നീറ്റ്: യോഗ്യതയിൽ കേരളം നാലാമത്; വിജയത്തിൽ അഞ്ചാം സ്ഥാനം
Mail This Article
നീറ്റ് പരീക്ഷയിൽ ഇക്കുറി ആകെ പരീക്ഷയെഴുതിയ 13,66,945 പേരിൽ 7,71,500 പേർ റാങ്ക് പട്ടികയിൽ ഇടം നേടി. ജനറൽ വിഭാഗത്തിൽ 50 പെർസന്റൈൽ സ്കോർ നേടി റാങ്ക് പട്ടികയിൽ ഇടം പിടിച്ചത് 6,82,406 പേർ. സംസ്ഥാനം തിരിച്ചുള്ള എണ്ണത്തിൽ കേരളം നാലാമതാണ്. കഴിഞ്ഞ വർഷം മൂന്നാമതായിരുന്നു. യുപി (88,889), മഹാരാഷ്ട്ര (79,974), രാജസ്ഥാൻ (65,758) എന്നീ സംസ്ഥാനങ്ങളാണ് ആദ്യ സ്ഥാനത്തെത്തിയത്. 2018 ൽ യുപിക്കു പിന്നിൽ രണ്ടാം സ്ഥാനത്തായിരുന്നു കേരളം.
അതേസമയം, വിജയശതമാനത്തിൽ കേരളം അഞ്ചാമതാണ്: 63.94%. ഡൽഹി, ഹരിയാന, രാജസ്ഥാൻ, പഞ്ചാബ് എന്നീ സംസ്ഥാനങ്ങളാണു കേരളത്തിനു മുന്നിൽ. 147 മാർക്കു വരെ നേടിയവരാണു 50 പെർസന്റൈൽ നേടി ജനറൽ വിഭാഗത്തിൽ ലിസ്റ്റിൽ ഉൾപ്പെട്ടത്. ജനറൽ ഭിന്നശേഷി വിഭാഗത്തിൽ 129 മാർക്ക് വരെയുള്ളവർ ലിസ്റ്റിലുണ്ട് (45 പെർസന്റൈൽ), ഒബിസി, എസ്സി, എസ്ടി, ഇവ മൂന്നിന്റെയും ഭിന്നശേഷി വിഭാഗങ്ങൾ എന്നിവയിൽ 113 മാർക്ക് വരെ നേടിയവർ (40 പെർസന്റൈൽ) പട്ടികയിലുണ്ട്.
ആദ്യ അൻപതിൽ ഇവർ
∙ 22 ാം റാങ്ക് നേടിയ പാലക്കാട് നെന്മാറ സ്വദേശി എ. ലുലു അടിപ്പരണ്ട കെഎകെ മൻസിലിൽ അബ്ദുൽ ഖാദറിന്റെയും മെഹറുന്നിസയുടെയും മകളാണ്. 706 മാർക്ക് നേടിയാണു ലുലുവിന്റെ നേട്ടം.
∙ 50ാം റാങ്ക് നേടിയ ഫിലിമോൻ കുര്യാക്കോസ് തിരുവല്ല കറ്റോട് കുഴിപറമ്പിൽ കുര്യാക്കോസ് തോമസിന്റെയും
അമ്പിളി മത്തായിയുടെയും മകനാണ്.
∙ 25 റാങ്ക് നേടിയ സനിഷ് അഹമ്മദ് കോഴിക്കോട് വെള്ളിമാടുകുന്ന് പൈപ്പ് ലൈൻ റോഡ് സാനിമിസ്ന ഹൗസിൽ അഡ്വ: അഹമ്മദ് കോയയുടെയും സുനീറയുടെയും മകനാണ്.
കേരളം ഇങ്ങനെ 2019
∙ ആകെ റജിസ്റ്റർ ചെയ്തത്– 1,17,255
∙ പരീക്ഷയെഴുതിയത്– 1,10,206
∙ യോഗ്യത നേടിയത്– 73,385 (66.59%)
2020
∙ ആകെ റജിസ്റ്റർ ചെയ്തത്– 1,15,480
∙ പരീക്ഷയെഴുതിയത്– 92,911
∙ യോഗ്യത നേടിയത്– 59,404 (63.94%)
English Summary: NEET Result 2020 Kerala