നീറ്റ് ഫലം വന്നു, ഇനിയെന്ത് ?

നാഷനൽ ടെസ്റ്റിങ് ഏജൻസി നീറ്റ്‌ യ‌ുജി ഫലം പ്രഖ്യാപിച്ചു (https://ntaneet.nic.in). 15.97 ലക്ഷം കുട്ടികൾക്കായി സെപ്റ്റംബർ 13ന് നടത്തിയ പരീക്ഷയിലെയും കോവിഡ് കാരണം അതിൽ പങ്കെടുക്കാനാകാതെ പോയവർക്കായി ഒക്ടോബർ 14ന് നടത്തിയ പരീക്ഷയിലെയും പ്രകടനം പരിഗണിച്ചാണു ഫലം തയാറാക്കിയത്. മുൻനിര സ്ഥാപനങ്ങളായ എയിംസ് ഇൻസ്റ്റിറ്റ്യൂട്ടുകളും പുതുച്ചേരി / കാരയ്ക്കൽ ജിപ്മെറും ആദ്യമായി നീറ്റ് കുടക്കീഴിലെത്തിയത് ഇത്തവണയാണ്. 

നീറ്റിൽ 50 പെർസെന്റൈൽ സ്കോറെങ്കിലും ഉണ്ടെങ്കിലേ പ്രവേശനത്തിന് അർഹതയുള്ളൂ. പട്ടിക, പിന്നാക്ക വിഭാഗക്കാർക്ക് 40 പെർസെന്റൈൽ മതി. ഭിന്നശേഷിക്കാർക്ക് 45 പെർസെന്റൈലും. ഈ റാങ്ക് ആധാരമാക്കിയാണ് ദേശീയതലത്തിൽ മെഡിക്കൽ, ഡെന്റൽ, ആയുഷ്, വെറ്ററിനറി ബാച്‍ലർ ബിരുദപ്രവേശനം. കേരളത്തിലെ ആയുർവേദ, ഹോമിയോ, സിദ്ധ, യൂനാനി, അഗ്രികൾചർ, വെറ്ററിനറി, ഫിഷറീസ്, ഫോറസ്ട്രി പ്രവേശനത്തിന്റെയും അടിസ്ഥാനം ഇതേ റാങ്കിങ് തന്നെ. ഇത്തവണ യോഗ്യത നേടുന്നതിനു വേണ്ട മാർക് നിലവാരം ഇങ്ങനെ:

ജനറൽ : 720 മുതൽ 147 വരെ

ഒബിസി :  146 – 113

പട്ടികജാതി : 146 – 113

പട്ടികവർഗം : 146 – 113

ജനറൽ, സാമ്പത്തിക പിന്നാക്കം, ഭിന്നശേഷി – 146–129

ഒബിസി ഭിന്നശേഷി : 128–113

പട്ടികജാതി ഭിന്നശേഷി : 128–113

പട്ടികവർഗം ഭിന്നശേഷി : 128–113

കേന്ദ്ര ആരോഗ്യമന്ത്രാലയത്തിന്റെ  നിയന്ത്രണത്തിലുള്ള മെഡിക്കൽ കൗൺസലിങ് കമ്മിറ്റി (www.mcc.nic.in) ദേശീയതലത്തിൽ എംബിബിഎസ് / ബിഡിഎസ് കൗൺസലിങ് നടത്തും. അതിൽ ഉൾപ്പെടുന്നവ:  ജമ്മു–കശ്മീർ / ലഡാക്ക് എന്നീ കേന്ദ്രഭരണപ്രദേശങ്ങൾ ഒഴികെയുള്ള എല്ലാ പ്രദേശങ്ങളിലെയും സർക്കാർ മെഡിക്കൽ / ഡെന്റൽ കോളജുകളിലെ 15% ഓൾ ഇന്ത്യ ക്വോട്ട.

∙ കൽപിത സർവകലാശാലകൾ, കേന്ദ്ര സർവകലാശാലകൾ (‍‍‍ഡൽഹി – ലേഡി ഹാർഡിഞ്ച്, യൂണിവേഴ്സിറ്റി കോളജ് ഓഫ് മെഡിക്കൽ സയൻസസ്, മൗലാന ആസാദ്) / ബനാറസ് ഹിന്ദു / അലിഗഡ് മുസ്‌ലിം), എഎഫ്എംസി പുണെ, എംപ്ലോയീസ് സ്റ്റേറ്റ് ഇൻഷുറൻസ് കോർപറേഷൻ കോളജുകൾ, വർധമാൻ മഹാവീർ ഡൽഹി, ജാമിയ മില്ലിയ (ഡെന്റൽ). എഐഐഎംഎസ്, ജിപ്മെർ എന്നിവ. 

നീറ്റ്: റാങ്ക് ലിസ്റ്റിന് രണ്ടാഴ്ച

കേരളത്തിലെ വിദ്യാർഥികളുടെ നീറ്റ് ഫലം സംബന്ധിച്ച വിശദാംശങ്ങൾ പ്രവേശന പരീക്ഷാ കമ്മിഷണർക്കു ലഭിക്കുന്ന മുറയ്ക്ക് അപേക്ഷകർക്ക് ഓൺലൈനായി റോൾ നമ്പർ നൽകി മാർക്ക് ഉറപ്പാക്കുന്നതിന് അവസരം ലഭിക്കും. ഈ നടപടി ക്രമങ്ങൾ പൂർത്തിയാക്കി റാങ്ക് ലിസ്റ്റിന് അന്തിമ രൂപം നൽകാൻ രണ്ടാഴ്ച എടുക്കും.അതിനു ശേഷം ഓപ്ഷൻ സ്വീകരിച്ചു മെഡിക്കൽ കോഴ്സുകളിലേക്കുള്ള അലോട്മെന്റ് നടപടികളിലേക്കു കടക്കുമെന്ന് അധികൃതർ അറിയിച്ചു.

ഫലം അറിയാൻ 

http://ntaresults.nic.in/NTARESULTS_CMS/public/home.aspx .

English Summary: NEET Result 2020