എല്ലാവരും ജർമനിയിലേക്കോ? പഠിക്കാം, ജോലി ചെയ്യാം, പ്രവാസികളെ ആകർഷിച്ച് രാജ്യം; പൗരത്വ നിയമത്തിലെ മാറ്റവും ഗുണകരം

ബര്‍ലിന്‍ ∙ രാജ്യാന്തര വിദ്യാർഥികളെ ആകർഷിച്ച് ജർമനി. കഴിഞ്ഞ 4 വർഷത്തിനിടെ അനുവദിച്ചത് 27,000 സ്റ്റുഡന്റ് വീസകൾ (വർധന 43 ശതമാനം). 2021നും 2024നും ഇടയിലാണ് പഠനാവശ്യങ്ങൾക്കായി ഇത്രയധികം വീസകൾ അനുവദിച്ചത് . 2021 ല്‍ ഏകദേശം 63,000 വീസകള്‍ അനുവദിച്ചപ്പോൾ  2024 ല്‍ മൊത്തം 90,000 സ്റ്റുഡന്റ് വീസകളാണ് നൽകിയതെന്ന് ജര്‍മന്‍ ആഭ്യന്തര മന്ത്രാലയം പ്രസിദ്ധീകരിച്ച കണക്കുകളിൽ വിശദമാക്കുന്നു. 

തൊഴില്‍ വീസകളുടെ എണ്ണവും ക്രമാതീതമായി വർധിച്ചിട്ടുണ്ട്.  വിദഗ്ധ തൊഴിലാളികളുടെ കുടിയേറ്റം മെച്ചപ്പെടുത്താൻ ജര്‍മനി പുതിയ നടപടികള്‍ സ്വീകരിക്കുന്ന തിരക്കിലാണ്. സ്റ്റുഡന്റ് വീസകള്‍, തൊഴില്‍ വീസകള്‍, അഭയാര്‍ഥി അപേക്ഷകള്‍ എന്നിവയുള്‍പ്പെടെയുള്ള വീസ നമ്പറുകളെക്കുറിച്ചുള്ള ഡേറ്റ, ജര്‍മന്‍ ആഭ്യന്തര മന്ത്രി നാന്‍സി ഫെയ്സറാണ് വെളിപ്പെടുത്തിയത്. ജര്‍മനി  വിജയം അടയാളപ്പെടുത്തിയ മൂന്ന് മേഖലകളില്‍ ഇമിഗ്രേഷന്‍ തൊഴിലാളികളെയും വിദഗ്ധ തൊഴിലാളികളെയും ശക്തിപ്പെടുത്തുക, മനുഷ്യക്കടത്ത് തടയുക, ക്രമരഹിതമായ കുടിയേറ്റം തടയുക എന്നിവയും ഉള്‍പ്പെടുന്നു.

മൈഗ്രേഷന്‍ നയം ബുദ്ധിയുള്ളവര്‍ക്കുള്ളതല്ല, മറിച്ച് സ്ഥിരമായി കൈകാര്യം ചെയ്യേണ്ട ഒരു മാനേജ്മെന്റ് ടാസ്ക്കാണെന്നും 2021 മുതല്‍ വൈദഗ്ധ്യമുള്ള കുടിയേറ്റക്കാരുടെ എണ്ണം 77 ശതമാനം വര്‍ധിപ്പിച്ചുവെന്നും ജര്‍മനി ഒരു കുടിയേറ്റ രാജ്യമായി തുടരുന്നുവെന്നും മന്ത്രി ഫെയ്സര്‍ ചൂണ്ടിക്കാട്ടി. നാല് വര്‍ഷത്തെ കാലയളവിനിടെ സ്റ്റുഡന്റ് വീസകള്‍ 43 ശതമാനം വര്‍ധിച്ചപ്പോള്‍, തൊഴില്‍ വീസകളുടെ എണ്ണം 2024 ല്‍ 77.3 ശതമാനമാണ് വര്‍ധിച്ചത്. 2021ലെ  97,000 ല്‍ നിന്ന് 2024 ൽ 1,72,000 ആയാണ് ഉയർന്നത്.

