ജർമനിയിൽ മഞ്ഞുവീഴ്ച; നിരവധി കാറുകൾ കൂട്ടിയിടിച്ചു

ബർലിൻ ∙ ജർമനിയിലെ നോർത്ത്റൈൻ വെസ്റ്റ്ഫാലിയ സംസ്ഥാനത്തിലെ മാർൽ വ്യാവസായിക നഗരത്തിൽ മഞ്ഞുവീഴ്ച വലിയ അപകടങ്ങൾക്ക് കാരണമായി. ‌‌നിരവധി കാറുകൾ കൂട്ടിയിടിച്ചു. ‌ആർക്കും പരുക്കില്ല. അപകടസ്ഥലം പൊലീസ് നിയന്ത്രണത്തിലാണ്. 

ഈ മേഖലയിൽ മഞ്ഞ് സാധാരണ മഞ്ഞിനെക്കാൾ ഇടതൂർന്നതും കൂടുതൽ ഒട്ടിപ്പിടിക്കുന്നതും അപകടകരവുമാണ്. ഈ പ്രതിഭാസം പ്രധാനമായും വ്യാവസായിക പ്ലാന്‍റുകൾക്ക് സമീപമാണ് സംഭവിക്കുന്നത്. വൈദ്യുത നിലയങ്ങളും ഫാക്ടറികളും ചൂടുള്ളതും ഈർപ്പമുള്ളതുമായ വായുവും സൂക്ഷ്മ കണങ്ങളും പുറത്തുവിടുന്നതാണ് കാരണം. തണുത്ത വായുവിൽ ഇവ പെട്ടെന്ന് ഉയരുകയും തണുക്കുകയും ചെയ്യുന്നതുമൂലം അപകടകരമായ മഞ്ഞായി മാറും.

മാളിലെ കെമിക്കൽ പാർക്കിൽ നിന്നുള്ള ജലബാഷ്പം വ്യാവസായിക മഞ്ഞായി മാറിയതാണ് ഇവിടെ സംഭവിച്ചത്. ഈ പ്രതിഭാസം ശൈത്യകാലത്ത് ചില സാഹചര്യങ്ങളിൽ മാത്രമേ ഉണ്ടാകൂ. കടുത്ത തണുപ്പ്, സാധാരണയായി 2 ഡിഗ്രി സെൽഷ്യസിൽ താഴെ ആയിരിക്കണം. ‌ഈ കണങ്ങളിൽ ഈർപ്പം അടിഞ്ഞുകൂടുകയും മഞ്ഞ് രൂപപ്പെടുകയും ചെയ്യും. റോഡിലെ വ്യാവസായിക മഞ്ഞ് നീക്കം ചെയ്യാനും ഉപ്പ് വിതറാനും ഹൈവേയിലെത്തിയ ശൈത്യകാല സേവനത്തിന് പൊലീസ് മുന്നറിയിപ്പ് നൽകിയിട്ടുണ്ട്.