Suzuki Solio
മഹീന്ദ്രയെ തറപറ്റിച്ച് യുവി വിപണിയിൽ മാരുതി ഒന്നാമതെത്തിയത് അടുത്തിടെയാണ്. ഒന്നാം സ്ഥാനം നിലനിർത്തുന്നതിനും യുവി വിപണിയിലെ ആധിപത്യം കൂടുതൽ ഉറപ്പിക്കുന്നതിനുമായി കൂടുതൽ വാഹനങ്ങളുമായി മാരുതി എത്തുന്നു. വാഗൺ ആർ 7 സീറ്ററായിരിക്കും അതിൽ പ്രധാനി. ഈ വർഷം സെപ്റ്റംബറിൽ തന്നെ 7 സീറ്റർ വാഗൺ ആറിന്റെ നിർമാണം കമ്പനി ആരംഭിക്കും എന്നാണ് റിപ്പോർട്ട്. നവംബറിൽ പുതിയ വാഹനം വിപണിയിലെത്തും.
കമ്പനി ഔദ്യോഗിക വിശദീകരണങ്ങളൊന്നും നൽകിയിട്ടില്ലെങ്കിലും ജാപ്പനീസ് വീപണിയിലെ സുസുക്കിയുടെ ജനപ്രിയ വാഹനം സോളിയോ ഏഴു സീറ്ററായിരിക്കും മാരുതി ഇന്ത്യയിലെത്തിക്കും. നേരത്തെ സോളിയോയുടെ പരീക്ഷണയോട്ടങ്ങളുടെ ചിത്രങ്ങൾ സമൂഹമാധ്യമങ്ങളിലൂടെ പ്രചരിച്ചിരുന്നു. ഇന്തോനേഷ്യൻ വിപണിയിൽ വിൽപ്പനയുള്ള വാഹനത്തോടും പുതിയ 7 സീറ്ററിന് സാമ്യമുണ്ടാകും.
മാരുതി സുസുക്കിയുടെ ജനപ്രിയ വാഹനമായ വാഗൺ ആറിന്റെ പേരിലായിരിക്കും 7 സീറ്റുള്ള എംപിവി വിപണിയിലെത്തുക. രാജ്യാന്തര വിപണിയിൽ 1.2 ലീറ്റർ പെട്രോൾ ഹൈബ്രിഡ് എൻജിനാണ് സോളിയോയിൽ ഉപയോഗിക്കുന്നത്. 91 പിഎസ് കരുത്തും 118 എൻഎം ടോർക്കും ഉത്പാദിപ്പിക്കും ഈ എൻജിൻ. അഞ്ച് സ്പീഡ് മാനുവൽ, എഎംടി, സിവിടി വകഭേദങ്ങളിൽ വാഹനം ലഭ്യമാകും. ഹാച്ച്ബാക്ക് മോഡലിനേക്കാൾ അധികം വില വർദ്ധിപ്പാക്കാതെ 7 സീറ്റർ പുറത്തിറക്കാനാണ് കമ്പനി ശ്രമിക്കുന്നത്. പുതിയ വാഗൺ ആർ ഡാറ്റ്സൻ ഗോ പ്ലസ് ഉൾപ്പെടെയുള്ള വില കുറഞ്ഞ എംപിവികൾക്ക് ഭീഷണിയാകുമെന്നാണ് കരുതപ്പെടുന്നത്.
