അമിത വേഗതയിൽ വന്ന കാർ ഇടിച്ചു; ഇ-സ്കൂട്ടറിൽ സഞ്ചരിച്ചിരുന്ന രണ്ട് കുട്ടികൾ മരിച്ചു

Mail This Article
എസെക്സ്∙ എസെക്സിലെ പിറ്റ്സിയയിൽ ഇ-സ്കൂട്ടറിൽ കാർ ഇടിച്ചുണ്ടായ അപകടത്തിൽ സഹോദരങ്ങൾ മരിച്ചു. റോമൻ കാസൽഡണും (16) സഹോദരി ഡാർസിയുമാണ് (9) മരിച്ചത്. ശനിയാഴ്ച വൈകുന്നേരം 6.25 ഓടെയാണ് അപകടം നടന്നത്.
30 മൈൽ വേഗപരിധിയുള്ള റോഡിൽ അമിതവേഗതയിൽ വന്ന കാർ ഇടിച്ചാണ് കുട്ടികൾ മരിച്ചത്. കാർ നിർത്താതെ പോയതായി ദൃക്സാക്ഷികൾ പറഞ്ഞു. അപകടത്തിന് ശേഷം നാട്ടുകാർ കുട്ടികളെ രക്ഷിക്കാൻ ശ്രമിച്ചെങ്കിലും പരാജയപ്പെട്ടു. പിന്നീട് പാരാമെഡിക്കുകൾ എത്തിയപ്പോഴേക്കും കുട്ടികൾ മരണം സംഭവച്ചിരുന്നു.
നിർത്താതെ പോയ വാഹനത്തിൽ ഒരു യുവാവും യുവതിയുമാണ് ഉണ്ടായിരുന്നതെന്ന് കണ്ടെത്തി. ഇരുവരും നിലവിൽ പൊലീസ് കസ്റ്റഡിയിലാണെന്ന് റിപ്പോർട്ടുകളുണ്ട്.
"ഈ ദുഷ്കരമായ സമയത്ത് ഞങ്ങൾ ദുഃഖിതരാണ്. പിന്തുണ നൽകിയ എല്ലാവർക്കും പാരാമെഡിക്കുകൾക്കും എയർ ആംബുലൻസ് ക്രൂവിനും അവരെ രക്ഷിക്കാൻ ശ്രമിച്ച പൊതുജനങ്ങൾക്കും ഞാൻ നന്ദി പറയുന്നു" – കുട്ടികളുടെ അമ്മ എമ്മ കീലിങ് സമൂഹ മാധ്യമത്തിലൂടെ അറിയിച്ചു.
അപകടത്തിൽ മരിച്ച കുട്ടികളുടെ സംസ്കാര ചടങ്ങുകൾക്കായി ഓൺലൈൻ ധനസമാഹരണം ആരംഭിച്ചിട്ടുണ്ട്. ഗോഫണ്ട്മീ വഴി 22,000 പൗണ്ടിലധികം സമാഹരിച്ചു. സംഭവത്തിൽ എസെക്സ് പൊലീസ് അന്വേഷണം ആരംഭിച്ചിട്ടുണ്ട്. അപകടവുമായി ബന്ധപ്പെട്ട് എന്തെങ്കിലും വിവരങ്ങൾ ഉള്ളവർ പൊലീസുമായി ബന്ധപ്പെടണമെന്ന് അധികൃതർ അഭ്യർഥിച്ചിട്ടുണ്ട്.