sections
MORE

മാതൃദീപം - ആൽബം പ്രകാശനം യുക്മ പേജിലൂടെ മാർ ജോസഫ് സ്രാമ്പിക്കൽ നിർവഹിക്കുന്നു

mathrudeepam
SHARE

ലണ്ടൻ∙ ലോകം മുഴുവൻ പ്രത്യേകിച്ച് ഇന്ത്യയിൽ കോവിഡ് വ്യാപനത്തിന്റെ ദുരിതങ്ങളിലൂടെ ജനങ്ങൾ ഇപ്പോൾ കടന്നു പോകുമ്പോൾ പരിശുദ്ധ ദൈവ മാതാവിന്റെ  മാധ്യസ്ഥം യാചിച്ചു കൊണ്ടുള്ള "മാതൃദീപം" ആൽബത്തിലെ 'നീ തുണയേകണമേ.. ലോക മാതേ'.....എന്നു തുടങ്ങുന്ന ഭക്തിസാന്ദ്രമായ മരിയൻ പ്രാർഥനാഗാനം ഗ്രേറ്റ് ബ്രിട്ടൻ സിറോ മലബാർ രൂപതാധ്യക്ഷൻ മാർ ജോസഫ് സ്രാമ്പിക്കൽ വെർച്വൽ പ്ലാറ്റ്ഫോമിലൂടെ ഇന്നു പ്രകാശനം ചെയ്യുന്നു.

യുക്മ ദേശീയ പ്രസിഡന്റ് മനോജ് കുമാർ പിള്ള, യുക്മ ദേശീയ ജനറൽ സെക്രട്ടറി അലക്സ് വർഗീസ്, യുക്മ ദേശീയ വൈസ് പ്രസിഡന്റ് അഡ്വ.എബി സെബാസ്റ്റ്യൻ, മലയാളം മിഷൻ യുകെ ചാപ്റ്റർ പ്രസിഡന്റും യുക്മ സാംസ്കാരിക വേദി രക്ഷാധികാരിയുമായ സി.എ. ജോസഫ്,  കൊച്ചിൻ കലാഭവൻ ലണ്ടൻ ഡയറക്ടർ ജെയ്സൺ ജോർജ്, യുക്മ സൗത്ത് വെസ്റ്റ് റീജിയൺ പ്രസിഡന്റും സേവനം യുകെ മുൻ ചെയർമാനുമായ ഡോ. ബിജു പെരിങ്ങത്തറ എന്നിവർ ആശംസകൾ നേരും. ഗായിക ആനി അലോഷ്യസിന്റെ പിതാവും ആൽബത്തിന്റെ ഗാനരചയിതാവുമായ അലോഷ്യസ് ഗബ്രിയേൽ കൃതജ്ഞത പ്രകാശിപ്പിക്കും . യുകെയിലെ അറിയപ്പെടുന്ന കലാകാരി ദീപാ നായർ അവതാരകയായി എത്തി ചടങ്ങിനു മികവേകും.

യുക്മ കലാതിലകം ആനി അലോഷ്യസ് ആലപിച്ച 'മാതൃ ദീപം' എന്നു പേരു നൽകിയിരിക്കുന്ന ഈ ആൽബം കോവിഡ് മാനദണ്ഡങ്ങൾ പാലിച്ച് മാതൃ ഭക്തിയുടെ നിറവിൽ അതീവമായ മനോഹാരിതയിൽ ഭക്തി സാന്ദ്രമായ ദൃശ്യാവിഷ്കരണം നൽകിയാണ് ചിത്രീകരിച്ചിരിക്കുന്നത്. ഇക്കഴിഞ്ഞ യുക്മ ദേശീയ കലാമേളയിൽ കലാതിലകമായി തെരഞ്ഞെടുക്കപ്പെട്ട യുകെയിലെ അറിയപ്പെടുന്ന ഗായികയായ ആനി അലോഷ്യസാണ്  പ്രാർഥനാനിർഭരമായ ഈ ഭക്തി ഗാനം ആലപിച്ചിരിക്കുന്നത്. ആനിയുടെ പിതാവ് അലോഷ്യസ് ഗബ്രിയേൽ ആണ് ഈ ആൽബത്തിലെ ഗാനത്തിനു രചന നിർവഹിച്ചിരിക്കുന്നത് എന്ന പ്രത്യേകതയുമുണ്ട്. ഹരീഷ് പാലയാണു സംഗീതം നൽകിയിരിക്കുന്നത്. ഓർക്കസ്ട്രേഷൻ ലിജോ ലീനോസ്. ക്യാമറ - എഡിറ്റിങ് നിർവഹിച്ചിരിക്കുന്നത് ജെയ്സൺ ലോറൻസും തോമസ് കളപ്പുരയിലും ചേർന്നാണ്.

