ജീവിതം സ്മാർട്ടാക്കാം ഇന്റർനെറ്റ് ഓഫ് തിങ്സിലൂടെ, വെല്ലുവിളികളെ അറിഞ്ഞ് സ്വീകരിക്കാം...

അറിവും അഴകും കുബുദ്ധിയും കൊണ്ട് കോടികൾ തട്ടിയെടുത്ത് ജീവിതം സെറ്റിൽ ചെയ്ത നാൽവർ സംഘത്തിന്റെ കഥ പറഞ്ഞ് 2020 പുറത്തിറങ്ങിയ തമിഴ് റൊമാന്റിക് കോമഡി ചിത്രമാണ് കണ്ണും കണ്ണും കൊള്ളയടിത്താൽ. ചെറുപ്പത്തിന്റെ ചോരത്തിളപ്പിൽ പെട്ടെന്നു പണക്കാരാകാൻ അവർ കാട്ടിക്കൂട്ടുന്ന വേലത്തരങ്ങൾ സാങ്കേതിക വിദ്യ എങ്ങനെ ദുരുപയോഗം ചെയ്തു കൂടാ എന്നതിന് ഉത്തമ ഉദാഹരണമാണ്. നൂതന സാങ്കേതിക വിദ്യയെ ദുരുപയോഗം ചെയ്ത് തട്ടിപ്പ് നടത്തുമ്പോഴൊക്കെ അവരെ തേടി നിയമത്തിന്റെ കൈകളെത്തുന്നുണ്ടെങ്കിലും തലനാരിഴയ്ക്ക് ഭാഗ്യം കൊണ്ടു മാത്രമാണ് അവർ പലപ്പോഴും രക്ഷപ്പെടുന്നത്.

നൂതന സാങ്കേതിക വിദ്യ എത്രത്തോളം മനുഷ്യജീവിതത്തെ എളുപ്പമാക്കുന്നുണ്ടെന്ന് ആ ചിത്രം പലപ്പോഴും കാട്ടിത്തരുന്നുണ്ട്. അതിലെ കഥാപാത്രങ്ങളെപ്പോലെ സാങ്കേതിക വിദ്യ ദുരുപയോഗം ചെയ്യാൻ ശ്രമിക്കാതെ അതിന്റെ പോസിറ്റീവ് വശങ്ങൾ മാത്രം ജീവിതത്തിലേക്ക് പകർത്താൻ ശ്രമിക്കാം. അതിന്റെ പ്രാരംഭ നടപടിയായി ഇന്റർനെറ്റ് ഓഫ് തിങ്സിനെക്കുറിച്ച് ആധികാരികമായി പഠിക്കാം. ജീവിതത്തെ കുറച്ചു കൂടി എളുപ്പമുള്ളതാക്കാനും സൗകര്യപ്രദമാക്കാനും ഇന്റർനെറ്റ് ഓഫ് തിങ്സിന്റെ സേവനം തീർച്ചയായും പ്രയോജനപ്പെടുത്താം.

ഇന്റർനെറ്റ് ഓഫ് തിങ്സ്: കണക്റ്റഡ് ജീവിതവും ലോക വളർച്ചയും

ഇന്റര്‍നെറ്റ് നമ്മുടെ ജീവിതത്തിന്റെ അവിഭാജ്യ ഘടകമായിരിക്കുകയാണല്ലോ. എണ്ണിയാലൊടുങ്ങാത്ത തരത്തില്‍ മനുഷ്യ ജീവിതത്തിലെ എല്ലാ മേഖലകളിലും ഇന്റര്‍നെറ്റിന്റെ സേവനം ഇന്ന് ഉപയോഗപ്പെടുത്തുന്നു. മെഷീൻ ടു മെഷീൻ, മെഷീൻ ടു ഇൻഫ്രാസ്ട്രക്ചർ, മെഷീൻ ടു എൻവയൺമെന്റ് തുടങ്ങിയ സാങ്കേതികവിദ്യകൾ ഉപയോഗിച്ച്, മനുഷ്യന്റെ ഇടപെടൽ കഴിയുന്നത്ര കുറച്ചുള്ള പ്രവർത്തനങ്ങളാണ് ഐഒടി ലക്ഷ്യമിടുന്നത്. വ്യത്യസ്ത ഉപകരണങ്ങൾ പരസ്പരം ബന്ധിപ്പിച്ചു കൊണ്ട് അവയ്ക്കിടയിൽ വിവര കൈമാറ്റം സാധ്യമാക്കിയിട്ടുള്ള ശൃംഖലയാണ് ഐഒടി അഥവാ ഇന്റർനെറ്റ് ഓഫ് തിങ്‌സ്. ഇന്റർനെറ്റുമായി കണക്റ്റു ചെയ്യപ്പെട്ടിരിക്കുന്ന ദശലക്ഷക്കണക്കിന് സ്മാർട്ട് ഉപകരണങ്ങളുടെയും സെൻസറുകളുടെയും ശൃംഖലയാണത്. ആളുകളുടെയും വസ്തുക്കളുടെയും ഇടയിൽ പുതിയ ആശയവിനിമയം സാധ്യമാക്കി അതുവഴി നമ്മുടെ ജീവിതം വളരെ എളുപ്പവും സുരക്ഷിതവുമാക്കാനും ഇത് സഹായകരമാവുന്നു.

