ഇഗ്നിസിനെ സുസുക്കി ഉപമിക്കുന്നത് സ്മാർട്ട് ഫോണിനോടാണ്. ചക്രങ്ങളുള്ള സ്മാർട്ട് ഫോൺ. എന്തിനും ഏതിനും ഫോണിനെ ആശ്രയിക്കുന്ന പുതുതലമുറയ്ക്കു പറ്റിയ വാഹനം. മെഴ്സെഡിസ് കാറുകളിൽ മാത്രം കണ്ടിട്ടുള്ള ടാബ്ലറ്റിനു സമാനമായ ഡാഷ്ബോർഡ് കൺസോൾ ഈ സ്മാർട്ട് ഫോൺ ബന്ധം അന്വർത്ഥമാക്കുന്നു. ആൻഡ്രോയിഡ് ഓട്ടൊ, ആപ്പിൾ കാർ പ്ലേ, മിറർ ലിങ്ക് തുടങ്ങിയ സംവിധാനങ്ങൾ ഏതു സ്മാർട്ട് ഫോണുമായി ഞൊടിയിടയിൽ ബന്ധം സ്ഥാപിച്ച് ഇഗ്നിസിനെ സ്മാർട്ടാക്കുകയും ചെയ്യും.
∙ റെട്രോ ലുക്ക്സ്: എൺപതുകളിലെയോ അതിലും പഴയ കാലത്തെയോ രൂപകൽപനയോടുള്ള സാദൃശ്യം യാദൃശ്ചികമല്ല. കാറുകൾ കുടുതൽ മിടുക്കരായ കാലത്തിന്റെ സ്മാരകമായി ഒരു രൂപം കൊടുത്തതാണ്. എന്തായാലും ഇഗ്നിസിന് ഈ രൂപം ക്ലാസിക് ഭംഗിയല്ല യുവത്വമാണ് നൽകുന്നത്. ഉറപ്പും ശക്തിയും തോന്നിക്കുന്നതിനു മുഖ്യകാരണങ്ങൾ ഇവയൊക്കെ. സിംഗിൾ ഫ്രേം ഗ്രിൽ, ചതുര വടിവുള്ള എൽ ഇ ഡി പ്രൊജക്ടർ ഹെഡ് ലാംപ്, ആവശ്യത്തിനു മാത്രമുള്ള ക്രോമിന്റെ ഉപയോഗം, വലിയ വീൽ ആർച്ചുകൾ. കറുത്ത അലോയ് വീലുകൾ മറ്റധികം കാറുകളിൽ കാണില്ല.
∙ പുതുമ തന്നെ പുതുമ: ഉള്ളിലും ഇതേ റാഡിക്കൽ രൂപഗുണം പിന്തുടരുന്നു. കറുപ്പും എവെറിയും ചേർന്ന ഫിനിഷ്. ടാബ്ലറ്റിനു സമമായ സെൻട്രൽ കൺസോളിലാണ് മാപ്പും ഓഡിയോ സിസ്റ്റവും റിവേഴ്സ് ക്യാമറയുമൊക്കെ. കോക് പിറ്റ് സ്റ്റൈലിങ്ങിലുള്ള സ്വിച്ചുകളും എ സി പാനലും. ബോഡി നിറം തന്നെ ഉൾ ഹാൻഡിൽ ബാറിനും മറ്റു ചില ഘടകൾക്കും നൽകിയതും പുതുമ.
∙ പന്തുകളിക്കാൻ ഇടം: വലിയ ക്യാബിൻ. അത്യാവശ്യത്തിനു സ്ഥല സൗകര്യമുണ്ട്. ഉയർന്ന നിൽപ് പ്രവേശനം അനായാസമാക്കും. ധാരാളം കുഷനിങ്ങുള്ള സീറ്റുകൾ സുഖകരമായ ഇരിപ്പ് നൽകുന്നു.265 ലീറ്റർ ബൂട്ട്. 60—40 സ്പ്ലിറ്റ് സീറ്റ്. എന്നാൽ നഗര ഉപയോഗങ്ങൾക്കു പറ്റിയ ഒതുക്കവും ഹാൻഡ്ലിങ്ങും.
∙ ഡിവൈസ് ഫ്രണ്ട്‌ലി: ആൻഡ്രോയിഡ്, ആപ്പിൾ ഫോണുകൾക്ക് അനായാസം പെയർ ചെയ്യനാവുന്ന സംവിധാനങ്ങൾ. വോയിസ് കമാൻഡുകൾ ഇഗ് നിസ് അനുസരിക്കും. ഓഡിയോ പ്ലേയറിനു പുറമെ ഗൂഗിൾമാപ്പും കോളുകളും മെസേജിങ്ങും അടക്കമുള്ള ഫോൺ സംവിധാനങ്ങളുമൊക്കെ ഈ ടച് സ്ക്രീൻ സിസ്റ്റത്തിൽ അനായാസമാണ്.
