ഹീറോ പ്ലഷർ പ്ലസിനു പ്ലാറ്റിനം എഡീഷൻ; വില 60,950 രൂപ
Mail This Article
ഉത്സവകാലം പ്രമാണിച്ച് ഹീറോ മോട്ടോ കോർപ് ഗീയർരഹിത സ്കൂട്ടറായ പ്ലഷർ പ്ലസ് പ്ലാറ്റിനം എഡീഷൻ അവതരിപ്പിച്ചു. 60,950 രൂപയാണു സ്കൂട്ടറിനു ഡൽഹി ഷോറൂമിൽ വില. അലോയ് വീലുള്ള ‘പ്ലഷർ പ്ലസ്’ ആധാരമാക്കിയാണു കമ്പനി ഈ പരിമിതകാല പതിപ്പ് സാക്ഷാത്കരിച്ചിരിക്കുന്നത്. ‘പ്ലഷർ പ്ലസ് പ്ലാറ്റിനം എഡീഷ’ന്റെ വിലയാവട്ടെ അലോയ് വീലുള്ള ‘പ്ലഷർ പ്ലസി’നെ അപേക്ഷിച്ച് 2,000 രൂപയോളം അധികമാണ്.
സാധാരണ ‘പ്ലഷർ പ്ലസി’ൽ കാണുന്ന ഗ്ലോസ് ബ്ലാക്ക് നിറത്തിനു പകരം സവിശേഷ മാറ്റ് ബ്ലാക്ക് വർണത്തിലാണു ‘പ്ലഷർ പ്ലസ് പ്ലാറ്റിനം എഡീഷ’ന്റെ വരവ്. പിൻസീറ്റ് യാത്രികനു ബാക്ക് റസ്റ്റ് ഉണ്ടെന്നതാണു മറ്റൊരു പ്രത്യേകത. സ്കൂട്ടറിലെ പാനലുകളുടെ ഉൾഭാഗത്തിന് ബ്രൗൺ നിറവും മിററിനും എക്സോസ്റ്റ് ഹീറ്റ് ഷീൽഡിനും ക്രോം ഫിനിഷുമൊക്കെ ഹീറോ നൽകിയിട്ടുണ്ട്. അഗ്രങ്ങളിൽ വെള്ള റിം ടേപ് സഹിതം ഇരട്ട വർണ സീറ്റ് കവറും ലഭ്യമാക്കിയിട്ടുണ്ട്.
അതേസമയം സാങ്കേതിക വിഭാഗത്തിൽ മാറ്റമൊന്നുമില്ലാതെയാണ് ‘പ്ലഷർ പ്ലസ് പ്ലാറ്റിനം എഡീഷൻ’ എത്തുന്നത്. സ്കൂട്ടറിനു കരുത്തേകുന്നത് മലിനീകരണ നിയന്ത്രണത്തിൽ ഭാരത് സ്റ്റേജ് ആറ്(ബി എസ് ആറ്) നിലവാരമുള്ള 110 സി സി, ഫ്യാവൽ ഇഞ്ചക്റ്റഡ് എൻജിനാണ്. 8.1 ബി എച്ച് പി വരെ കരുത്തും 8.7 എൻ എമ്മോളം ടോർക്കുമാണ് ഈ എൻജിൻ സൃഷ്ടിക്കുക.
ഏതാനും ദിവസം മുമ്പാണു ഹീറോ പ്രത്യേക പതിപ്പായ ‘ഗ്ലാമർ ബ്ലെയ്സ്’ പുറത്തിറക്കിയത്. ‘ഗ്ലാമർ ബ്ലെയ്സി’ന് 72,200 രൂപയായിരുന്നു ഡൽഹിയിലെ ഷോറൂം വില. ഇതോടെ ഡ്രം ബ്രേക്കുള്ള ‘ഗ്ലാമറി’ന്റെയും (വില: 71,000 രൂപ) ഡിസ്ക് ബ്രേക്കുള്ള ‘ഗ്ലാമറി’ന്റെയും (വില: 74,500 രൂപ) ഇടയിലാണു ‘ഗ്ലാമർ ബ്ലെയ്സി’നു സ്ഥാനം. പോരെങ്കിൽ ‘ബ്ലെയ്സി’ന് അടിത്തറയാവുന്ന, ഡിസ്ക് ബ്രേക്കുള്ള ‘ഗ്ലാമറി’നെ അപേക്ഷിച്ച് വിലയിൽ 2,300 രൂപയോളം കുറവുമുണ്ട്.
പുതുവർണമായ ‘മാറ്റ് വെർണിയർ ഗ്രേ’യിലാണു ‘ഗ്ലാമർ ബ്ലെയ്സ്’ വിൽപ്പനയ്ക്കെത്തുക; ഹാൻഡിൽ ബാറിൽ ഘടിപ്പിച്ച യു എസ് ബി ചാർജർ, സൈഡ് സ്റ്റാൻഡ് പിൻവാങ്ങിയിട്ടില്ലെങ്കിൽ മുന്നറിയിപ്പ് നൽകുന്ന ഇൻഡിക്കേറ്റർ, ഫങ്ക് ലൈം യെലോ ഗ്രാഫിക്സ് തുടങ്ങിയവയും ബൈക്കിലുണ്ട്.
സാങ്കേതിക വിഭാഗത്തിൽ മാറ്റമൊന്നുമില്ലാതെയാണ് ‘ഗ്ലാമർ ബ്ലെയ്സി’ന്റെയും വരവ്. ബൈക്കിനു കരുത്തേകുന്നത് ബി എസ് ആറ് നിലവാരമുള്ള 124.7 സി സി, സിംഗിൾ സിലിണ്ടർ എൻജിനാണ്. 7,500 ആർ പി എമ്മിൽ 10.7 ബി എച്ച് പി കരുത്തും 6,000 ആർ പി എമ്മിൽ 10.6 എൻ എം ടോർക്കുമാണ് ഈ എൻജിൻ സൃഷ്ടിക്കുക. ഒപ്പം ഹീറോയുടെ സ്വന്തം ആവിഷ്കാരമായ ഐഡ്ൽ സ്റ്റാർട് സ്റ്റോപ് സിസ്റ്റം അഥവാ ‘ഐ ത്രീ എസ്’ സാങ്കേതികവിദ്യയുടെ പിൻബലവും ബൈക്കിനുണ്ട്. അഞ്ച് സ്പീഡ് ഗീയർബോക്സാണു ട്രാൻസ്മിഷൻ. ട്രാൻസ്മിഷൻ അഞ്ചു സ്പീഡായതോടെ ‘ഗ്ലാമറി’ന്റെ എതിരാളികൾ ഹോണ്ട ‘എസ് പി 125’, ബജാജ് ‘പൾസർ 125’ എന്നിവയാണ്.
English Summary: Hero Pleasure Plus Platinum Model Launched in India