ഇന്ത്യയിലെ ഐഒടി ഇക്കോ സിസ്റ്റം

ഇന്റർനെറ്റ് ഓഫ് തിങ്സ് സാങ്കേതികവിദ്യയിലേക്കു മിക്ക കമ്പനികളും തങ്ങളുടെ ഉൽപന്നങ്ങളെ മാറ്റിക്കഴിഞ്ഞു. അതിനാൽ ഇന്റർനെറ്റ് കണക്റ്റു ചെയ്‌ത ഉപകരണങ്ങളുടെ എണ്ണം ഗണ്യമായി വർധിച്ചുകൊണ്ടിരിക്കുന്നു. ഐഒടിയിലും അതിന്റെ വിന്യാസം, മാനേജ്മെന്റ്, സുരക്ഷ തുടങ്ങിയവയിലുമുള്ള അറിവുള്ളവർക്ക് പുതിയ തൊഴിൽ സാധ്യതകൾ തുറക്കുന്നുമുണ്ട്. ഡിജിറ്റൽ സാക്ഷരത ഉറപ്പുവരുത്തി ഇന്ത്യയെ ഡിജിറ്റലായി ശാക്തീകരിക്കപ്പെട്ട സമൂഹമാക്കി മാറ്റുക എന്ന ലക്ഷ്യത്തോടെ പ്രവർത്തിക്കുന്ന സർക്കാർ പദ്ധതിയാണ് ഡിജിറ്റൽ ഇന്ത്യ.

വ്യാവസായിക വികസനത്തിന് ഐഒടി ആക്കം നൽകുന്നു. രാജ്യത്തുടനീളം ഡിജിറ്റൽ ഇൻഫ്രാസ്ട്രക്ചർ സ്ഥാപിക്കുന്നതിന് സ്മാർട്ട് സിറ്റിക്കും ഡിജിറ്റൽ ഇന്ത്യ പ്രോഗ്രാമിനും കീഴിൽ പ്രവർത്തിക്കുന്ന നിരവധി സംരംഭങ്ങൾ ഐഒടി ബിസിനസിന്റെ വളർച്ചയെ സഹായിക്കുന്നു. പൗരന്മാരും ഗവൺമെന്റും ഒക്കെയാണ് ഇന്റർനെറ്റ് ഓഫ് തിങ്സ് ശ്രമങ്ങളിൽ പ്രാഥമിക ഘടകങ്ങൾ. ഇവയെല്ലാം ശരിയായ തലത്തിൽ സഹകരിക്കേണ്ടത് ഐഒടി വളർച്ചയ്ക്ക് നിർണായകമാണ്. മറ്റു രാജ്യങ്ങളെക്കാൾ വളരെ വൈകിയാണ് ഐഒടി ആരംഭിച്ചതെങ്കിലും ഇന്ത്യ ഈ മേഖലയിൽ മികച്ച രീതിയിൽ വികസിക്കാനിടായി.

ഹാർഡ്‌വെയർ, ആപ്ലിക്കേഷൻ വെണ്ടർമാർ, നെറ്റ്‌വർക്ക് ഓപ്പറേറ്റർമാർ, സിസ്റ്റം ഇന്റഗ്രേറ്റർമാർ എന്നിവയെല്ലാം ഉൾക്കൊള്ളുന്നതാണ് ഇന്ത്യൻ ഐഒടി ഇക്കോസിസ്റ്റം. സാങ്കേതികവിദ്യയുടെ പ്രയോജനങ്ങൾ വിവിധ മേഖലകളിൽ പ്രയോജനപ്പെടുത്തുന്നതിന് ഇന്ത്യൻ സർക്കാർ നിരവധി നയങ്ങളും സ്വീകരിച്ചിട്ടുണ്ട്. ബിസിനസ് തന്ത്രങ്ങൾ വികസിപ്പിക്കുന്നതിന് നിരവധി ഇന്ത്യൻ സ്റ്റാർട്ടപ്പുകളും ഈ സാങ്കേതികവിദ്യകൾ പ്രയോജനപ്പെടുത്തുന്നു. ആരോഗ്യം, ഗതാഗതം, കൃഷി തുടങ്ങിയ മേഖലകളിലും ഇത് ഉപയോഗിക്കപ്പെടുന്നു.

