കുലീനം, ആഡംബരം; പുതിയ സ്കോർപിയോ ഇന്റീരിയർ ചിത്രങ്ങൾ- വിഡിയോ
Mail This Article
ഉടൻ തന്നെ വിപണിയിലെത്തുന്ന സ്കോർപ്പിയോ എന്നിന്റെ ഇന്റീരിയർ ചിത്രങ്ങൾ പുറത്തുവിട്ട് മഹീന്ദ്ര. ജൂൺ 27 പുറത്തിറക്കുന്നതിന്റെ മുന്നോടിയായാണ് ഇന്റീരിയർ ചിത്രങ്ങൾ കമ്പനി പറത്തുവിട്ടത്. നേരത്തെ വാഹനത്തിന്റെ എക്സ്റ്റീരിയർ ചിത്രങ്ങളും മഹീന്ദ്ര പുറത്തുവിട്ടിരുന്നു.
ആഡംബരം നിറഞ്ഞ ഇന്റീരിയർ
ആഡംബരം നിറഞ്ഞ ഇന്റീരിയറാണ് വാഹനത്തിന്. ഡ്യുവൽടോണാണ് ഇന്റീരിയർ കളർ. പ്രീമിയം ലുക്കുള്ള ഡാർഷ്ബോർഡും സീറ്റുകളും. ഡാഷ്ബോർഡിൽ അലുമിനിയം ട്രിമ്മുകളും നൽകിയിരിക്കുന്നു. ഡിജിറ്റൽ എംഐഡി ഡിസ്പ്ലെയും സ്പോർട്ടിയായ സ്റ്റിയറിങ് വീലുമുണ്ട്. സോണി 3ഡി സറൗണ്ട് സിസ്റ്റമുള്ള ഇൻഫോടെയിൻമെന്റ് സിസ്റ്റമാണ് പുതിയ സ്കോർപ്പിയോയിൽ. കൂടുതെ വ്യത്യസ്ത ലേഔട്ടിലുള്ള സീറ്റിങ് അറേഞ്ചുമെന്റുകളുമുണ്ടാകും. സ്കോർപിയോ എൻ എന്ന പേരിലാണ് പുതിയ വാഹനം വിപണിയിലെത്തുക. നിലവിലെ സ്കോർപിയോ ചെറിയ മാറ്റങ്ങൾ വരുത്തി ക്ലാസിക് എന്ന് പേരിൽ നിലനിർത്തിയാണ് പുതിയ മോഡൽ പുറത്തിറക്കുക.
സ്റ്റൈലിഷ് ഡിസൈൻ
അടിമുടി മാറ്റങ്ങളുമായിട്ടാണ് പുതിയ സ്കോർപിയോയുടെ വരവ്. മഹീന്ദ്രയുടെ പുതിയ ലോഗോയുമായി എത്തുന്ന രണ്ടാമത്തെ വാഹനമാണ് സ്കോർപിയോ എൻ. എക്സ്യുവി 700 ന് സമാനമായ ഗ്രില്ലാണ്. ഹണികോംബ് ഫിനിഷുള്ള എയർഡാമുകളാണ്. സിൽവർ നിറത്തിലുള്ള സ്കിഡ് പ്ലേറ്റുകളുമുണ്ട്. ഡ്യുവൽ പോഡ് ഹെഡ്ലാംപും മസ്കുലർ ഷോൾഡർ ലൈനുമുണ്ട്. വശങ്ങളിൽ മസ്കുലറായ വീൽആർച്ചുകളാണ്. പിൻഭാഗവും മനോഹരം തന്നെ. മുംബൈയിലെ മഹീന്ദ്ര ഇന്ത്യ ഡിസൈൻ സ്റ്റുഡിയോയിൽ ഡിസൈൻ ചെയ്ത് ചെന്നൈയിലെ മഹീന്ദ്ര റിസേർച്ച് വാലിയിൽ എൻജിനീയറിങ് ചെയ്താണ് വാഹനം പുറത്തിറങ്ങുന്നത്.
സ്കോർപിയോ എന്ന ഇതിഹാസം
മഹീന്ദ്രയുടെ മുഖം മാറ്റിയ വാഹനമാണ് സ്കോർപിയോ. 2002 ൽ ഇന്ത്യൻ വിപണിയിലെത്തിയ വാഹനം രാജ്യാന്തര വിപണിയിൽ പുറത്തിറങ്ങുന്ന ആദ്യ മഹീന്ദ്രയാണ്. തുടർന്നിങ്ങോട്ട് ഇന്ത്യൻ എസ്യുവി വിപണിയുടെ മുഖം തന്നെയായി സ്കോർപിയോ. നീണ്ട 20 വർഷമായി നിർമാണത്തിലുള്ള വാഹനത്തിന്റെ മൂന്ന് ഫെയ്സ്ലിഫ്റ്റുകൾ വിവിധ കാലങ്ങളിലായി വിപണിയിലെത്തിയിട്ടുണ്ട്.
എൻജിൻ വിവരങ്ങൾ പുറത്തുവിട്ടില്ല
പൂർണമായും പുതിയ രൂപത്തിലെത്തുന്ന വാഹനമായിരിക്കും അടുത്ത തലമുറ സ്കോർപിയോ. ഒരു വർഷത്തിലേറെയായി ഇന്ത്യൻ റോഡിലൂടെ പരീക്ഷണയോട്ടം നടത്തുന്നുണ്ട് വാഹനം. മഹീന്ദ്രയുടെ ലാഡർ ഫ്രെയിമിലാണ് പുതിയ സ്കോർപിയോ നിർമിക്കുന്നത്. ഥാറിലും എക്സ്യുവി 700 ലും ഉപയോഗിക്കുന്ന പുതിയ എൻജിനായിരിക്കും സ്കോർപിയോയിലും. പ്രീമിയം ഇന്റീരിയര്, ഏറ്റവും പുതിയ സാങ്കേതികവിദ്യ തുടങ്ങി ഏറ്റവും ആധുനിക സവിശേഷതകളോടെ പുറത്തിറങ്ങുന്ന സ്കോര്പിയോ-എന്നിന്റെ മാനുവല്, ഓട്ടമാറ്റിക് പതിപ്പുകള് ലഭ്യമാണ്. പെട്രോള്, ഡീസല് എന്ജിനുകളില് ഇവ ലഭിക്കും. വാഹനത്തിന് നാലുവീൽ ഡ്രൈവ് മോഡലുമുണ്ടാകും.
ഉടൻ വിപണിയിൽ
സ്കോർപിയോ എൻ ജൂൺ 27 ന് വിപണിയിലെത്തും. ഇന്ത്യൻ വിപണിയിൽ മാത്രമല്ല രാജ്യാന്തര വിപണിയിലും പുതിയ വാഹനം മഹീന്ദ്ര വിൽപനയ്ക്ക് എത്തിക്കുമെന്നാണ് പ്രതീക്ഷ.
English Summary: Mahindra Scorpio N interior revealed ahead of June 27 launch