ബംഗാൾ ഉൾക്കടലിൽ വീണ്ടും ന്യൂനമർദം രൂപപ്പെട്ടു; പിന്നാലെ പുതിയ ചക്രവാതച്ചുഴിയും

Mail This Article
തെക്ക് കിഴക്കൻ ബംഗാൾ ഉൾക്കടലിൽ വീണ്ടും ന്യൂനമർദം രൂപപ്പെട്ടു. അടുത്ത ദിവസങ്ങളിൽ വീണ്ടും ശക്തി പ്രാപിക്കുന്ന ന്യൂനമർദം ഡിസംബർ 11 ഓടെ ശ്രീലങ്ക-തമിഴ്നാട് തീരത്തിനു സമീപം എത്തിച്ചേരാൻ സാധ്യത. ഡിസംബർ 11, 12ന് ശേഷം കേരളത്തിലും വീണ്ടും മഴ വർധിക്കാൻ സാധ്യതയുണ്ട്. അതേസമയം, നിലവിലുള്ള ന്യൂനമർദത്തിനു പിന്നാലെ ബംഗാൾ ഉൾക്കടലിൽ തന്നെ മറ്റൊരു ചക്രവാതച്ചുഴിക്കും സാധ്യതയുള്ളതായി കാലാവസ്ഥാ വിദഗ്ധർ വ്യക്തമാക്കുന്നു.
ദിവസങ്ങൾക്ക് മുൻപാണ് ബംഗാൾ ഉൾക്കടലിൽ രൂപംകൊണ്ട ഫെയ്ഞ്ചൽ ചുഴലിക്കാറ്റ് ശ്രീലങ്ക, തമിഴ്നാട്, പുതുച്ചേരി എന്നിവിടങ്ങളിൽ ദുരിതം വിതച്ചത്. തുടർച്ചയായ മഴയിൽ പലയിടങ്ങളും വെള്ളത്തിലായി. നിരവധിപ്പേർക്ക് ജീവനും നഷ്ടമായി. ചുഴലിക്കാറ്റ് ശക്തിക്കുറഞ്ഞ് അറബിക്കടലിലേക്ക് പതിക്കുകയാണുണ്ടായത്. ഈ സമയങ്ങളിൽ വടക്കൻ കേരളത്തിലും വ്യാപക മഴയുണ്ടായിരുന്നു. മഞ്ചേശ്വരത്ത് 24 മണിക്കൂറിൽ 378 മില്ലിമീറ്റർ മഴയാണ് ലഭിച്ചത്.