കത്തോലിക്കാ വിശ്വാസികൾ ദൈവമാതാവിനോടുള്ള വണക്കമാസം ആയിട്ട് ഭക്തിപൂർവം ആചരിക്കുന്ന മേയ് മാസത്തിന്റെ ആദ്യ സുദിനത്തിൽ തന്നെ 'മാതൃ ദീപം' എന്ന പേരിൽ പരിശുദ്ധ ദൈവമാതാവിനോടുള്ള ഈ പ്രാർഥനാഗീതം പ്രകാശനം ചെയ്യാനും ഈ ഒരു ഗാനം ആലപിക്കാനും സാധിച്ചത് ദൈവാനുഗ്രഹമായി കരുതുകയാണെന്നു ഗായിക ആനി അലോഷ്യസ് പറഞ്ഞു. 

യുക്മ ഈസ്റ്റ് ആംഗ്ലിയ റീജിയണൽ കലോത്സവത്തിൽ രണ്ടു തവണ കലാതിലകവുമായി തിരഞ്ഞെടുത്തിട്ടുള്ള ആനി അലോഷ്യസ് കർണാട്ടിക് മ്യൂസിക്കും , വെസ്റ്റേൺ മ്യൂസിക്കും ശാസ്ത്രീയമായി അഭ്യസിച്ചിട്ടുണ്ട്. ആനിയുടെ സഹോദരൻ ടോണി അലോഷ്യസ് തുടർച്ചയായി രണ്ടു തവണ യുക്മ കലാപ്രതിഭയായി  തിരഞ്ഞെടുത്തിട്ടുള്ള വളർന്നുവരുന്ന യുകെയിലെ മികച്ച യുവ കലാ പ്രതിഭയുമാണ്. പിതാവ് അലോഷ്യസ്, മാതാവ് ജിജി, സഹോദരൻ ടോണി എന്നിവരോടൊപ്പം  ലണ്ടനിലെ ലൂട്ടനിൽ താമസിക്കുന്ന ആനി അലോഷ്യസ് അയിൽസ്ബറി  ഗ്രാമർ സ്കൂളിലെ എ ലെവൽ രണ്ടാം വർഷ വിദ്യാർഥിനിയുമാണ്. 

കഴിഞ്ഞവർഷം യുകെ ഉൾപ്പെടെയുള്ള ലോക രാജ്യങ്ങൾ  കൊറോണ മഹാമാരിയുടെ ഫലമായി അതിജീവനത്തിന്റെ പാതയിലൂടെ കടന്നു പോയ സമയത്ത് രോഗബാധിതരായവർക്ക് വേണ്ടി സ്വന്തം ജീവൻപോലും തൃണവൽഗണിച്ച് കരുതലിന്റെ സ്നേഹസ്പർശമായി ലോകം മുഴുവനിലുമുള്ള ആരോഗ്യ മേഖലകളിൽ ജോലിചെയ്തിരുന്ന ആരോഗ്യ പ്രവർത്തകർക്ക് ആദരവ് അർപ്പിച്ചുകൊണ്ടു യുക്മ സാംസ്കാരിക വേദി തുടർച്ചയായി നാലു മാസം സംഘടിപ്പിച്ച ‘Let’s Break It Together’ എന്ന ലൈവ് ടാലന്റ് ഷോയിലും ആനി അലോഷ്യസും സഹോദരൻ ടോണി അലോഷ്യസും  പങ്കെടുത്ത്  മികവാർന്ന കലാപരിപാടി നടത്തി ലോക മലയാളികളായ സംഗീതസ്വാദകരുടെ പ്രശംസ ഏറ്റുവാങ്ങിയിരുന്നു. വ്യത്യസ്തമായ സംഗീത ഉപകരണങ്ങളിൽ കഴിവ് തെളിയിച്ചിട്ടുള്ള കുട്ടികളായ കലാപ്രതിഭകളെ ഉൾപ്പെടുത്തി നടത്തിയ  ലൈവ് ടാലൻറ് ഷോയിൽ ആനി അലോഷ്യസും സഹോദരൻ ടോണി അലോഷ്യസും ചേർന്ന് വിവിധ സംഗീത ഉപകരണങ്ങളിൽ നാദവിസ്മയം തീർത്തു നടത്തിയ കലാവിരുന്ന് വീക്ഷിക്കുവാൻ പതിനായിരക്കണക്കിനു സംഗീതാസ്വാദകരാണ് എത്തിയത്.

വെർച്വൽ പ്ലാറ്റ്ഫോമായ സ്ട്രീംയാർഡിലൂടെ നടത്തുന്ന 'മാതൃദീപം' ആൽബം പ്രകാശനച്ചടങ്ങ് താഴെ കൊടുത്തിരിക്കുന്ന യുക്മയുടെ ഓഫീഷ്യൽ ഫേസ്ബുക്ക് പേജായ "യുക്മ(UUKMA)" ലൈവായി സംപ്രേഷണം ചെയ്യുന്നുണ്ട്. എല്ലാവരെയും  മഹനീയമായ ഈ വേദിയിലേക്കു സ്വാഗതം ചെയ്യുകയും സാന്നിധ്യം കൊണ്ട് ഈ ഉദ്യമം വിജയിപ്പിക്കണമെന്ന് യുക്മ ദേശീയസമിതി അഭ്യർഥിക്കുകയും ചെയ്യുന്നു.

https://www.facebook.com/uukma.org/

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN US
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

നിത്യജ്വാലയായ് ചെന്താരകം

MORE VIDEOS
FROM ONMANORAMA