അഭയാര്‍ഥി അപേക്ഷകളുടെ എണ്ണത്തില്‍ വര്‍ഷാവര്‍ഷം 34.2 ശതമാനം കുറവുണ്ടായതായി കണക്കുകള്‍ വെളിപ്പെടുത്തുന്നു. 2025 ജനുവരി മുതല്‍ മാര്‍ച്ച് വരെ രേഖപ്പെടുത്തിയ കണക്കുകള്‍ ഉള്‍പ്പെടെയുള്ള പ്രാഥമിക കണക്കുകള്‍ പ്രകാരം 33,157 അഭയാര്‍ഥി അപേക്ഷകള്‍ സമര്‍പ്പിച്ചതായി കണ്ടെത്തി. 2024ലെ ആദ്യ പാദത്തെ അപേക്ഷിച്ച് 37 ശതമാനം കുറവാണ്. ആദ്യ അഭയാര്‍ഥി അപേക്ഷകള്‍ക്കും ഇത് ബാധകമാണ്. 2024 ലെ ഇതേ കാലയളവിനെ അപേക്ഷിച്ച് 2025 ലെ ആദ്യ രണ്ട് മാസങ്ങളില്‍ എണ്ണം 43 ശതമാനം കുറഞ്ഞു.

ജര്‍മനിയിലേക്കുള്ള കുടിയേറ്റത്തിനുള്ള സാധ്യതകള്‍ മെച്ചപ്പെടുത്താനാണ് പുതിയ നടപടികള്‍ ലക്ഷ്യമിടുന്നത്. ജര്‍മന്‍ സര്‍ക്കാര്‍ സ്വീകരിച്ച പുതിയ നടപടികള്‍ വിവിധ ഘട്ടങ്ങളില്‍ ജര്‍മനിയിലേക്കുള്ള കുടിയേറ്റം മെച്ചപ്പെടുത്താന്‍ ലക്ഷ്യമിടുന്നു. ഉദാഹരണത്തിന്, ഭാഷാ വൈദഗ്ധ്യം രാജ്യത്തെ ഒരാളുടെ ജീവിതത്തെ സ്വാധീനിക്കുമെന്ന് അധികാരികള്‍ കണക്കിലെടുത്തിട്ടുണ്ട്. കുടിയേറ്റക്കാർക്കുള്ള ഇന്റഗ്രേഷന്‍ കോഴ്സുകള്‍ വിപുലീകരിച്ചും  യുക്രെയ്നില്‍ നിന്നുള്ള അഭയാര്‍ഥികള്‍ക്ക് ഭാഷാ പരിശീലനവും കൗണ്‍സിലിങ്ങ് സേവനങ്ങളും അവരുടെ ഏകീകരണ പ്രക്രിയയുടെ തുടക്കത്തില്‍ തന്നെ വാഗ്ദാനം ചെയ്തിട്ടുണ്ട്.

വിദേശ തൊഴിലാളികളെ ആകര്‍ഷിക്കാന്‍ ലക്ഷ്യമിട്ടുള്ള ജര്‍മനിയിലെ ഏറ്റവും ശക്തമായ പദ്ധതികളിലൊന്നായ സ്കില്‍ഡ് ഇമിഗ്രേഷന്‍ ആക്ട്, പ്രഫഷനല്‍ അനുഭവപരിചയത്തിന് മുന്‍ഗണന നല്‍കുന്നതിനായി പരിഷ്ക്കരിച്ചിട്ടുണ്ട്. അതേസമയം ജര്‍മനിയില്‍ ദീര്‍ഘകാലം താമസിച്ചിരുന്നവര്‍ക്ക് ജര്‍മന്‍ പൗരന്മാരാകുന്നതിനുള്ള പ്രക്രിയ സുഗമമാക്കുന്നതിന് പൗരത്വ നിയമത്തില്‍ മാറ്റം വരുത്തിയിട്ടുണ്ട്. എന്നിരുന്നാലും, ജനാധിപത്യ വിരുദ്ധവും വിവാദപരവുമായ വിശ്വാസങ്ങളുള്ളവര്‍ക്ക് ജര്‍മന്‍ പൗരത്വം ലഭിക്കാനുള്ള സാധ്യത നഷ്ടപ്പെടും.