ഒമാനിൽ ആദ്യമായി ഉഗ്രവിഷമുള്ള കരിമൂർഖനെ കണ്ടെത്തി; നിർണായകമെന്ന് ശാസ്ത്രലോകം

ഒമാനിൽ ആദ്യമായി ഉഗ്രവിഷമുള്ള കരിമൂർഖനെ കണ്ടെത്തി. ദോഫാർ ഗവർണറേറ്റിലാണ് പരിസ്ഥിതി അതോറിറ്റി പാമ്പിനെ കണ്ടെത്തിയത്. ഇക്കാര്യം സൂടാക്സ എന്ന ജേണലിൽ പ്രസിദ്ധീകരിച്ചിട്ടുണ്ട്. ഇതോടെ രാജ്യത്ത് കണ്ടുവരുന്ന പാമ്പുകളുടെ എണ്ണം 22 ആയി.

വാട്ടറിനേഷിയ ഏജിപ്തിയ എന്ന ശാസ്ത്രനാമത്തിൽ അറിയപ്പെടുന്ന പാമ്പാണ് മരുഭൂമി കരിമൂർഖൻ. ഉഗ്രവിഷമുള്ള ഇവ മിഡിൽ ഈസ്റ്റിൽ വ്യാപകമായി കാണപ്പെടുന്നുണ്ട്. രാജവെമ്പാലയുടെ വിഷത്തിന് സമാനമായതാണ് മരുഭൂമി കരിമൂർഖന്റെ വിഷം. കറുത്ത തിളങ്ങുന്ന ശരീരമുള്ള ഈ പാമ്പ് രാത്രിയിലാണ് പുറത്തിറങ്ങുന്നത്. ഏകദേശം 150 സെന്റിമീറ്റർ വരെ നീളമുള്ള ഈ പാമ്പുകൾക്ക് മറ്റ് മൂർഖൻ പാമ്പുകളേക്കാൾ പ്രതിരോധശേഷി കൂടുതലാണ്.

ഒമാന്റെ ജൈവവൈവിധ്യം സംരക്ഷിക്കുന്നതിനും വന്യജീവി മേഖലകളിലെ ഗവേഷണത്തിനും ഈ കണ്ടെത്തൽ നിർണായകമാകുമെന്നാണ് ശാസ്ത്രലോകം കരുതുന്നത്.