sections
MORE

കാലാവസ്ഥ തകിടം മറിയും, ഉണ്ടാകുന്നത് അപ്രതീക്ഷിത മാറ്റങ്ങള്‍; കാത്തിരിക്കുന്നത് വിചിത്ര കാലാവസ്ഥ!

climate change
SHARE

കാലാവസ്ഥാ വ്യതിയാനം ലോകത്തെ അതിതീക്ഷ്ണമായ മാറ്റങ്ങളിലേക്കാണു നയിച്ചു കൊണ്ടിരിക്കുന്നത്. പല മേഖലയിലും ഇപ്പോള്‍ ആയിരത്തിനു മേല്‍ കിലോമീറ്ററുകള്‍ അകലയുള്ള പ്രദേശത്തിനു സമാനമായ കാലാവസ്ഥയാണ് അനുഭവപ്പെടുന്നത്. അമേരിക്കയിലെ ശൈത്യമേഖലയില്‍ സ്ഥിതി ചെയ്യുന്ന പല നഗരങ്ങളിലും ഇപ്പോള്‍ അനുഭവപ്പെടുന്നത് മധ്യ ദക്ഷിണ അമേരിക്കയിലെ കാലാവസ്ഥയാണെന്ന പുതിയ പഠനങ്ങള്‍ ഇതിനു തെളിവാണ്. ഈ അവസ്ഥ തുടര്‍ന്നാല്‍ ലോകത്തിലെ മൂന്നിലൊന്നു നഗരങ്ങളിലും കാലാവസ്ഥാ വ്യതിയാനം മൂലമുള്ള മാറ്റങ്ങള്‍ 2050 ഓടെ അനുഭവപ്പെടുമെന്നും 20 ശതമാനം നഗരങ്ങളില്‍ ഇതുവരെ അവര്‍ അനുഭവിക്കാത്ത തരത്തിലുള്ള കാലാവസ്ഥയാകും നിലനില്‍ക്കുകയെന്നും ഗവേഷകര്‍ മുന്നറിയിപ്പു നല്‍കുന്നു.

Climate Change | Temperature Rises

കാത്തിരിക്കുന്നത് അപ്രതീക്ഷിത മാറ്റങ്ങള്‍

ഒരു പഠനത്തില്‍ മാത്രമല്ല തുടര്‍ച്ചയായി നടന്ന പല പഠനങ്ങളിലും നഗരങ്ങളില്‍ സംഭവിക്കാനിരിക്കുന്ന ഈ വലിയ കാലാവസ്ഥാ മാറ്റത്തെക്കുറിച്ചു മുന്നറിയിപ്പ് നല്‍കുന്നുണ്ട്. ജനസാന്ദ്രത കണക്കിലെടുത്താണ് കാലാവസ്ഥാ മാറ്റം നഗരങ്ങളിലുണ്ടാക്കുന്ന മാറ്റത്തേക്കുറിച്ച് ഈ പഠനങ്ങള്‍ നടന്നതും. ഏതാനും മാസങ്ങള്‍ക്ക് മുന്‍പ് നടന്ന പഠനം വടക്കേ അമേരിക്കയെ കേന്ദ്രീകരിച്ചായിരുന്നു. ഈ പഠനത്തിനാലാണ് വടക്കേ അമേരിക്കയിലെ ഒരു നഗരത്തിലെ താപനില 2050 ആകുമ്പോഴേക്കും മെക്സിക്കോയിക്ക് തുല്യമാകുമെന്ന് ഗവേഷകര്‍ പറയുന്നത്.

സറിച്ചിലെ ക്രൗദര്‍ ലാബ് നടത്തിയ പഠനം ഈ സമാനമായ മുന്നറിയിപ്പ് ലോകത്തിലെ അനവധി നഗരങ്ങള്‍ക്ക് നല്‍കുന്നു. അടുത്ത മൂന്ന് പതിറ്റാണ്ടിനുള്ളില്‍ ഭൂമിയിലെ 520 നഗരങ്ങള്‍ക്കാണ് സമാനമായ തോതില്‍ താപനില വർധിക്കാന്‍പോകുന്നതെന്നാണ് ഗവേഷകര്‍ പറയുന്നത്.

ഐക്യരാഷ്ട്ര സംഘടനയുടെ പാനല്‍ ഫോര്‍ ക്ലൈമറ്റ് ചെയിഞ്ച് അഥവാ ഐപിസിസി യുടെ കാലാവസ്ഥാ മാതൃകകളെ അടിസ്ഥാനമാക്കിയാണ് ഈ നഗര കേന്ദ്രീകൃത പഠനങ്ങളെല്ലാം നടന്നത്. കാര്‍ബണ്‍ ബഹിര്‍ഗമനം കുറഞ്ഞാലും ഉണ്ടായേക്കാവുന്ന കാലാവസ്ഥാ മാറ്റങ്ങള്‍ കണക്കിലെടുത്താണ് ഐപിസിസി കാലാവസ്ഥാ മാതൃകകള്‍ തയാറാക്കിയിരിക്കുന്നത്.

