ഒറ്റയടിക്ക് മുയലിനെ അകത്താക്കിയ കടൽക്കാക്ക; ദൃശ്യങ്ങൾ കൗതുകമാകുന്നു!

കടൽക്കാക്ക മുയലിനെ ഒന്നോടെ വിഴുങ്ങുമോ? വിഴുങ്ങുമെന്നാണ് ഈ ദൃശ്യങ്ങൾ തെളിയിക്കുന്നത്. വേയ്ൽസിലെ സ്കോക്ഹോമിൽ നിന്നുള്ളതാണ് ഈ അപൂർവ ദൃശ്യങ്ങൾ.ബ്രിസ്റ്റൾ നിവാസിയും മറൈൻ നാച്വറൽ ഹിസ്റ്ററി ഫൊട്ടോഗ്രഫറുമായ ഐറിൻ മെൻഡസ് ക്രൂസ് ആണ് ഈ ദൃശ്യങ്ങൾ പകർത്തിയത്.

കടൽക്കാക്ക മുയലിനെ വിഴുങ്ങുന്നത് കണ്ട് ഞെട്ടിയെന്നാണ് ഐറിൻ സംഭവത്തെക്കുറിച്ച് പറഞ്ഞത്. ഭക്ഷ്യശൃംഘലയെക്കുറിച്ചോർത്ത് അദ്ഭുതമാണ് അപ്പോൾ തോന്നിയതെന്നും വ്യക്തമാക്കി. ഗ്രേറ്റ് ബ്ലാക്ക് ബാക് എന്നറിയപ്പെടുന്ന ഈ കടൽക്കാക്കകൾ ലോകത്തിലെ ഏറ്റവും വലുപ്പമുള്ള കടൽക്കാക്കകളാണ്. അതുകൊണ്ട് തന്നെ അവയുടെ ഇരകളും വലുപ്പമേറിയവയാണ്.

മുയലിനെ കടൽക്കാക്ക എപ്പോഴാണ് വേട്ടയാടിയതെന്ന കാര്യം വ്യക്തമല്ല.അതുകൊണ്ട് തന്നെ ഇരയെ വിഴുങ്ങുന്ന ദൃശ്യങ്ങൾ മാത്രമാണ് ഐറിന് പകർത്താനായത്. എന്തായാലും മുയലിനെ വിഴുങ്ങിയ കടൽക്കാക്കയെകണ്ട് അമ്പരന്നിരിക്കുകയാണ് സൈബർ ലോകം.