ഔഡിയുടെ ആഡംബര എസ് യു വി സ്വന്തമാക്കി ബോളിവുഡ് യുവ നടി. ഹിറോപന്തി, ദിൽവാലെ, ബരേലി കി ബർഫി തുടങ്ങിയ സിനിമകളിലൂടെ ശ്രദ്ധേയയായ കൃതി സനോണാണ് ഔഡി ക്യൂ 7 സ്വന്തമാക്കിയത്. ഔഡി ഇന്ത്യ സമൂഹ മാധ്യങ്ങളിലൂടെയാണ് താരം ക്യൂ 7 സ്വന്തമാക്കിയ വിവരം ആരാധകരെ അറിയിച്ചത്.
2007ൽ ഇന്ത്യയിലെത്തിയ ക്യൂ7ന്റെ രണ്ടാം തലമുറയാണ് നിലവിൽ വിപണിയിലുള്ളത്. രണ്ട് എൻജിൻ വകഭേദങ്ങളിലാണ് ക്യൂ 7 ലഭിക്കുക. 2.0 ലീറ്റർ എൻജിൻ ഉപയോഗിക്കുന്ന പെട്രോൾ പതിപ്പ് 252 ബിഎച്ച്പി കരുത്തും 370 എൻഎം ടോർക്കും നൽകുമ്പോൾ. 3 ലീറ്റർ എൻജിൻ ഉപയോഗിക്കുന്ന ഡീസൽ പതിപ്പ് 2910 ആർപിഎമ്മിൽ 245 ബിഎച്ച്പി കരുത്തും 1500 ആർപിഎമ്മിൽ 600 എൻഎം ടോർക്കും നൽകും. ഏകദേശം 72 ലക്ഷം മുതൽ 82 ലക്ഷം രൂപ വരെയാണ് വാഹനത്തിന്റെ എക്സ്ഷോറൂം വില.