sections
MORE

‌‌ഓവർടേക്കിങ്ങിന്റെ മനഃശാസ്ത്രം, നിങ്ങൾ ഏതുതരം ഡ്രൈവർ ?

HIGHLIGHTS
  • അൽപ്പമൊന്ന് ശ്രദ്ധിച്ചാൽ ആർക്കും സുരക്ഷിതമായി ഓവടേക്ക് ചെയ്യാൻ സാധിക്കും
  • വാഹനത്തെ മറികടക്കാൻ കഴിയും എന്ന് നൂറ് ശതമാനം വിശ്വാസം ഉണ്ടായിരിക്കണം
177042345
Overtaking
SHARE

കേരളത്തിലെ റോഡുകൾ ദേഷ്യം തീർക്കാനുള്ള സ്ഥലമായി മാറി കഴിഞ്ഞിരിക്കുന്നു. ദിനംപ്രതി നിരവധി ജീവനുകളാണ് റോഡിൽ പൊലിയുന്നത്. അമിതവേഗവും തെറ്റായിട്ടുള്ള മറികടക്കലും മൂലം കേരളത്തിലെ റോഡുകളിൽ  ജീവൻ നഷ്ടപ്പെട്ടവരുടെ എണ്ണം വളരെ കൂടുതലാണ്. വാഹനാപകടങ്ങൾ സംഭവിക്കുന്നതിനുള്ള പ്രധാന കാരണം അമിതവേഗതയും, തെറ്റായ ഓവർ ടേക്കിങ്ങ് ശീലവുമാണ്.

വളരെയധികം ശ്രദ്ധയോടെ ചെയ്യേണ്ട ഒന്നാണ് ഓവര്‍ടേക്കിങ്. അൽപ്പമൊന്ന് ശ്രദ്ധിച്ചാൽ ആർക്കും സുരക്ഷിതമായി ഓവടേക്ക് ചെയ്യാൻ സാധിക്കും. ദൃതി കാണിക്കാതെ, മുന്നിലും പുറകിലും ശ്രദ്ധ കൊടുത്ത് അപകടം ഇല്ല എന്ന് ഉറപ്പ് വരുത്തി ഓവർ ടേക്ക് ചെയ്യാണം.  മുന്നിലെ  റോഡ് വ്യക്തമായി കാണാന്‍ കഴിയുന്ന സാഹചര്യങ്ങളിൽ മാത്രമേ ഓവർ ടേക്ക് ചെയ്യാവൂ. നാലു തരത്തിലാണ് പ്രധാനമായി ആളുകൾ ഓവർടേക്ക് ചെയ്യുന്നത്.

പക്വതയോടുകൂടി  ഓവർടേക്കിങ്

ഇതിൽ ആദ്യത്തെ വിഭാഗം ആളുകൾ വളരെ  ശ്രദ്ധയോടുകൂടി വാഹനങ്ങളെ മറികടക്കാൻ ശ്രമിക്കുന്നവരാണ്. മുന്നിൽ ആവശ്യത്തിന് സ്ഥലമുണ്ടെന്നും വാഹനങ്ങളൊന്നും വരുന്നില്ല എന്ന് ഉറപ്പു വരുത്തി, മുന്നിൽ പോകുന്ന വാഹനത്തിന്റെ  ഡ്രൈവറെ ഹോണടിച്ചു തന്റെ വാഹനം കയറി വരുന്നുണ്ടെന്ന സൂചന നൽകി കൊണ്ട് വളരെ പക്വതയോടുകൂടി  ഓവർടേക്ക്  ചെയ്ത് ഇവർ കടന്നു പോകും.

അതിസാഹസികം

രണ്ടാമത്തെ വിഭാഗം ആളുകൾ അപകടകരമായ രീതിയിൽ ഓവർടേക്ക് ചെയ്യുന്നവനാണ്. വാഹനം കടന്നുപോകാൻ  മുന്നിൽ കഷ്ടിച്ച് അൽപം വഴി മാത്രം  ഉണ്ടായിരിക്കുകയും എതിർ ദിശയിൽ നിന്നു വളരെ വേഗത്തിൽ വാഹനങ്ങൾ വന്നു കൊണ്ടിരിക്കുമ്പോൾ ഇവർ ഓവർടേക്ക് ചെയ്യാൻ ശ്രമിക്കും. ആക്സിലറേറ്ററിൽ കാലമർത്തി മുന്നിൽ പോകുന്ന വാഹനത്തിന്റേയും എതിർ ദിശയിൽ നിന്ന് വരുന്ന വാഹനത്തിന്റേയും ഇടയിലൂടെയും  അതിസാഹസികമായി മരണത്തെ മുന്നിൽ കണ്ട് കഷ്ടിച്ച് രക്ഷപെട്ട്  കടന്നു പോകും. ഈ ശീലം അത്യന്തം അപകടകരമാണ്. ഒന്നോ രണ്ടോ തവണ  ഇങ്ങനെ ഓവർടേക്ക് ചെയ്യുമ്പോൾ രക്ഷപ്പെട്ടൂ എന്ന് വരാം. എന്നാൽ ഭാഗ്യം എപ്പോഴും കൂടെ ഉണ്ടാകണമെന്നില്ല.

