ഏറെ നാളത്തെ സ്വപ്നമായ ബുള്ളറ്റ് അച്ഛന് സമ്മാനിച്ച് മകന്‍: വിഡിയോ

ബാല്യത്തിൽ അച്ഛൻ പറഞ്ഞു തന്ന കഥകളിലെല്ലാം ‍അദ്ദേഹത്തെ മോഹിപ്പിച്ച ഒരു ബുള്ളറ്റുണ്ടായിരുന്നു. സ്വന്തമാക്കാൻ പണവും സമയവും ശരിയായപ്പോൾ പ്രായം കടന്നുപോയല്ലോ എന്ന ചിന്തയായി. വർഷങ്ങൾക്കിപ്പുറം പിതാവിന്റെ സ്വപ്നം സമ്മാനമായി നൽകിയിരിക്കുകയാണ് ഈ മകൻ.

റോയൽ എൻഫീൽഡിന്റെ ക്ലാസിക്ക് 350യാണ് പിതാവിന് മകൻ സമ്മാനമായി നൽകിയത്. ബെംഗ്ലളൂരുവിലെ റോയൽ എൻഫീൽഡ് ഷോറൂമിൽ നിന്ന് ഡെലിവറി എടുക്കുന്നതും മൈസൂരിലെത്തി അച്ഛന് അപ്രതീക്ഷിത സമ്മാനമായി നൽകുന്നതുമെല്ലാം വിഡിയോയിലുണ്ട്. മെഷീൻ ഡയറീസ് എന്ന യൂട്യൂബ് ചാനലിലാണ് ബൈക്ക് സമ്മാനിക്കുന്ന വിഡിയോ അപ്‌ലോഡ് ചെയ്തിരിക്കുന്നത്. 

റോയൽ എൻഫീൽഡ് ക്ലാസിക്ക് 350 ഗണ്‍മെറ്റൽ ഗ്രേയാണ് വാഹനം. ബിഎസ് 6, 350 സിസി എൻജിൻ ഉപയോഗിക്കുന്ന ബൈക്കിന് 19.8 ബിഎച്ച്പി കരുത്തും 28 എൻഎം ടോർക്കുമുണ്ട്. ഏകദേശം 1.67 ലക്ഷം രൂപയാണ് ബൈക്കിന്റെ എക്സ്ഷോറൂം വില.  

English Summary: Son Gifted Royal Enfield To Dad