Climate Change

അതായത് കാലാവസ്ഥാ വ്യതിയാനത്തെ മറികടക്കാൻ നിലവില്‍ തയാറാക്കിയിട്ടുള്ള പദ്ധതികള്‍ പൂര്‍ണ വിജയമായാലും മുകളില്‍ നടത്തിയ പഠനങ്ങളില്‍ കണ്ടെത്തിയിട്ടുള്ള കാലാവസ്ഥാ മാറ്റങ്ങള്‍ ഒഴിവാക്കാനാകില്ല. ഉദാഹരണത്തിന് ഇനി യൂറോപ്പിലെ എല്ലാ രാജ്യങ്ങളും കാര്‍ബണ്‍ ബഹിര്‍ഗമനം പൂര്‍ണമായി ഒഴിവാക്കിയാലും ലണ്ടന്‍ നഗരത്തിലെ 2050 ലെ താപനില ഇപ്പോഴത്തെ ബാഴ്സിലോണയ്ക്ക് തുല്യമാകും. അതായത് കൂടുതല്‍ ചൂടും മഴയും അനുഭവപ്പെടുകയും മഞ്ഞുവീഴ്ചയും മറ്റും പൂര്‍ണമായി നിലയ്ക്കുകയും ചെയ്യും. 

മറ്റ് ചില നഗരങ്ങളിലെയും പുതിയ താപനില കൂടി പഠനം വിവരിക്കുന്നുണ്ട്. യുഎസിലെ സിയാറ്റിലിനിലെ കാലാവസ്ഥ സാന്‍ഫ്രാന്‍സിസ്കോയ്ക്ക് തുല്യമായിരിക്കും. സ്റ്റോക്ഹോം ബുഡാപെസ്റ്റിനോട് സാമ്യമുള്ള താപനിലയിലെത്തും. പാരിസ് കാന്‍ബെറയ്ക്കു സമാനമായ സാഹചര്യത്തിലേക്കെത്തും. ഐസ്‌ലന്‍ഡിലെ റെഷവിക് മേഖല ന്യൂസീലന്‍ഡിലെ വെല്ലിങ്ടണ്‍ പ്രദേശത്തിനു സമാനമായ കാലാവസ്ഥയിലെത്തും. അതായത് ഇപ്പോള്‍ ശൈത്യമേഖലയോട് ചേര്‍ന്ന് സ്ഥിതി ചെയ്യുന്ന പ്രദേശങ്ങളുടെയെല്ലാം താപനില വൈകാതെ കൂടുതല്‍ ഉഷ്ണ മേഖലാരീതീയിലേക്കു മാറും എന്നാണ് പഠനങ്ങള്‍ ചൂണ്ടിക്കാട്ടുന്നത്.

ഓരോ നഗരത്തിന്‍റെയും കാലാവസ്ഥ അറിയാം

ലോകത്തിലെ 520 നഗരങ്ങളാണ് കാലാവസ്ഥാ വ്യതിയാനത്തിന്‍റെ മാറ്റങ്ങള്‍ മനസ്സിലാക്കാനുള്ള പഠനത്തിനു വിധേയമായത്. ഈ നഗരങ്ങളെയെല്ലാം ഉള്‍പ്പടുത്തി ഒരു ഡിജിറ്റല്‍ ഇന്‍ററാക്ടീവ് മാപ്പും ഗവേഷകര്‍ പുറത്തിറക്കിയിട്ടുണ്ട്. ഇതനുസരിച്ച് ഈ 520 നഗരങ്ങളിലെ 77 ശതമാനത്തിലും 2050 ഓടെ മേല്‍പ്പറഞ്ഞ കാലാവസ്ഥാ മാറ്റങ്ങളുണ്ടാകും. അതേസമയം ശേഷിക്കുന്നവയില്‍ 22 ശതമാനം നഗരങ്ങളിലെ കാലാവസ്ഥ ഭൂമിയില്‍ ഇതുവരെ അനുഭവപ്പെടാത്തത്ര വിചിത്രമായിരിക്കുമെന്നും ഗവേഷകര്‍ മുന്നറിയിപ്പു നല്‍കുന്നു.

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN GLOBAL WARMING
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
FROM ONMANORAMA