പേടിയോടെ ഓവർടേക്കിങ്

ഇനി മൂന്നാമത്തെ വിഭാഗം ആളുകൾ വളരെ പേടിയോട്‌ കൂടെ ഓവർടേക്ക് ചെയ്യാൻ ശ്രമിക്കുന്നവരാണ്.വാഹനം ഓടിക്കാൻ ശ്രമിക്കുന്ന തുടക്കകാർ പലപ്പോഴും ഈ രീതിയിലാണ് ഓവർടേക്ക് ചെയ്യാൻ ശ്രമിക്കുക. മുന്നിൽ പോക്കുന്ന വാഹനത്തെ   ഓവർടേക്ക് ചെയ്ത്  തുടങ്ങുമ്പോൾ ഇത്തരക്കാർക്ക് പേടി തോന്നിത്തുടങ്ങും. തൊട്ട് മുന്നിലുള്ള വാഹനത്തെ മറികടക്കാൻ കഴിയുമോ എന്ന് ആശങ്കപ്പെട്ട്   മുന്നിൽ പോകുന്ന വാഹനത്തിന്റെ പകുതി കടന്നു  ഓവർടേക്ക് ചെയ്യണോ വേണ്ടയോ എന്ന് തീരുമാനിക്കാനാവാതെ  ഒടുവിൽ പിൻ വാങ്ങേണ്ടി വരും. ഈ സമയത്ത് എതിർ ദിശയിൽ നിന്നു വേഗത്തിൽ വാഹനങ്ങൾ കടന്നു വന്നാൽ വലിയ അപകടം സംഭവിക്കാം.

മുട്ടിയുരുമി...

നാലാമത്തെ വിഭാഗം ആളുകൾ മുന്നിൽ പോകുന്ന വാഹനത്തിന്റെ പുറകിൽ മുട്ടി മുട്ടിയില്ല എന്ന തരത്തിൽ വാഹനം ഓടിച്ച് അൽ‌പം ഇടകിട്ടിയാൽ  ഓവർടേക്ക് ചെയ്യാൻ ശ്രമിക്കും. ഇങ്ങനെ വാഹനം ഓടിക്കുമ്പോൾ മുന്നിൽ പോകുന്ന വാഹനത്തിന്റെ മറവ് കൊണ്ട്, എതിർ ദിശയിൽ നിന്ന് വരുന്ന  വാഹനങ്ങളോ വഴിയോ കാണാൻ സാധിക്കില്ല. ഈ സമയത്ത് ഓവർടേക്ക് ചെയ്യുന്നത് എതിർ വശത്ത് നിന്ന് വരുന്ന വാഹനവുമായി കൂട്ടി ഇടിക്കുന്നതിന് കാരണമാകാം.

അപകടം സംഭവിക്കാതെ

മുന്നിലെ വാഹനത്തെ മറികടക്കാൻ കഴിയും എന്ന് നൂറു ശതമാനം വിശ്വാസം ഉണ്ടായിരിക്കണം. ഓവർടേക്ക് ചെയ്യുമ്പോൾ മറികടക്കേണ്ട വാഹനത്തോട് ചേർത്ത് തൊട്ട് തൊട്ടില്ല എന്ന രീതിയിൽ ഓവർ ടേക്ക് ചെയ്യുന്നവരുണ്ട്. വാഹനം കടന്നു പോകാൻ വലത് വശത്ത് ആവിശ്യത്തിന് സ്ഥലം ഉണ്ടെങ്കിൽ കൂടിയും  ഡ്രൈവിങ്ങിൽ താനൊരു വിദദ്ധനാണെന്ന് മറ്റുള്ളവരെ കാണിക്കാനാണ് ഒട്ടുമിക്കവരും  ഈ രീതിയിൽ ഓവർ ടേക്ക് ചെയ്യുന്നത്. മറ്റു വാഹനങ്ങൾക്ക് ഒരു തരത്തിലും അസൗകര്യമുണ്ടാക്കാത്ത തരത്തിലായിരിക്കണം എപ്പോഴും ഓവർ ടേക്ക് ചെയ്യേണ്ടത്. 

