മഴയാത്രയിൽ ശ്രദ്ധിക്കൂ, വാഹനം നിയന്ത്രണം വിടാം, ഈ അപകട വിഡിയോ ഉദാഹരണം

മഴയത്ത് വാഹനമോടിക്കുമ്പോൾ ഇരട്ടി ശ്രദ്ധവേണം. കാരണം മഴയത്ത് വാഹനങ്ങൾ നിയന്ത്രണം വിടാനുള്ള സാധ്യത കൂടുതലാണ്. വാഹനത്തിന്റെ നിയന്ത്രണം തെറ്റിയാൽ പിന്നെ ചിലപ്പോൾ മറ്റുവാഹനങ്ങളും അപകടത്തിൽ പെടും. അത്തരത്തിലൊരു അപകട വിഡിയോയാണിത്. നിയന്ത്രണം നഷ്ടപ്പെട്ട വാഹനം എതിരെ വന്ന ബസിൽ ഇടിക്കുകയായിരുന്നു.

പാമ്പാടി 14–ാം മൈലിലാണ് അപകടം നടന്നത്. മഴയത്ത് തെന്നിയ വാഹനമാണ് ബസിൽ ഇടിച്ചത്. അമിതവേഗമാണോ അപകടകാരണമെന്നത് വ്യക്തമല്ല. അപകടത്തിൽ ആർക്കൊക്കെ പരിക്കേറ്റു എന്നതിന്റെ വിവരങ്ങളും ലഭ്യമായിട്ടില്ല.

മഴയത്ത് വാഹനമോടിക്കുമ്പോൾ ശ്രദ്ധിക്കൂ

∙ മഴ തുടങ്ങുന്ന സമയങ്ങളിൽ റോഡിലുള്ള പൊടിയും, ഓയിൽ അംശങ്ങളും ചെറിയ നനവിൽ കുഴമ്പു രൂപത്തിലാകുന്നു. അത് കൂടുതൽ വഴുക്കലിന് കാരണമാകുന്നു.

∙ മഴക്കാലത്ത് റോഡും ടയറും തമ്മിലുള്ള ഘർഷണം കുറയുന്നു. ടയറിനും റോഡിനുമിടയിൽ വെള്ളത്തിന്റെ ഒരു പാളി ഉണ്ടാവുന്നത് കൊണ്ടാണ് ഇങ്ങനെ സംഭവിക്കുന്നത്. തേയ്മാനം വന്ന ടയറുകൾ ഒഴിവാക്കിയേ മതിയാവൂ.

∙ സാധാരണ ഓടുന്ന വേഗത്തിൽ നിന്ന് അൽപം കുറവു വേഗത്തിൽ വാഹനം ഓടിക്കുക. ബ്രേക്ക് ചെയ്താൽ നിൽക്കുന്ന ദൂരം മഴക്കാലത്ത് കൂടുതലായിരിക്കും. നമ്മൾ പ്രതീക്ഷിക്കുന്ന സ്ഥലത്ത് വാഹനം നിന്നുവെന്ന് വരില്ല.

∙ പെട്ടെന്ന് ബ്രേക്ക് ചെയ്യുമ്പോൾ തെന്നി മാറാനുള്ള സാധ്യത കൂടുന്നു.