ബുക്കും പേപ്പറുമില്ലാതെ സൂപ്പർകാർ; തിരിച്ചു കിട്ടാൻ അടച്ചത് 27.68 ലക്ഷം രൂപ പിഴ !

ആർസി ബുക്കും ടാക്സ് അടച്ച രേഖകളും നമ്പറുമില്ലാതെ റോഡിലിറങ്ങിയ പോർഷെ 911ന് അഹമ്മദാബാദ് പൊലീസ് 9.80 ലക്ഷം രൂപ പിഴ നൽകിയ വാർത്ത കുറച്ചു നാൾമുമ്പ് സമൂഹമാധ്യമങ്ങളിൽ തരംഗമായതാണ്. എന്നാൽ ടാക്സ് അടയ്ക്കാത്ത ആ സൂപ്പർകാർ തിരിച്ചു ലഭിക്കുന്നതിനായി ഉടമ 27.68 ലക്ഷം രൂപ പിഴ അടച്ചു എന്നാണ് അഹമ്മദാബാദ് പൊലീസ് പറയുന്നത്. ഗുജറാത്ത് സ്വദേശി രഞ്ജിത് ദേശായിയുടേതാണ് കാർ.

‌വാഹനത്തിന്റെ രേഖകൾ പൊലീസ് ഹാജരാക്കാൻ പറഞ്ഞെങ്കിലും ഉടമയ്ക്ക് അതു സാധിച്ചില്ല. തുടർന്നാണ് ടാക്സ് അടക്കം പിഴയായി നൽകാൻ പൊലീസ് ആവശ്യപ്പെട്ടത്. രാജ്യത്തെ ഏറ്റവും ഉയർന്ന വാഹന പിഴയാണിതെന്ന് അഹമ്മദാബാദ് പൊലീസ് പറയുന്നു.

ജർമൻ വാഹന നിർമാതാക്കളായ പോര്‍ഷയുടെ 1.82 കോടി രൂപ വിലയുള്ള കാറാണ് 911 കരേര എസ് മോഡൽ. പോർഷെയുടെ ഏറ്റവും മികച്ച കാറുകളിലൊന്നാണ് 911 കരേര എസ്. 3.0 ലീറ്റർ പെട്രോൾ എൻജിൻ കരുത്തു പകരുന്ന വാഹനത്തിന് 444 ബിഎച്ച്പി കരുത്തും 530 എൻഎം ടോർക്കുമുണ്ട്. പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ വെറും 3.7 സെക്കന്റ് മാത്രം മതി  ഈ കരുത്തന്.

English Summary: Porsche 911 owner fined Rs 27.68 Lakh in Ahmedabad