ഡീസൽ എൻജിൻ കരുത്തേകുന്ന ‘സെലേറിയൊ’ മാരുതി സുസുക്കി ഇന്ത്യ ലിമിറ്റഡ് മൂന്നിന് അവതരിപ്പിക്കും. മാരുതി സുസുക്കി സ്വന്തമായി വികസിപ്പിച്ച 793 സി സി, ഇരട്ട സിലിണ്ടർ ഡീസൽ എൻജിൻ കരുത്തേകുന്നു എന്നതാണ് ‘സെലേറിയൊ ഡി ഡി ഐ എസ് 125’ എന്നു പേരിട്ട പുതിയ കാറിന്റെ പ്രധാന സവിശേഷത. 3500 ആർ പി എമ്മിൽ പരമാവധി 47 ബി എച്ച് പി കരുത്താണ് ഈ ഡീസൽ എൻജിൻ സൃഷ്ടിക്കുക; 2000 ആർ പി എമ്മിൽ പരമാവധി 125 എൻ എം ടോർക്കും.
ഇതിനു പുറമെ രാജ്യത്തെ ഏറ്റവും പ്രവർത്തന ചെലവു കുറഞ്ഞ കാർ എന്ന പെരുമയും ഡീസൽ ‘സെലേറിയൊ’യ്ക്കു സ്വന്തമാണ്; ലീറ്ററിന് 27.62 കിലോമീറ്ററാണു ‘സെലേറിയൊ ഡി ഡി ഐ എസ് 125’ കാറിന് ഓട്ടമൊബീൽ റിസർച് അസോസിയേഷൻ ഓഫ് ഇന്ത്യ(എ ആർ എ ഐ) സാക്ഷ്യപ്പെടുത്തുന്ന ഇന്ധനക്ഷമത.
മാരുതി സുസുക്കിയുടെ മറ്റു മോഡലുകളെ പോലെ മൂന്നു വകഭേദങ്ങളിലാവും ‘സെലേറിയൊ ഡി ഡി ഐ എസ് 125’ വിൽപ്പനയ്ക്കെത്തുക: എൽ ഡി ഐ, വി ഡി ഐ, സെഡ് ഡി ഐ. എല്ലാ വകഭേദങ്ങളിലും അഞ്ചു സ്പീഡ് മാനുവൽ ഗീയർ ബോക്സാവും ട്രാൻസ്മിഷൻ. പെട്രോൾ ‘സെലേറിയൊ’യെ ജനപ്രിയമാക്കുന്ന ഓട്ടമേറ്റഡ് മാനുവൽ ട്രാൻസ്മിഷൻ(എ എം ടി) ഉടനൊന്നും ഡീസൽ എൻജിനൊപ്പം ഇടംപിടിക്കാൻ സാധ്യതയില്ല.
പെട്രോൾ വകഭേദങ്ങൾക്കു സമാനമായ അക്കത്തളമാവും ഡീസൽ എൻജിനുള്ള ‘സെലേറിയൊ’യിലുമെന്നാണു സൂചന. അതേസമയം പെട്രോൾ എൻജിനുള്ള ‘വി ഡി ഐ’യിൽ നിന്നു വ്യത്യസ്തമായി ഡീസൽ വകഭേദത്തിൽ ആന്റി ലോക്ക് ബ്രേക്ക്(എ ബി എസ്) സംവിധാനം കൂടി ലഭ്യമാക്കാനും സാധ്യതയേറെയാണ്. അതുപോലെ നിലവിലുള്ള ‘സെലേറിയൊ’യെ അപേക്ഷിച്ച് മുക്കാൽ ലക്ഷത്തോളം രൂപ അധിക വിലയ്ക്കാവും ഡീസൽ എൻജിനുള്ള മോഡൽ വിൽപ്പനയ്ക്കെത്തുക.
ചെറുകാറുകൾക്കു പുറമെ വൈകാതെ അവതരിപ്പിക്കുന്ന ലഘുവാണിജ്യ വാഹന(എൽ സി വി)ത്തിനു കൂടി ഉപയോഗിക്കാവുന്ന ഡീസൽ എൻജിൻ വികസിപ്പിക്കാനുള്ള ശ്രമം മാരുതി സുസുക്കി ആരംഭിച്ചിട്ട് ഏറെ നാളായി. ‘വൈ നയൻ ടി’ എന്ന കോഡ് നാമത്തിൽ വികസിപ്പിക്കുന്ന എൽ സി വിയിലാവും പുതിയ ഡീസൽ എൻജിൻ അരങ്ങേറുകയെന്നാണു നേരത്തെ കേട്ടിരുന്നത്. എന്നാൽ ‘സെലേറിയൊ’യിലൂടെ തന്നെ പുതിയ ഡീസൽ എൻജിനെ പുറത്തിറക്കാനാണ് ഇപ്പോൾ മാരുതി സുസുക്കി തീരുമാനിച്ചിരിക്കുന്നത്.