∙ സുരക്ഷയിൽ വിട്ടുവീഴ്ചയില്ല: എല്ലാ മോഡലിനും രണ്ട് എയർ ബാഗ്, എ ബി എസ്, ഇ ബി ഡി സൗകര്യം. ഭാവികൂടി പരിഗണിച്ചാണ് ഇഗ് നിസിലെ സുരക്ഷാ ഏർപ്പാടുകൾ. രൂപകൽപനാ തലത്തിലുള്ള സുരക്ഷാ പരിഗണനകൾ ഏറ്റവും സുരക്ഷയുള്ള ചെറുകാറായി ഇഗ് നിസിനെ ഉയർത്തുന്നു.
∙ ഓട്ടൊ ഷിഫ്റ്റ്: ഡീസലിലും പെട്രോളിലും ഓട്ടൊ ഷിഫ്റ്റ് ഗീയർ ലഭിക്കും. സുഖകരമായ ഡ്രൈവിങ്. ഈ സംവിധാനം മറ്റേതു കാറുകളിലുള്ളതിലും മിക‘ച്ച രീതിയിൽ ഇഗ്നിസിൽ പ്രവർത്തിക്കുന്നുണ്ട്. സാധാരണ ഓട്ടമാറ്റിക് കാറുകളോടു പ്രവർത്തനത്തിൽ കിടപിടിക്കും ഈ മാനുവൽ ഓട്ടമാറ്റിക്. ഈ വിഭാഗത്തിൽ ഡീസൽ ഓട്ടമാറ്റിക് കാറുകൾ വേറെയില്ല എന്നതും ശ്രദ്ധേയം.
∙ ഫൺ ഡ്രൈവ്: ഡീസലായാലും പെട്രോളായാലും ഓടിക്കാൻ നല്ല സുഖം. ആയാസ രഹിതം. മിക‘ച്ച മാനുവബിലിറ്റി. ഒന്നാന്തരം നിയന്ത്രണം. 160 കിലോമീറ്റർ വരെ വേഗമെടുത്തു നോക്കിയിട്ടും ഇഗ്നിസ് പതറിയില്ല. വലുപ്പക്കുറവ് പാർക്കിങ്ങിനു മാത്രമല്ല തിരക്കിലൂടെയുള്ള ഡ്രൈവിങ്ങിനും കൊള്ളാം.
∙ മൈലേജ് വീരൻ: 1.3 ലീറ്റർ 55.2 കിലോവാട്ട് എൻജിന് 26.80 കി മി മൈലേജാണെങ്കിൽഡ 1.2 ലീറ്റർ 61 കിലോവാട്ട് പെട്രോളിന് 20.89 കി മി വരെ ഒരു ലീറ്ററിൽ കിട്ടും.
∙ വേഷം മാറ്റാം: ഉടമയുടെ ഇഷ്ടവേഷം ഇഗ്നിസിന് നൽകാം.റൂഫിനു പ്രത്യേക ഭംഗി നൽകുന്ന റൂഫ് റാപ്പുകൾ, വിങ് മിററിനു വ്യത്യസ്ത നിറങ്ങൾ, സ്പോയ്ലർ, ഫോഗ് ലാംപ് ഗാർനിഷ്, സ്കിഡ് പ്ലേറ്റുകൾ തുടങ്ങി ഒട്ടനവധി ആക്സസറികൾ കൊണ്ട് കാറിനെ കസ്റ്റസൈസ് ചെയ്യാം.
∙ വിധി: കണ്ടു ശീലിയച്ച സ്ഥിരം ശൈലിയിലുള്ള വാഹനങ്ങളുടെ ഇടയിൽ വ്യത്യസ്തനാണ് ഇഗ്നിസ്. യുവത്വം തുളുമ്പുന്ന ഈ വാഹനം വിപണിയിൽ തരംഗമാവുമെന്ന് പ്രതീക്ഷിക്കാം.
∙ വില: പെട്രോളിന് 4.75 ലക്ഷം മുതൽ 6.89 ലക്ഷം വരെ പെട്രോൾ ഒട്ടമാറ്റിക്ക് 5.92 ലക്ഷം മുതൽ 6.49 ലക്ഷം വരെ. ഡീസലിന് 6.58 ലക്ഷം മുതൽ 8.01 ലക്ഷം വരെ. ഡീസൽ ഓട്ടോമാറ്റിക്കിന് 7.14 ലക്ഷം മുതൽ 7.67 ലക്ഷം വരെ.