സിവിലിയൻ മുതൽ പ്രതിരോധം വരെ വ്യാപിച്ചുകിടക്കുന്ന വിവിധ ആപ്ലിക്കേഷൻ ഡൊമെയ്നുകൾ ഐഒടി യിൽ ഉൾപ്പെടുന്നു. ഈ മേഖലയിൽ‌ യോഗ്യതയുള്ള വ്യക്തികൾക്ക് ഉയർന്ന ജോലിസാധ്യതയും ഇതു മുന്നോട്ടുവയ്ക്കുന്നു. രാജ്യത്ത് ഡിജിറ്റൽ ഇൻഫ്രാസ്ട്രക്ചർ സജ്ജീകരിക്കുന്നതിനുള്ള സ്മാർട്ട് സിറ്റി എന്ന ആശയത്തിനും ഡിജിറ്റൽ ഇന്ത്യ പ്രോഗ്രാമിനും കീഴിൽ നടപ്പിലാക്കാൻ ഉദ്ദേശിക്കുന്ന വിവിധ സംരംഭങ്ങൾ ഐഒടി വ്യവസായത്തെ ഉത്തേജിപ്പിക്കാൻ സഹായിക്കുന്നു. 

നമ്മുടെ നഗരങ്ങളെ സ്‌മാർട്ടാക്കുന്നതിൽ ഐഒടി വളരെ വലിയ പങ്ക് വഹിക്കുന്നു. ഈ നഗരങ്ങളിൽ പാർക്കിങ്, ഇന്റലിജന്റ് ട്രാൻസ്പോർട്ട് സിസ്റ്റം, ടെലി-കെയർ, സ്ത്രീ സുരക്ഷ, സ്മാർട്ട് ഗ്രിഡുകൾ, സ്മാർട്ട് അർബൻ ലൈറ്റിങ്, മാലിന്യ സംസ്കരണം, സ്മാർട്ട് സിറ്റി മെയിന്റനൻസ്, ഡിജിറ്റൽ സൈനേജ്, ശുദ്ധജല വിതരണം തുടങ്ങിയ ഒട്ടേറെ കാര്യങ്ങൾ നിയന്ത്രിക്കുക ഐഒടി സാങ്കേതികവിദ്യ ഉപയോഗിച്ചായിരിക്കും.

ഐഒടി: വളർച്ചയും വെല്ലുവിളികളും

ഒരു സാങ്കേതികവിദ്യ എന്ന നിലയിൽ ഐഒടി കുറച്ചുകാലമായി പക്വത പ്രാപിക്കുകയും ഇന്ത്യയിൽ തുടർച്ചയായ വളർച്ചയ്ക്ക് തയാറെടുക്കുകയും ചെയ്യുന്നു. കൃഷി, നിർമ്മാണം, ഇൻഫ്രാസ്ട്രക്ചർ തുടങ്ങിയ മേഖലകൾ ഐഒടി യുടെ വളർച്ചയ്ക്ക് അനുകൂലമാണ്. ഉപഭോക്തൃ അനുഭവം മെച്ചപ്പെടുത്തുന്നതിനായി ഉപഭോക്തൃ ഉൽപ്പന്ന വ്യവസായത്തിലും ഐഒടി ഉപയോഗിക്കുന്നു. ഗവൺമെന്റ് നയങ്ങളും ഇടപെടലുകളും ഐഒടിയുടെ സ്വീകാര്യത കൂടുതൽ ത്വരിതപ്പെടുത്താൻ സഹായിക്കും. ഇന്ത്യൻ സാഹചര്യങ്ങളിൽ ഐഒടി സിസ്റ്റങ്ങൾ തടസ്സമില്ലാതെ പ്രവർത്തിക്കുന്നതിന് പ്രാദേശികവൽക്കരണത്തിന്റെ ആവശ്യകത ഉറപ്പാക്കാൻ ഗവേഷണം വേണം.

എന്റർപ്രൈസ് മൂല്യ ശൃംഖലയിൽ ഐഒടി സിസ്റ്റത്തിന്റെ ക്വാളിറ്റി അനുസരിച്ചുള്ള ഒരു ടാലന്റ് പൂൾ സൃഷ്ടിക്കാനും ഈ ടൈ-അപ്പ് സഹായിക്കും. ഡിജിറ്റൽ ഇന്ത്യ, നാഷണൽ സ്‌കിൽസ് ഡെവലപ്‌മെന്റ് മിഷൻ ഓഫ് ഇന്ത്യ, STEM (Science, technology, engineering, and mathematics) വിദ്യാഭ്യാസം എന്നിവയിൽ ശ്രദ്ധ കേന്ദ്രീകരിച്ചുകൊണ്ട്, ഈ വെല്ലുവിളികളിൽ പലതും തരണം ചെയ്യാൻ നമ്മുടെ ഗവണ്മെന്റ് നമ്മളെ സഹായിക്കുന്നുണ്ട്. ഐഒടി സാങ്കേതികവിദ്യകൾ വമ്പിച്ച വളർച്ചാ അവസരങ്ങൾ വാഗ്ദാനം ചെയ്യുകയും ഇന്ത്യയെ ഒരു ഐഒടി പവർഹൗസായി മാറുന്നതിനുള്ള വേദിയൊരുക്കുകയും ചെയ്യുന്നു.

