57 വർഷം മുൻപ് 75 വയസ്സുകാരിയെ കൊലപ്പെടുത്തി: പ്രതി പിടിയിലായത് 92–ാം വയസ്സിൽ

ബ്രിസ്റ്റോൾ∙  57 വർഷം മുൻപ് 75 വയസ്സുകാരിയെ  കൊലപ്പെടുത്തിയ കേസിലെ പ്രതി അറസ്റ്റിൽ. നിലവിൽ 92  വയസ്സുള്ള ഇപ്‌സ്‌വിച്ചിലെ ക്ലാരൻസ് റോഡിൽ താമസിക്കുന്ന  റൈലാൻഡ് ഹെഡ്‌ലിയാണ് പ്രതി. പൊലീസ് നടത്തിയ വിശദമായ അന്വേഷണത്തിലാണ് കുറ്റവാളി പിടിയിലായത്. ഫോറൻസിക് സാങ്കേതികവിദ്യയുടെ സഹായത്തോടെയാണ് കുറ്റവാളിയെ തിരിച്ചറിഞ്ഞത്.

1967-ൽ നടന്ന ഈ കൊലപാതകം അന്ന് ബ്രിസ്റ്റോളിൽ വലിയ ചർച്ചയായിരുന്നു. എന്നാൽ, തെളിവുകളുടെ അഭാവം കാരണം കേസിൽ പ്രതിയെ പിടികൂടാൻ  പൊലീസിന് കഴിഞ്ഞിരുന്നില്ല. എന്നാൽ 57 വർഷം കഴിഞ്ഞിട്ടും പൊലീസ് അന്വേഷണം അവസാനിപ്പിച്ചിരുന്നില്ല. ആധുനിക സാങ്കേതികവിദ്യയുടെ സഹായത്തോടെയാണ് ഈ കേസിൽ ഇപ്പോൾ അറസ്റ്റ് നടന്നത്.

അറസ്റ്റിലായ 92 വയസ്സുകാരനെ ബ്രിസ്റ്റോൾ കോടതിയിൽ ഹാജരാക്കി. അദ്ദേഹത്തിനെതിരെ പീഡനം, കൊലപാതകം എന്നീ കുറ്റങ്ങൾ ചുമത്തിയിട്ടുണ്ട്. കേസ് ക്രൗൺ കോടതിയിലേക്ക് വിടുകയും തുടർ നടപടികൾക്കായി കാത്തിരിക്കുകയാണെന്നും രാജ്യാന്തര മാധ്യമങ്ങൾ റിപ്പോർട്ട് ചെയ്തു.