sections
MORE

പുതു വര്‍ഷത്തില്‍ കുറിക്കാം പുതിയ കരിയര്‍ ലക്ഷ്യങ്ങള്‍

career
SHARE

പുതു വര്‍ഷം എപ്പോഴും പുതിയ തുടക്കങ്ങളുടെയും മാറ്റത്തിന്റെയുമൊക്കെയാണ്. പുതിയ ലക്ഷ്യങ്ങള്‍ നിര്‍ണ്ണയിച്ച് മുന്നോട്ട് പോകാനും ഇതാണ് പറ്റിയ സമയം. പുതുതായി ജോലി തേടുന്നവര്‍ക്കും കരിയറില്‍ മാറ്റങ്ങള്‍ ആഗ്രഹിക്കുന്നുവര്‍ക്കും പുതുവര്‍ഷത്തില്‍ നേടാന്‍ കാര്യങ്ങള്‍ ഏറെ. ഒരു വര്‍ഷത്തിലെ ഏറ്റവും തിരക്കിട്ട തൊഴില്‍ തിരയല്‍ മാസവും ജനുവരിയാണ്.  

ഒരാള്‍ തന്റെ കരിയറില്‍ ശരാശരി 10 മുതല്‍ 15 വരെ തവണ തൊഴിലിടം മാറുമെന്നാണ് കണക്ക്. മുന്‍കാലഘട്ടങ്ങളില്‍ നിന്ന് വ്യത്യസ്തമായി പലരും ഇഷ്ടമില്ലാത്ത ജോലിയിലും തൊഴിലിടങ്ങളിലും ഇന്ന് കടിച്ചു തൂങ്ങാറില്ല. 2019ല്‍ പുതിയ കരിയര്‍ മേച്ചില്‍പ്പുറങ്ങള്‍ തേടുന്നവര്‍ക്കും പുതിയ ലക്ഷ്യങ്ങള്‍ കുറിക്കാന്‍ തയ്യാറെടുക്കുന്നവര്‍ക്കും താഴെ പറയുന്ന കാര്യങ്ങള്‍ ശ്രദ്ധിക്കാം.

നിങ്ങളുടെ കഴിവുകളുടെ പട്ടിക തയ്യാറാക്കുക
നിങ്ങളുടെ ജോലിയും വോളന്റിയറിങ് പ്രവര്‍ത്തനവും പഠനേതര പ്രവര്‍ത്തനങ്ങളും അക്കാദമിക ചരിത്രവുമെല്ലാം ഒരിക്കല്‍ കൂടി അവലോകനം ചെയ്യുക. നിങ്ങള്‍ക്ക് ആസ്വാദ്യകരമായി തോന്നിയ മുന്‍കാല തൊഴിലുകള്‍ ഏതൊക്കെയായിരുന്നു എന്നും എന്തു കാര്യമാണു നാളിതു വരെ ആസ്വദിച്ചു ചെയ്തതെന്നും കണ്ടെത്തുക. അതുമായി ബന്ധപ്പെട്ടു നിങ്ങള്‍ വളര്‍ത്തിയ നൈപുണ്യങ്ങള്‍ ഏതൊക്കെയെന്നതിനെ കുറിച്ചൊരു പട്ടിക തയ്യാറാക്കുക. ഉദാഹരണത്തിനു നന്നായി എഴുതാനുള്ള ശേഷി, ആശയവിനിമയ പാടവം, നേതൃത്വശേഷി, വിപണന ശേഷി എന്നിങ്ങനെ നൈപുണ്യങ്ങളുടെ പട്ടിക തയ്യാറാക്കണം. അതിനു ശേഷം ഇവയില്‍ ഏതൊക്കെ നൈപുണ്യങ്ങളെയാണു പുതിയ കരിയറില്‍ നിങ്ങള്‍ ഉപയോഗപ്പെടുത്താന്‍ പോകുന്നതെന്നു തീരുമാനിക്കണം. 

കരിയര്‍ ഗവേഷണം
കരിയറിനെ പറ്റി എത്ര കൂടുതല്‍ ഗവേഷണം നടത്തുന്നോ തീരുമാനങ്ങളെടുക്കാനും കരിയര്‍ ലക്ഷ്യങ്ങള്‍ കുറിക്കാനും അത്രയും എളുപ്പമാകും. വെബ്‌സൈറ്റുകള്‍ വഴിയോ, പുസ്തകങ്ങളും മാസികകളും വഴിയോ ഒക്കെ താത്പര്യമുള്ള കരിയറുകളെ കുറിച്ചു വായിച്ചു തുടങ്ങുക. ആരോ ആഴ്ചയും ഗവേഷണം നടത്താന്‍ പുതിയ രണ്ടു കരിയര്‍ കണ്ടെത്തി അവയെ കുറിച്ചുള്ള വിവരങ്ങള്‍ കുറിച്ചു വയ്ക്കുക. നിങ്ങളുടെ നൈപുണ്യ പട്ടികയും ഈ കരിയറുകളും തമ്മില്‍ തുലനം ചെയ്യുക. നിങ്ങളുടെ ഇഷ്ടവും നൈപുണ്യങ്ങളുമായി ശരിക്കും പൊരുത്തപ്പെടുന്ന കരിയറുകളെ പറ്റി ഗവേഷണം നടത്താന്‍ പുതിയ ചോദ്യങ്ങള്‍ കണ്ടെത്തുക. ആ ചോദ്യങ്ങള്‍ക്കുള്ള ഉത്തരം കണ്ടെത്തി കഴിയുമ്പോഴേക്കും അവ നമുക്കു ശരിക്കും അനുയോജ്യമായ കരിയറാണോ എന്നൊരു ഏകദേശ ധാരണ ലഭിക്കും. 

