ചൈനയിൽ പഠിക്കുന്നവരുടെ പ്രശ്നം ചർച്ചയിലെന്ന് കേന്ദ്രം

ചൈനയി‍ൽ എംബിബിഎസ് പഠിക്കുന്നവരുടെ പ്രശ്നങ്ങൾ ആ രാജ്യവുമായി ചർച്ച ചെയ്യുന്നുണ്ടെന്ന് വിദേശകാര്യമന്ത്രാലയ വക്താവ് അരിന്ദം ഭാഗ്ചി പറഞ്ഞു. കോവിഡ് സ്ഥിതിഗതികൾ ഇന്ത്യയിൽ മെച്ചപ്പെടുന്നതിനനുസരിച്ച് വിവിധ രാജ്യങ്ങളുമായുള്ള യാത്രാ ബന്ധം പുനഃസ്ഥാപിക്കുന്നുണ്ട്. ഇന്ത്യക്കാരായ 24,000 എംബിബിഎസ് വിദ്യാർഥികൾ ചൈനയിൽ പഠിക്കുന്നുണ്ടെന്നും ഇവരുടെ പഠനം മുടങ്ങിയത് ചർച്ച ചെയ്യണമെന്നും ആവശ്യപ്പെട്ട് വി.കെ.ശ്രീകണ്ഠൻ ലോക്സഭയിൽ അടിയന്തരപ്രമേയ നോട്ടിസ് നൽകിയിരുന്നു. ചൈന ഏർപ്പെടുത്തിയ യാത്രാ വിലക്കുകൾ നീക്കാൻ സത്വര നടപടികൾ വേണമെന്നും ശ്രീകണ്ഠൻ ആവശ്യപ്പെട്ടിരുന്നു.