ആദ്യം അമ്മയായത് 14–ാം വയസ്സിൽ; ഇപ്പോൾ മക്കൾ 21, വരുന്നു ഒരാൾ കൂടി!

ബർലിൻ ∙ യൂറോപ്പിലെ ഏറ്റവും വലിയ സന്തുഷ്ട കുടുംബത്തിലേക്ക് ഒരു അംഗംകൂടി കടന്നുവരുന്നു. ഇംഗ്ലണ്ടിലെ ബോണി– റാഡ്ഫോർഡ് ദമ്പതികൾക്കാണ് ഈ അസുലഭ ഭാഗ്യം. നാൽപത്തിയെട്ടും നാൽപത്തിനാലും പ്രായമുള്ള ഈ ബ്രിട്ടിഷ് ദമ്പതികൾക്ക് ഇതുവരെ 21 കുട്ടികളാണുള്ളത്. ഇവരുടെ ഇരുപത്തിരണ്ടാമത്തെ കുട്ടി 2020 ഏപ്രിൽ മാസം പിറക്കുമെന്ന് അമ്മ റാഡ്ഫോർഡ് സാമൂഹ്യ മാധ്യമങ്ങളിലൂടെ പുറംലോകത്തെ അറിയിച്ചു.

ഇപ്പോൾ 11 പെൺകുട്ടികളും 10 ആൺകുട്ടികളുമാണ് ദമ്പതികൾക്കുള്ളത്. ഇനി പിറക്കാൻ പോകുന്നത് ഒരു ആൺകുട്ടിയാണെങ്കിൽ 11-11 എന്ന മാജിക് സംഖ്യയിലാവും എന്ന് അമ്മ റാഡ്ഫോർഡ് പറഞ്ഞു.

ഏതാണ്ടു രണ്ടു ഫുട്ബോൾ ടീമിൽ കളിക്കാനുള്ള ടീം അംഗങ്ങൾ. ഇവരുടെ ആദ്യ കുട്ടി പിറന്ന് വീഴുന്നത് 1989–ൽ അത് റാഡ്ഫോർഡിന്റെ പ്രായം പതിനാല്. അച്ഛൻ ബോണിക്ക് പ്രായം പതിനെട്ട്. 1993–ൽ ഇവർ വിവാഹിതരായി. വിവാഹത്തിനുശേഷമാണ് രണ്ടാമത്തെ കുട്ടിയുടെ ജനനം. ഇരുപത്തി ഒന്നാമത്തെ കുട്ടി ജനിക്കുന്നത് 2018 നവംബറിൽ. ഒരു പെൺകുട്ടി. 22–ാമത്തെ കുട്ടി ജനിച്ചാലും ഒരു ഫാമിലി പ്ലാനിംഗിന് തയാറല്ല എന്നാണ് ആ വലിയ കുടുംബത്തിലെ അമ്മയുടെ നിലപാട്.