റിമ്മുകൾ ചേർത്തൊരു ‘സൈക്കിൾ’ ബസ് സ്റ്റോപ്
Mail This Article
ഇൻസ്റ്റലേഷൻ എന്ന വാക്കു നമുക്കു സുപരിചിതമായത് ബിയനാലെ കൊച്ചിയിലെത്തിയപ്പോഴാണ്. ഉപയോഗശൂന്യമായ വസ്തുക്കളെ കലാപരമായി കൂട്ടിയോജിപ്പിച്ച് നിർമിതികളുണ്ടാക്കുന്ന രീതിയെ കലാലോകം ഇൻസ്റ്റലേഷൻ എന്നുവിളിച്ചു.
തൃപ്പൂണിത്തുറ– കോട്ടയം പാതയിൽ പുതിയകാവ് വളവിലെ ഈ ബസ് സ്റ്റോപ്പിനെയും ഇൻസ്റ്റലേഷൻ എന്നുവിളിക്കാം. കലാപരമായ മൂല്യത്തോടൊപ്പം ഉപയോഗക്ഷമതയുമുള്ള ഇൻസ്റ്റലേഷൻ. പഴയ സൈക്കിൾ പാർട്സുകൾ ചേർത്താണ് ഈ ബസ് കാത്തിരിപ്പുകേന്ദ്രം ഒരുക്കിയിട്ടുള്ളത്. ഏറെപ്പേർ പഴയ സൈക്കിൾ റിമ്മുകൾ സംഭാവന ചെയ്തു. പിന്നെ വിലകൊടുത്തു വാങ്ങുകയും ചെയ്തു. ഇവയെല്ലാം സുന്ദരമായി പെയിന്റ് ചെയ്ത് കാത്തിരിപ്പുകേന്ദ്രത്തിന്റെ ഭിത്തികൾ ഒരുക്കി. ഇരിപ്പിടം കൂടുതൽ കൗതുകമുണർത്തും.
സാമൂഹിക അകലമിട്ടു സ്ഥാപിച്ച സൈക്കിൾ കാരിയറുകൾ ആണ് ഇവ. ഈ കാരിയറുകൾ മാത്രം പുതിയവയാണ്. തുരുമ്പുകൊണ്ട് അപകടമുണ്ടാകരുത് എന്ന ചിന്തയാണ് ഇതിനു പിന്നിൽ. മുൻപ് കാരിയറിലിരുന്നു സഞ്ചരിച്ചിരുന്നവർക്ക് ഗൃഹാതുരമായ ഓർമകൾ പുതുക്കാൻ ഇതിലും നല്ലൊരു ഇരിപ്പിടമില്ല. സൈക്കിൾ റിമ്മുകൾക്കിടയിലും വശങ്ങളിലും കുപ്പികളിൽ അലങ്കാരച്ചെടികളും തൂക്കിയിട്ടുണ്ട്. സിപിഎം എട്ടെന്നിൽ ബ്രാഞ്ച് കമ്മിറ്റിയാണ് ഈ സുന്ദരമായ സൈക്കിൾ ബസ് സ്റ്റോപ്പിന്റെ നിർമാണത്തിനു പിന്നിൽ.
English Summary: Bus Shelter Made From Old Cycle Rims