നിയന്ത്രണം വിട്ട ജെസിബിയിൽ നിന്ന് യുവാവിന്റെ രക്ഷിച്ചത് ഈ വാഹനം: വിഡിയോ
Mail This Article
കരിങ്കല്ലത്താണി ∙ സമൂഹമാധ്യമങ്ങളിൽ വൈറലായ ഈ വിഡിയോ കാണുന്നവരെല്ലാം ചിന്തിക്കുന്നുണ്ടാകും അപ്പോൾ ആ ബൊലേറോ അതുവഴി വന്നില്ലായിരുന്നുവെങ്കിൽ ബൈക്കിലിരിക്കുന്ന യുവാവിന്റെ അവസ്ഥ എന്താകുമായിരുന്നു എന്ന്. നിയന്ത്രണം വിട്ടു വന്ന മണ്ണുമാന്തി യന്ത്രം എതിരെ വന്ന വാഹനത്തിൽ ഇടിച്ചതുകൊണ്ടു മാത്രമാണ് വഴിയരികിൽ നിർത്തിയിട്ട ബൈക്കിൽ ഇരുന്ന പനാംകുന്ന് സ്വദേശി സാലി രക്ഷപ്പെട്ടത്.
കരിങ്കല്ലത്താണിയിലെ തൊടുകാപ്പ് ഇറക്കത്തിൽ ഇന്നലെ രാവിലെ പത്തിനായിരുന്നു അപകടം. നിയന്ത്രണംവിട്ട മണ്ണുമാന്തി യന്ത്രം എതിരെ വന്ന ബോലേറോയിലും നിർത്തിയിട്ടിരുന്ന ബൈക്കിലും സമീപത്തെ മരത്തിലും തട്ടിയ ശേഷം വീടിന്റെ മുറ്റത്തേക്ക് ഇടിച്ചു കയറുകയായിരുന്നു.
സാലി ഇടിയുടെ ആഘാതത്തിൽ തെറിച്ചുവീണെങ്കിലും പരുക്കേൽക്കാതെ രക്ഷപ്പെട്ടു. വാൻ യാത്രക്കാർക്കും പരുക്കില്ല. മണ്ണുമാന്തി യന്ത്രത്തിന്റെ ഡ്രൈവറെ നിസ്സാര പരുക്കുകളോടെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു. വാഹനങ്ങൾക്കു സാരമായ കേടുപാടുകളുണ്ട്.
കരിങ്കല്ലത്താണി ഭാഗത്തുനിന്നു മണ്ണാർക്കാട് ഭാഗത്തേക്കു വന്ന മണ്ണുമാന്തി യന്ത്രത്തിന്റെ ബ്രേക്ക് നഷ്ടമായതാണ് അപകടത്തിനിടയാക്കിയത്. പാതയോരത്തു നിന്നവരെ ഇടിക്കാതെ എതിർവശത്തെ മരത്തിലിടിപ്പിച്ചു നിർത്താൻ ശ്രമിക്കുമ്പോഴായിരുന്നു അപകടം.
English Summary: Malappuram JCB Accident CCTV Visuals