ഒരു വാഹനം മറ്റൊരു വാഹനത്തെ ഓവർടേക്ക് ചെയ്യാൻ ശ്രമിക്കുമ്പോഴോ  പിന്നില്‍നിന്നു വരുന്ന വാഹനം നമ്മുടെ  വാഹനത്തെ  മറികടക്കാൻ ശ്രമിക്കുമ്പോഴോ   വാഹനത്തിന്റെ വേഗത കുറച്ച് അവർക്ക് ഓവർടേക്ക് ചെയ്യാൻ  ഉള്ള അവസരം നൽകണം. വലതുവശത്തുകൂടി മാത്രമേ ഓവര്‍ടേക്ക് ചെയ്യാവൂ എന്നതാണ് നിയമം .എങ്കിലും ചില ആളുകൾ ഇടതുവശത്തൂടെയും ഓവർടേക്ക് ചെയ്യുന്നത് കാണാം. മുന്നിൽ പോകുന്ന വാഹനം റോഡിന്റെ മധ്യഭാഗത്ത് എത്തി വലത്തേയ്ക്ക് സിഗ്നൽ നൽകിയെങ്കിൽ മാത്രം ഇടതു വശത്ത് വഴി ഓവർ ടേക്ക് ചെയ്യാവുന്നതാണ്. എന്നാൽ ഇതു വളരെ ശ്രദ്ധയോട് കൂടി ചെയ്യണം. നിർത്തിയിട്ടിരിക്കുന്ന വാഹനങ്ങളെ ഓവർടേക്ക് ചെയ്യുമ്പോൾ വളരെയധികം ശ്രദ്ധിക്കണം.ആ വാഹനത്തിൽ നിന്നു ഇറക്കുന്ന ആളുകൾ മിക്കപ്പോഴും ആ വാഹനത്തിന്റെ  മുന്നിലൂടെയും ,പിന്നിലൂടെയും റോഡ് മുറിച്ച് കടക്കാൻ സാധ്യയുണ്ട്. അതു മനസ്സിൽ വെച്ച് കൊണ്ട് വേണം വാഹനം ഓടിക്കാൻ.ചില ആളുകൾ കയറ്റത്ത് ഓവർ ടേക്ക് ചെയ്യാൻ ശ്രമിക്കാറുണ്ട്. കയറ്റം കയറുമ്പോൾ വാഹനത്തിന്റെ വേഗത തീർത്തു കുറവായിരിക്കും ഈ സമയത്ത് എതിർ വശത്ത് നിന്നും അമിത വേഗത്തിൽ ആകാം  വാഹനങ്ങൾ മിക്കവാറും കടന്നു വരിക. ഒരു വളവും കൂടിയാണ് എങ്കിൽ അപകടം സംഭവിക്കാതെ രക്ഷപെട്ടാൽ ഭാഗ്യം എന്ന് പറയാം. നാലും കൂടുന്ന കവലകൾ ,ഇടുങ്ങിയ പാലം, സീബ്രാലൈൻ നാലും കൂടുന്ന ജംഷ്ൻ എന്നിവിടങ്ങളിൽ ഓവർ ടേക്കിങ്ങ് പാടില്ല.

ഓവർടേക്ക് ചെയ്യാൻ ഉള്ള തീരുമാനം രണ്ടു പ്രധാനപ്പെട്ട കാര്യങ്ങളുമായി ബന്ധപ്പെട്ടാണ് ഇരിക്കുന്നത്. ഇവയിൽ ആദ്യം വേണ്ടത് നല്ല ആത്മവിശ്വാസമാണ്. മുന്നിൽ പോകുന്ന വാഹനത്തെ മറികടന്ന് പോകാൻ ഉള്ള സ്ഥലം ഉണ്ട് എന്നും, എനിക്ക് അതിന് കഴിയും എന്ന  വിശ്വാസം ആദ്യം ഉണ്ടായിരിക്കണം. ഇനി ആത്മവിശ്വാസം അമിതമായി പോയാൽ, അതും  പ്രശ്നമാണ്. 

ഡ്രൈവിങ്ങിൽ ഞാനൊരു വൈദഗ്‌ദ്ധ്യമുള്ളവനാണെന്നും,"ഏതൊര് സാഹചര്യത്തിലും ഓവർ ടേക്ക് ചെയ്യാൻ എനിക്ക്  കഴിയും" എന്നെക്കെയുള്ള അമിതമായ  ആത്മവിശ്വാസം  അപകടം വിളിച്ച് വരുത്തും . രണ്ടാമത്തെ  പ്രധാനപ്പെട്ട  കാര്യം  ഭയവുമായി ബന്ധപ്പെട്ടതാണ്. ഉള്ളിൽ വല്ലാത്ത ഭയത്തോടെയാണ് ഓവർ ടേക്ക് ചെയ്യുന്നതെങ്കിൽ മുന്നിൽ പോകുന്ന വാഹനത്തെ പൂർണ്ണമായും ഓവർ ടേക്ക് ചെയ്ത് കടന്ന് പോകാൻ സാധിച്ചെന്ന് വരില്ല. ഇതും അപകടം വരുത്തി വെക്കും.അല്പം ഒന്നു ശ്രദ്ധിച്ചാൽ ഓവർ ടേക്കിങ്ങ് മൂലമുള്ള അപകടങ്ങൾ ഇല്ലാതാക്കാൻ കഴിയും. ജീവിതത്തിൽ നിങ്ങൾ ആരുമായിക്കോട്ടേ എന്നാൽ റോഡിൽ നിങ്ങൾ വെറും ഡ്രൈവർ മാത്രമാണെന്ന് ഓർക്കുക.

ക്ലനിക്കൽ സൈകോളജിസ്റ്റും എംജി യൂണിവേഴ്സിറ്റി സ്കൂൾ ഓഫ് ബിഹേവിയറൽ സയൻസസ് അധ്യാപകനുമാണ് ലേഖകൻ
erani1983@gmail.com

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN FEATURES
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
FROM ONMANORAMA