വില 1.04 കോടി, ഔഡിയുടെ പെർഫോമൻസ് കാറിനെ കൂട്ടുപിടിച്ച് സൂപ്പർഹിറ്റ് ഗായകൻ

ഔഡിയുടെ പെർഫോമൻസ് കാർ ഗാരിജിലെത്തിച്ച് ഗായകൻ കെ.കെ. ഔഡി എ 5 നെ അടിസ്ഥാനമാക്കിയുള്ള പെർഫോമൻസ് സെഡാൻ ആർഎസ് 5 സ്പോർട്സ് ബാക്ക് ആണ് കൃഷ്ണകുമാർ കുന്നത്ത് എന്ന കെ. കെ സ്വന്തമാക്കിയത്.

ഹിന്ദി, തെലുങ്ക്, തമിഴ്, കന്നഡ, മലയാളം ഭാഷകളിലായി നിരവധി സൂപ്പർഹിറ്റ് ഗാനങ്ങൾ ആലപിച്ചിട്ടുള്ള കെകെ ഔഡിയുടെ മുംബൈ ഷോറൂമിൽ നിന്നാണ് വാഹനം സ്വന്തമാക്കിയത്. ഔഡിയുടെ ഏറ്റവും മികച്ച സ്പോർട്സ് ബാക്കുകളിലൊന്നാണ് ആർഎസ് 5. ആഡംബരവും കരുത്തും ഒരുപോലെ ഒത്തുചേർന്ന വാഹനത്തിന്റെ എക്സ്ഷോറൂം വില 1.04 കോടി രൂപയാണ്. 

ഔഡിയും പോർഷെയും ചേർന്ന് വികസിപ്പിച്ച 2.9 ലീറ്റർ ട്വിൻ ടർബോ പെട്രോൾ എൻജിനാണ് വാഹനത്തിന് കരുത്തു പകരുന്നത്. 450 പിഎസ് കരുത്തും 600 എൻഎം ടോർക്കുമുള്ള എൻജിനിൽ 8 സ്പീഡ് ഓട്ടമാറ്റിക് ഗിയർബോക്സാണ് ഉപയോഗിക്കുന്നത്. പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ 3.9 സെക്കന്റ് മാത്രം വേണ്ടിവരുന്ന ഈ കാറിന്റെ ഉയർന്ന വേഗം 250 കിലോമീറ്ററാണ്.