സാൻഡ്​വിച്ചിന് പോലും വിലക്ക്!; യൂറോപ്പിൽ നിന്നുള്ളവർക്ക് യുകെ യാത്രയ്ക്ക് പുതിയ 'ഭക്ഷണ'നിയമം

ബ്രസല്‍സ്∙ ജർമനിയിൽ കുളമ്പുരോഗം റിപ്പോർട്ട് ചെയ്തതിനെത്തുടർന്ന് യൂറോപ്പിൽ നിന്നുള്ള യാത്രക്കാർക്ക് യുകെയിലേക്ക് ഇറച്ചിയും പാലുൽപന്നങ്ങളും കൊണ്ടുപോകുന്നത് നിരോധിച്ചു. യൂറോപ്യൻ യൂണിയൻ , യൂറോപ്യൻ സ്വതന്ത്ര വ്യാപാര മേഖല രാജ്യങ്ങളിൽ (സ്വിറ്റ്സർലൻഡ്, നോർവേ, ഐസ്​ലൻഡ്, ലിച്ചെൻസ്റ്റീൻ) നിന്ന് ബ്രിട്ടനിലേക്ക് പോകുന്നവർക്ക് കന്നുകാലികൾ, ചെമ്മരിയാടുകൾ, പന്നി, ആട് എന്നിവയിൽ നിന്നുള്ള മാംസം, പാൽ അല്ലെങ്കിൽ പാലുൽപന്നങ്ങൾ എന്നിവ വ്യക്തിഗത ആവശ്യത്തിന് പോലും കൊണ്ടുപോകാൻ കഴിയില്ലെന്ന് ബ്രിട്ടിഷ് സർക്കാർ അറിയിച്ചു. ഏപ്രിൽ 12 മുതലാണ് ഈ താൽക്കാലിക നിയന്ത്രണം നിലവിൽ വന്നത്.

പന്നിയിറച്ചി, ഗോമാംസം, ആട്ടിറച്ചി, പാൽ, ഡയറി ഉൽപന്നങ്ങൾ എന്നിവ യാത്രാക്കാർ വ്യക്തിഗത ആവശ്യത്തിനായി കൊണ്ടുവരുന്നത് നിരോധിച്ചിരിക്കുന്നു. സാൻഡ്​വിച്ചുകൾ, ചീസുകൾ, ക്യൂർഡ് മാംസങ്ങൾ, അസംസ്കൃത മാംസങ്ങൾ എന്നിവ പാക്ക് ചെയ്തതോ അല്ലാത്തതോ ഡ്യൂട്ടി ഫ്രീയിൽ നിന്ന് വാങ്ങിയതോ ആകട്ടെ ഇവയ്ക്കും നിരോധനം ബാധകമാണ്.

നിയമം ലംഘിച്ച് ഈ വസ്തുക്കളുമായി ആരെങ്കിലും പിടിയിലായാൽ അവ അതിർത്തിയിൽ വെച്ച് തന്നെ നശിപ്പിക്കും. ഗുരുതരമായ കേസുകളിൽ 5,000 പൗണ്ട് (ഏകദേശം 5,845 യൂറോ) വരെ പിഴ ചുമത്താനും സാധ്യതയുണ്ട്. ഈ നിയന്ത്രണങ്ങൾ ഗ്രേറ്റ് ബ്രിട്ടനിലേക്ക് (ഇംഗ്ലണ്ട്, സ്കോട്ട്ലൻഡ്, വെയിൽസ്) വരുന്ന യാത്രക്കാർക്ക് മാത്രമേ ബാധകമാകൂ. വടക്കൻ അയർലൻഡ്, ജേഴ്സി, ഗുർൺസി, ഐൽ ഓഫ് മാൻ എന്നിവിടങ്ങളിൽ ഈ നിയമം ബാധകമല്ല.