിഷിനൽ ഓഫിസർക്ക് അപേക്ഷ നൽകാം.

18. പൊതുവിഭാഗത്തിലെ സാമ്പത്തികമായി പിന്നാക്കം നിൽക്കുന്നവരെ കണ്ടെത്തുന്നതിനുള്ള മാനദണ്ഡങ്ങൾ ഓരോ മൂന്നു വർഷം കൂടുമ്പോഴും പുനഃപരിശോധിക്കുന്നതും ആവശ്യമുണ്ടെങ്കിൽ ഭേദഗതി വരുത്തുന്നതുമായിരിക്കും. 

19. ന്യൂനപക്ഷ പദവി ഇല്ലാത്തതും മറ്റു പിന്നാക്ക വിഭാഗങ്ങൾക്കു സംവരണം അനുവദിച്ചു വരുന്നതുമായ സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങളിലെയും പ്രവേശനത്തിനു മുന്നാക്കക്കാരിലെ സാമ്പത്തികമായി പിന്നാക്കം നിൽക്കുന്നവർക്ക് 10% സംവരണം അനുവദിക്കുന്നതാണ്. സാമ്പത്തിക സംവരണം നടപ്പാക്കാൻ ഔദ്യോഗിക തലത്തിൽ സ്വീകരിക്കേണ്ട നിർദേശങ്ങളും ഉത്തരവിൽ ഉൾപ്പെടുത്തിയിട്ടുണ്ട്.