കേരളയിൽ പഠിക്കാം പിജി ഡിപ്ലോമ കോഴ്സുകൾ; പ്രവേശനം എൻട്രൻസ് പരീക്ഷ വഴി

കേരള സർവകലാശാലയിലെ അക്കാദമിക വകുപ്പുകൾ നടത്തുന്ന ഏതാനും പ്രോഗ്രാമുകളിലേക്ക് 30 വരെ അപേക്ഷിക്കാം. പ്രവേശനം എൻട്രൻസ് പരീക്ഷ വഴി. വിശദവിവരങ്ങളും അപേക്ഷാഫോമും www.keralauniversity.ac.in എന്ന വെബ്‌സൈറ്റിൽ.

1) പിജി ഡിപ്ലോമ ഇൻ സൈക്കളോജിക്കൽ കൗൺസലിങ്: 12 മാസം. സൈക്കോളജിയുടെ നിർദിഷ്ട ശാഖകളിലൊന്നെങ്കിലും ഫുൾ പേപ്പറായി ബാച്‌ലർ ബിരുദം നേടിയവർക്ക് അപേക്ഷിക്കാം. കോഴ്സ് ഫീ 15,500 രൂപ. ഫോൺ: 9447221421

2) പിജി ഡിപ്ലോമ ഇൻ പേലിയോഗ്രഫി & കൺസർവേഷൻ ഓഫ് മാനുസ്ക്രിപ്റ്റ്സ്: താളിയോല ഗ്രന്ഥങ്ങളടക്കമുള്ള രേഖകളിലെ പഴയ കയ്യെഴുത്തു സംബന്ധിച്ച പഠനവും വിശകലനവും. ചരിത്രഗവേഷകർ, ഡിജിറ്റൽ ഹ്യുമാനിറ്റീസിൽ പ്രവർത്തിക്കുന്ന കംപ്യൂട്ടർ പ്രോഗ്രാമേഴ്സ്, പുരാരേഖകൾ പരിശോധിക്കേണ്ടിവരുന്ന അഭിഭാഷകർ, നരവംശശാസ്ത്രജ്ഞർ, ഭാഷാഗവേഷകർ തുടങ്ങി പലർക്കും പ്രാചീനഭാഷ, എഴുത്ത് മുതലായവയിലെ പഠനങ്ങൾ പ്രയോജനപ്പെടും. 

50% മാർക്കോടെ ഏതെങ്കിലും ബാച്‌ലർ ബിരുദമുള്ളവർക്ക് അപേക്ഷിക്കാം. പട്ടികവിഭാഗക്കാർക്ക് സർവകലാശാലാ നിയമപ്രകാരം മാർക്കിളവുണ്ട്. 2 സെമസ്റ്റർ. ട്യൂഷൻ ഫീ 5000 രൂപ. മറ്റു ഫീസ് പുറമേ. ഫോൺ: 9495700985