സുഹൃത്തുക്കള്‍ എന്തു ചെയ്യുന്നു
സാമൂഹിക മാധ്യമങ്ങളുടെ യുഗത്തില്‍ കൂട്ടുകാര്‍ക്കും നെറ്റ് വര്‍ക്കിങ്ങിനുമൊന്നും യാതൊരു ബുദ്ധിമുട്ടുമില്ല. കൂട്ടുകാരുടെ ഇടയില്‍ നിങ്ങള്‍ക്കു താത്പര്യമുള്ള ജോലി ചെയ്യുന്നവരെ കണ്ടെത്തുക. അവരുടെ തൊഴില്‍ ജീവിതം എപ്രകാരമെന്നു ചോദിച്ചു മനസ്സിലാക്കുക. നിങ്ങളുടെ കഴിവുകളുടെ പട്ടിക അവരുമായി പങ്കുവച്ചു വിവിധ കരിയര്‍ സാധ്യതകള്‍ കണ്ടെത്താന്‍ സഹായം തേടുക. നിങ്ങള്‍ക്കു താത്പര്യമുള്ള മേഖലയിലെ വ്യക്തികളുമായി കൂടിക്കാഴ്ച നടത്താനും ഈ സുഹൃത്തുക്കള്‍ വഴി സാധിക്കും. 

ജോബ് ഷാഡോയിങ്
ജോബ് ഷാഡോയിങ്ങ് നമ്മുടെ നാട്ടില്‍ അത്ര പ്രചാരമില്ല. എന്നാല്‍ വിദേശത്തൊക്കെ സര്‍വ സാധാരണമാണ്. ഒരു പ്രത്യേക ജോലിയില്‍ താത്പര്യമുള്ള വിദ്യാർഥികള്‍ അതു ചെയ്യുന്ന പ്രഫഷണലിനൊപ്പം ഒന്നോ രണ്ടോ ദിവസം അവരുടെ ഓഫീസില്‍ സമയം ചെലവിട്ട് ആ ജോലിയെ കുറിച്ചു നേരിട്ടു കണ്ടറിഞ്ഞു പഠിക്കുന്നതിനെയാണു ജോബ് ഷാഡോയിങ് എന്ന് പറയുന്നത്. ചിലപ്പോള്‍ ദിവസങ്ങള്‍ ആഴ്ചകള്‍ തന്നെയാകാം. കരിയര്‍ മാറ്റം ആഗ്രഹിക്കുന്നവര്‍ക്കും ഒഴിവു ദിവസം കണ്ടെത്തി ജോബ് ഷാഡോയിങ്ങില്‍ ഏര്‍പ്പെടാവുന്നതാണ്. ഇത് ഒരു ജോലിയിലേക്ക് എടുത്ത് ചാടും മുന്‍പു നേരിട്ടു കണ്ടറിഞ്ഞ് ഒരു തീരുമാനം അതിനെ കുറിച്ച് എടുക്കാന്‍ സഹായിക്കുന്നു. 

വോളന്റിയറാകുക
നിങ്ങള്‍ തിരഞ്ഞെടുത്ത മേഖലയില്‍ വോളന്റിയര്‍ സാധ്യതകളും അന്വേഷിക്കാവുന്നതാണ്. പുതിയ കരിയര്‍ മേഖലകളിലേക്കു കടന്നു ചെല്ലുമ്പോള്‍ അതിന്റെ ഒരു യഥാർഥ ചിത്രം ഇത്തരം വോളന്റിയറിങ് ഇന്റേണ്‍ഷിപ്പ് ഘട്ടങ്ങളില്‍ ലഭിക്കുന്നതാണ്. ഇതു നിങ്ങളുടെ റെസ്യൂമെയിലും തൊഴില്‍ പരിചയത്തില്‍ ചേര്‍ക്കാന്‍ സാധിക്കും. കഴിവും ഭാഗ്യവും ഒത്തു വന്നാല്‍ ചിലപ്പോള്‍ വോളന്റിയറിങ് ഒരു മുഴുനീള ജോലിയാകാനും മതി. 

വീണ്ടും പഠനത്തിലേക്ക്
ചില കരിയര്‍ മേഖലകളിലേക്കു പോകാന്‍ നിങ്ങള്‍ക്കു നിലവിലുള്ള യോഗ്യതകള്‍ പോരാതെ വരും. അപ്പോള്‍ പുതിയ കഴിവുകള്‍ ആര്‍ജ്ജിക്കാന്‍ വീണ്ടും പഠിക്കാന്‍ തയ്യാറാകണം. സൗജന്യമായി ലഭിക്കുന്ന ഓണ്‍ലൈന്‍ കോഴ്‌സുകള്‍ ഉള്‍പ്പെടെ പുതിയ നൈപുണ്യങ്ങള്‍ പഠിക്കാന്‍ മാര്‍ഗ്ഗങ്ങള്‍ നിരവധിയാണ്. 

Job Tips >>

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
MORE IN JOBS & CAREER
SHOW MORE
FROM ONMANORAMA