നമ്മുടെ നാടിനെ ജീവിക്കാനുള്ള മികച്ച സ്ഥലമാക്കി മാറ്റുന്നതിന് മൈക്രോസോഫ്റ്റുമായി ചേർന്ന് പ്രവർത്തിക്കുന്ന ഇന്ത്യയിൽ നിന്നുള്ള ചുരുക്കം ചില സ്ഥാപനങ്ങളിലൊന്നാണ് ഐഐഐടി കോട്ടയം. ജർമനിയിലെ ടെക്‌നിഷ് യൂണിവേഴ്‌സിറ്റേറ്റ് മ്യൂണിക് (TUM) ന്റെ സഹകരണത്തോടെ യുജി വിദ്യാർഥികൾക്കായി പ്രത്യേകം കോഴ്‌സുകളും നൽകുന്നുണ്ട്.അതായത്, എല്ലാ വർഷവും ഐഐഐടിയിലെ അധ്യാപകർ TUM ജർമ്മനിയിൽ ക്രെഡിറ്റ് കോഴ്‌സുകൾ ചെയ്യുകയും, ജർമൻ പ്രഫസർമാർ ഐഐഐടിയിൽ ക്രെഡിറ്റ് കോഴ്‌സുകളിൽ ഏർപ്പെടുകയും ചെയ്യുന്നു. ഓസ്ട്രിയയിലെ ക്ലാഗൻഫർട്ട് സർവകലാശാല, ജർമ്മനിയിലെ ഫോക്‌സ്‌വാഗൺ ഫൗണ്ടേഷൻ, യൂണിവേഴ്‌സിറ്റി ഓഫ് ന്യൂ ബ്രൺസ്‌വിക്ക് (യുഎൻബി) കാനഡ എന്നിവയും ഐഐഐടി കോട്ടയത്തിന്റെ രാജ്യാന്തര അധ്യാപന-പഠന സഹകരണ പങ്കാളികളാണ്.

ഇന്റലിജന്റ് സിസ്റ്റംസ്

സഹകരണത്തിനായുള്ള ഇന്റർനെറ്റ് ഓഫ് തിങ്സ് (IoT), യുകെയിലെ ഗ്ലാസ്‌ഗോ സർവകലാശാല. യുണൈറ്റഡ് കിങ്ഡവും ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്‌നോളജിയും (IIIT കോട്ടയം) ഇന്ത്യയും ചേർന്ന് ആരംഭിച്ച ഇന്റലിജന്റ് സിസ്റ്റങ്ങൾക്കായുള്ള ഇന്റർനെറ്റ് ഓഫ് തിങ്സ് (IoT), ഭാവിയിൽ ഐഒടിയുടെ വികസനത്തിനും പുരോഗതിക്കും വഴിയൊരുക്കുന്നു. സാങ്കേതിക വികസനം, ആർട്ടിഫിഷ്യൽ ഇന്റലിജൻസ്, ഡാറ്റ സയൻസ്, മെഷീൻ ലേണിങ്, സൈബർ സുരക്ഷ എന്നിങ്ങനെ വിപുലമായ ഗവേഷണ പ്രവർത്തനങ്ങൾക്ക് ഐഐഐടി കോട്ടയം നേതൃത്വം നൽകുന്നു. അടൽ ഇൻകുബേഷൻ സെന്റർ (എഐസി) - ഐഐഐടി കോട്ടയം സംയുക്തമായി ഐഒടി ക്ലൗഡ് സൊസൈറ്റിയിൽ ശ്രദ്ധ കേന്ദ്രീകരിക്കുന്നതിനായി കാമ്പസിൽ ഐഒടി-നിർദിഷ്ട ഗവേഷണ വകുപ്പ് വികസിപ്പിച്ചിരിക്കുന്നു. ലോകത്തിന്റെ മുൻപോട്ടുള്ള യാത്രയിൽ ഐഒടി എന്നത് ഒഴിച്ചുകൂടാനാകാത്ത ഒന്നായി ഇന്ന് മാറിയിരിക്കുന്നു.

(ലേഖകൻ ഡോ. രാഗേഷ് ജി.കെ, അസിസ്റ്റന്റ് പ്രഫസർ, ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി കോട്ടയം. ആശയങ്ങൾ വ്യക്തിപരം )

Content Summary : IoT can make your life easier