ആത്മഹത്യാപരം! മരണത്തിൽ നിന്ന് രക്ഷപ്പെട്ടത് ഭാഗ്യം കൊണ്ട്: വിഡിയോ

വേഗത്തിൽ വരുന്ന ലോറിയുടെ മുന്നിലേക്ക് പെട്ടെന്ന് ബൈക്കുമായി എത്തിയാൽ എന്തായിരിക്കും ഫലം? പ്രവചിക്കാനാകില്ല മരണത്തിൽ നിന്ന് രക്ഷപ്പെട്ടാൽ അതുഭാഗ്യം മാത്രം. അത്തരത്തിലൊരു അപകടത്തിന്റെ വിഡിയോയാണ് സൈബർബാദ് ട്രാഫിക് പൊലീസ് സമൂഹമാധ്യമങ്ങളില്‍ ഷെയർ ചെയ്തിരിക്കുന്നത്.

രാത്രിയിൽ ഒന്നും ശ്രദ്ധിക്കാതെ ഇടറോഡിൽ നിന്ന് നാലുവരി പാതയിലേക്ക് കയറിയ ബൈക്കുകാരനാണ് ലോറിയുടെ അടിയിൽ പെട്ടത്. അശ്രദ്ധ ഒന്നുകൊണ്ട് മാത്രമാണ് ഈ അപകടമുണ്ടായത്. പെട്ടെന്ന് മുന്നിലേക്ക് എത്തിയ ബൈക്കുകാരനെ ഇടിച്ചിടുക എന്നതല്ലാതെ ലോറി ഡ്രൈവർക്ക് മുന്നിൽ വേറെ വഴിയില്ലായിരുന്നുവെന്ന് വിഡിയോയിൽ നിന്ന് മനസിലാക്കാം. അപകടത്തിൽ ഗുരുതരമായി പരുക്കേറ്റ യുവാവ് മരണത്തിൽ നിന്ന് രക്ഷപ്പെട്ടു എന്നാണ് പൊലീസ് പറയുന്നത്. 

പ്രധാന റോഡുകളിലേക്ക് പ്രവേശിക്കും മുമ്പ് ശ്രദ്ധിക്കേണ്ട കാര്യങ്ങള്‍

∙ പ്രധാന റോഡിലേക്ക് പ്രവേശിക്കുംമുമ്പ് ഇരുവശത്തു നിന്നും മറ്റു വാഹനങ്ങള്‍ വരുന്നില്ലെന്ന് ഉറപ്പുവരുത്തുക. അതിനുശേഷം മാത്രമേ പ്രധാന റോഡിലേക്ക് പ്രവേശിക്കാവൂ.

∙ പ്രധാന റോഡിലൂടെ പോകുന്ന വാഹനങ്ങൾക്ക് മുൻഗണന നൽകണം.

∙ പ്രധാന റോഡിലൂടെ പോകുന്ന വാഹനങ്ങളുടെ വേഗം നമ്മുടെ കണക്കൂട്ടിലിൽ ആയിരിക്കില്ല. അതുകൊണ്ട് വാഹനം പോയതിന് ശേഷം മാത്രം തിരിയാൻ ശ്രമിക്കുക.

∙ നാലു വരിപാതയാണെങ്കിലും നമ്മുടെ സുരക്ഷയെക്കരുതി ഇടതു വശവും വലതു വശവും നോക്കി വേണം റോഡിലേക്ക് പ്രവേശിക്കാൻ.

∙ മീഡിയനിൽ നിന്ന് തിരിഞ്ഞ് പെട്ടെന്ന് വാഹനത്തിന്റെ മുമ്പിലേക്ക് ചെന്നാൽ ഡ്രൈവർക്ക് പ്രതികരിക്കാൻ പോലും സമയം കിട്ടിയെന്ന് വരില്ല. അതുകൊണ്ട് സുരക്ഷിതമെന്ന് തോന്നിയാൽ മാത്രമേ തിരിയാവൂ.

∙ റൗണ്ട് എബൗട്ടുകളിൽ ആദ്യം പ്രവേശിക്കുന്ന വാഹനത്തിനായിരിക്കണം മുൻഗണന, കൂടാതെ മറ്റു വാഹനങ്ങളുടെ സഞ്ചാര സ്വതന്ത്ര്യം ഹനിക്കുകയും ചെയ്യരുത്.

English Summary: Bike Accident